དཀོན་མཆོག་གསུམ་པོ་དད་ཡུལ་འཇོག་བཞིན་ལས་དང་རྒྱུ་འབྲས་ཁས་ལེན་ཏེ།།
ཀ་ཁ་ག་ངའི་གདངས་དབྱངས་གྱེར་བཞིན་སྦྲང་དཀར་རྩམ་པས་ཟུངས་སྟོབས་རྒྱས།།
ཕུགས་འདུན་དམིཌ་ཡུལ་གཅིག་པ་ཡིན་རུང་ཕྱོགས་རིས་ཅན་གྱི་མཁས་རློམས་འགས།།
སྨྱུ་གུའི་སོ་ཁ་ནང་དུ་བསྒྱུར་བས་མཐུན་སྒྲིལ་བྱེད་པར་འགོག་རྐྱེན་བཟོས།།
མེས་པོ་དམ་པ་གཡུང་དྲུང་བོན་དང་ས་དགེ་བཀའ་རྙིང་ཇོ་ནང་སོགས།།
འདི་ཕྱི་གཉིས་ཀའི་སྐྱབས་གནས་ཡིན་པ་སྐྱེས་ཆེན་དུ་མས་གསུངས་ཡོད་ཀྱང་།།
གསར་ངད་ཅན་འགས་རང་འདོད་བཙན་པོས་ལོག་འགྲེལ་བྱེད་དང་བྱས་དྲཌ་པས།།
ཁ་བའི་ལས་དབང་རླུང་གསེབ་ཁྲོད་ཀྱི་མར་མེ་བཞིན་གྱུར་སེམས་རེ་ཕམ།།
ཉེར་གཅིག་དུས་རབས་འདི་ཡི་ནང་ལ་དགོ་བྲོའི་ལྟད་མོ་ཤིན་ཏུ་མང་།།
བྱམས་སེམས་སྙིང་རྗེ་ཁ་ནས་བརྗོད་བཞིན་མི་དགེ་སྣ་ཚོགས་ལྐོག་ཏུ་སྒྲུབ།།
སྒོམ་སྒྲུབ་ཉམས་ལེན་ཟླ་ཤས་བགྱིས་ནས་བླ་སྤྲུལ་ག་གེའི་མིང་ཞིག་ཁུར།།
ཟེར་སྒྲོས་བདེན་ན་ཞིང་ཁམས་ལ་ཡང་ཁ་པར་བརྒྱབ་པ་གོ་ཐོས་བྱུང་།།
ཁ་བའི་ལྗོངས་ནས་འཚར་ལོང་བྱུང་ཞིང་ཁ་བ་རི་བའི་སྐྱིད་སྡུག་ལ།།
ཁ་ཁོག་མེད་པར་ཉིན་མཚན་ཀུན་དུ་རིག་པའི་གནས་ལ་འབད་བཞིན་པའི།།
གཞོན་ནུ་རྟོགས་སད་མང་དུ་ཐོན་ནས་ཞི་མཐུན་ལས་ལ་བརྩོན་དུས་སུ།།
ཡ་ཆུང་སེམས་ཀྱི་གདིང་ཁོངས་དེ་ནས་རེ་བའི་མིག་ཟུང་འོད་འཚེར་འཚེར་།།
ཤེས་ཡོན་ཕྱུག་པའི་ན་གཞོན་འགའ་ཡི་རིག་པས་རྒྱལ་ཁམས་བསྐོར་ནས་སུ།།
མཐོང་ཐོས་མྱོང་བས་སྙིགས་དོར་བཅུད་ལེན་ཚུལ་བཞིན་དགོས་པའི་ལམ་བསྟེན་ནས།།
ལྷག་བསམ་ཞིག་གིས་ང་ཚོས་མི་འཇོན་བྱ་གཞག་ཀུན་སྤྱོད་ལ་སོཌ་པའི།།
དཔྱད་བརྗོད་རྩོམ་ཡིག་ཐོག་རྒོད་འདྲ་བ་མཐོང་ཐེངས་རེ་ལ་སྣང་རེ་སྤྲོ།།
མཐོང་ཐོས་ཉུང་བས་གཞན་སྡེའི་འདོད་ཚུལ་ཚད་ལྡན་ལོ་རྒྱུས་གང་ལའང་།།
བལྟ་ཀློག་ཙམ་མེད་རང་རྟུག་གསེར་སྒོམ་དཔེ་ལྟར་བྱས་ཏེ་རང་འདོད་ཀྱིས།།
