ཉམ་ཆུང་ལུ་གུའི་སྨྲེ་ངག །
ཀ་ཡེ་ལན་གཅིག་གསོན་དང་གྲོགས་པོ་ལགས། །
ཉམས་ཆུང་ལུ་གུ་ང་ཡི་དགའ་སྐྱོ་དང་། །
ཡ་ཆུང་སེམས་ནས་འཕྱུར་བའི་སྐྱབས་འཇུག་ཅིག །
སྨྲ་ཤེས་དོན་གོ་ཅན་ལ་ཞུ་བར་འདོད། །
ས་གཙང་ཉམས་དགའ་ལྷད་མེད་རྩ་ཆུ་བཟང་།།
བྱམས་སེམས་སྙིང་རྗེས་འགྲོ་དྲུག་མ་རུ་སྒོམ།།
གཞན་ཕན་གཙོ་བོར་འཛིན་པའི་གངས་ལྗོངས་ལ།།
ང་ཡི་འབའ་སྒྲ་ཐོག་མ་འདི་ན་བསྒྲག །
ཨ་མའི་ནུ་ཞོས་ལུས་སྟོབས་དལ་གྱིས་གསོས།།
ཨ་མ་དྲིན་མོ་ཆེ་ཡི་རྩིབ་རིས་དེས།།
ལུས་ཟུངས་བདུན་པོ་རྒྱས་ནས་རིམ་བཞིན་དར།།
མ་བུའི་བརྩེ་དུང་ཇི་འདྲའི་རླབ་ཆེན་ཞིག །
ཨ་མས་ང་ལ་གཡང་དཀར་ལོ་ལོ་བཏགས།།
རྩ་ཆུ་གང་བཟང་བཟའ་བཏུང་བྱ་ཚུལ་དང་།།
གཅན་སྤྱང་འཇིགས་པ་དོག་ཟོན་དགོས་ལུཌ་སོཌ།།
ནམ་ཡང་བརྗེད་ཐབས་བྲལ་བའི་གདམས་ངག་གོ །
དཔྱིད་ཀྱི་རྒྱལ་མོའི་གསུངས་སྐད་རྣ་བར་སྙན།།
ལྷད་མེད་རྩ་ཆུའི་བྲོ་བ་ཤིན་ཏུ་ལེགས། །
སེམས་བཟང་རྫི་བོས་འཚོ་སྐྱོང་ཐབས་མཁས་པས།།
ངེད་ཚོའི་ཡན་ལ་སྐྱིད་ཅིག་མེད་ཀི་སྙམ།།
ཡར་གི་གངས་རི་དཀར་པོ་དྭངས་ཤིང་གཙང་།།
བར་གྱི་སྤང་ལྗོང་སྔོན་མོ་མཛེས་ཤིང་སྐྱིད།།
མཐའ་ཡི་མི་དང་དུད་འགྲོའི་བརྩེ་དུང་ཟབ།།
དགའ་སྐྱིད་འདི་ཚོ་བསམ་ན་སེམས་རེ་དགའ།།
དུས་རབས་ཉེར་གཅིག་སྒོར་མོས་དལ་གྱིས་བསུས།།
དངོས་པོའི་དཔལ་ཡོན་ཉིན་བཞིན་གོང་ནས་འཕེལ།།
བསམ་པའི་དཔལ་ཡོན་ལ་ཁའི་ཉི་མ་བཞིན།།
རུ་ང་འགྲན་སེམས་དབྱར་གྱི་མཚོ་ལྟར་རྒྱས།།
མ་ཎི་མ་ཏྲིའི་སྙན་དབྱངས་གྱེར་བཞིན་དུ།།
དཀོན་མཆོག་གསུམ་པོ་དང་ཡུལ་ཡིན་ཅེས་དང་།།
བྱམས་སེམས་སྙིང་རྗེ་དགོས་ཅེས་གཏམ་སྙན་འཆད།།
ལག་ལེན་དོན་དུ་མི་འཛིན་སེམས་རེ་ཕམ།།
ན་ཚོད་རྒས་པའི་ཉམས་ཆུང་དུད་འགྲོའི་རིགས།།
གནས་སྐབས་ཡོང་འབབ་བལྟས་ཏེ་བཤད་རར་བརྫང་།།
གསར་སྐྱེས་ང་ཚོའི་ལྤགས་རིགས་རྒྱན་རློམས་ནས།།
ཡ་ང་སྙིང་རྗེ་མེད་པར་གསོད་ལ་བྲེལ།།
སྣང་བ་དགུང་ལས་མཐོ་བའི་མི་བུ་ལགས།།
ཁྱེད་ཀྱི་ཚར་སྟོད་གཅིག་གི་ནང་རོལ་ལ།།
ལུ་གུ་བཅུ་ཕྲག་མང་པོའི་རྣམ་ཤེས་ཡོད།།
གཡང་དཀར་མ་མོ་བརྒྱ་ཡི་སེམས་སྡུག་ཡོད།།
ཁྱེད་རང་ཕ་མ་མཉམ་དུ་འཛོམས་པ་དང་། །
བདེ་སྐྱིད་ལྡན་པའི་འཚོ་བ་རོལ་བའི་སྐབས། །
གློ་བུར་གཞན་གྱི་འཚེ་བས་ཁ་ཕྲལ་ན། །
འབྲལ་འདོད་ཡོད་མེད་སུས་ཀྱང་བཤད་མ་དགོས། །
ཕྱི་རོལ་ཡུལ་གྱི་དངོས་པོའི་མཛེས་ལྗོངས་དང་། །
མ་བུའི་བར་གྱི་ལྷད་མེད་བརྩེ་དུངས་བཅས། །
རྩྭ་ཆུ་གང་བཟང་འཚོ་བ་རོལ་རྒྱུ་སོགས། །
གང་སྐྱིད་འདོད་པ་མི་དང་ཁྱད་ཅི་ཡོད། །
སྔོན་ལས་དབང་གིས་རྐང་གཉིས་རྐང་བཞི་དང་། །
ཕན་ཚུན་གླེང་མོལ་ཤེས་མིན་མ་གཏོགས་པ། །
ནང་གི་སེམས་ཀྱི་དགའ་སྐྱོ་ཆགས་སྡང་སོགས། །
གཅིག་མཚུངས་ཡིན་པ་སྐྱེས་ཆེན་དུ་མས་གསུངས། །
ཁྲེལ་མེད་ཧམ་སེམས་ཅན་གྱི་བདག་པོ་ཁོས། །
དགེ་མེད་འཇིགས་རུང་ཤན་པའི་ལག་ཏུ་བཞག །
ནུས་མེད་ང་ཡི་གཟུགས་གཞི་ཐང་ལ་སྦྱར། །
བསླུ་མེད་མཆོག་གསུམ་དམ་པས་ལམ་སྟོན་མཛོད། །
ལུས་ལ་གང་འཇམ་བྱེད་རྒྱུའི་དངོས་མང་ཡང་། །
ལུ་གུའི་ཚ་རུ་ཡག་ཅེས་མཛེས་རྒྱན་རློམ། །
གནས་སྐབས་ཁྱེད་ཀྱི་ལུས་ལ་བདེ་སྲིད་ཀྱང་། །
ང་ཡི་སྲོག་དབུགས་འདི་ལྟར་ཁྱེད་ཀྱིས་འཕྲོག །
ཁ་ནས་གཞན་ཕན་བྱམས་བརྩེ་གྱེར་བཞིན་དུ། །
གྱོན་རྒྱུ་ལྤགས་རིགས་བཟའ་རྒྱུ་ཤ་རིགས་བྱེད། །
ཁ་དོན་མི་མཚུངས་ལས་དག་རིང་དོར་ནས། །
ཉིན་བཞིན་ཉུང་དུ་གཏོང་རོགས་དུད་འགྲོའི་རེ། །
ཁྱེད་ནི་ལས་སྨོན་བཟང་པོའི་མཐུ་སྟོབས་ཀྱིས། །
འགྲོ་དྲུག་མཆོག་གྱུར་མི་ཡི་ལུས་རྟེན་རྙེད། །
གང་འདོད་ཡིན་བསམ་འདོད་རྔམ་མ་ཆེ་ནས། །
ངེད་ཚོའི་སྲོག་ལ་གཅེས་སྐྱོང་གནང་བར་རེ། །
འདི་ནི་ཁོ་བོ་གཞུང་དོན་གྱིས་གཤམ་བསྐྱོད་སྐབས་སུ་མི་འགའི་
སྐད་ཆའི་བཤད་སྟངས་དང་བྱ་སྤྱོད་ལ་གཞིགས་ནས་ལུག་གུ་ཆུང་ཆུང་ཞིག་གི་ཚབ་ཏུ་བྲིས། ༢༠༡༢.༡༡.༢༢ཉིན།
༼ བོན་གཤེན་བསྭོ་སྒྲ༽ འདོན་ཐེངས་གསུམ་པར་འཁོད་ཅིང་། དེ་སྔོན་ཁར་ནང་དོན་འགའ་ཁ་གསབ་བྱས་ཏེ་འདིར་བཀོད་པའོ།