ཨ་མྱེ་རྒན་པོའི་ཕྱི་གྲལ་བརྫངས་ཏེ་སྐྱོན་བརྗོད་སྣ་ཚོགས་བགྱིས་ན་ཡང་།།
རང་མགོ་གཉོག་པའི་ ཐོ་བ་ཡིན་པ་ཚད་ལྡན་མི་བུའི་ཅི་མི་མཁྱེན།།
ལོ་ངོ་ཁྲི་ཕྲག་ཡར་སྔོན་དེ་ནས་ཁ་བ་བོད་པའི་མིང་ཡོད་ལ།།
དེ་དང་དེ་བཞིན་རིག་གནས་སྣ་མང་ཕུན་སུམ་ཚོགས་ན་ཡང་།།
མི་བུ་འགའ་ཞིག་ཨ་གསར་ཆེ་བས་རྒྱ་གར་རྒྱ་ནག་ཁུང་ལ་གཏུག།
བོད་ཡུལ་རང་སར་ཅི་ཡང་མེད་པའི་མུན་པའི་གླིང་ཞིག་སོ་སོས་སྒྲུབ།།
རྒན་རིགས་འགའ་ཞིག་རྙིང་ཞེན་ཆེ་བས་རྒྱུ་མཚན་མི་བཙལ་རང་འདོད་བྱེད།།
ན་གཞོན་ཁྱུ་ཞིག་དེའི་རྗེས་རྙེགས་ཏེ་རྡོག་སྣ་ཐོགས་ཏེ་འགྱེལ་ལ་ཁད།།
ངེས་པ་དོན་གྱི་རྟོགས་སད་འགའ་ཡིས་དྲང་བདེན་གནས་ལུགས་འཆད་ན་ཡང་།།
ལྟ་ལོག་ཞེས་པའི་མིང་ངན་འདོཌ་ནས་རང་སྐྱོན་སྐུང་པ་ཤ་རེ་ཚ།།
དད་པ་དག་སྣང་ལོས་ཀྱང་ཡོད་དེ་ཁ་བ་རི་བོའི་ཁྱད་ཆོས་ཏེ།།
ནད་ལ་སྨན་དང་གདོན་ལ་གཏོ་དཔྱད་རྒྱུད་གཞུང་ཀུན་ལ་གསུངས་ཡོད་ཀྱང་།།
བདག་འཛིན་ཆེ་བས་ནད་བཅོས་དགོས་མིན་བླ་མའི་ཕྱག་མོར་ལྟ་དགོས་ཞེས།།
ནད་ཅན་འགའ་ཞིག་བར་ཅད་དབང་གིས་ལྔ་ལམ་ཤོར་བ་ཡ་རེ་ང་།།
ང་དང་འདྲ་བའི་གསར་བུ་འགའ་ཞིག་རིག་གནས་རྨང་གཞི་མེད་ན་ཡང་།།
རང་སྐྱོན་སྦས་ཏེ་བློ་ཁོག་ཆེན་པོས་ཟུར་ཟའི་རྩོམ་རྙོག་འབྲི་བ་འདི།།
མཁས་པས་མཐོང་ཚེ་ཁོང་འཛུམ་ཤོར་རུང་དྲན་ཚུལ་ཇི་བཞིན་ཕབ་པ་དེ།།
ཀ་མད་སུམ་ཅུར་དུང་ཞེན་ཆེ་བའི་རྟགས་མཚན་ཡིན་ཅེས་ངོ་སྤྲོད་དོ།།
ཁྱེད་དང་ང་ཡི་བསམ་ཚུལ་ཐད་ནས་མཐུན་མིན་གང་ཡང་ཡོད་ངེས་པས།།
ཀློག་གིན་ཀློག་གིན་དོན་ལ་གཞིཌ་ཏེ་རང་གཞན་ཀུན་གྱི་བྱ་སྤྱོད་སོགས།།
དོན་དུ་གནས་མིན་རང་གིས་རང་འདྲི་བསམ་བློ་བཏང་ནས་དཔྱད་རྒྱུ་གལ།།
གོང་བརྗོད་དོན་དག་ཚུལ་ལྡན་མྱི་བུ་ཟེར་གྱི་མེད་པས་དབྱེ་ཞིབ་མཛོད།།
2012。10。7ཉིན ་ཆབ་མདོ་སྨན་རྩིས་ཁང་དུ་ལས་རེས་ཀྱི་སྐབས་ཤིས་བྲིས།
༼ སྤུ་རྒྱལ་གངས་དཀར༽ འདོན་ཐེངས་བཞི་པར་འཁོད།
