མ་ཡུམ་དུས་ཆེན་ལ་ཕུལ་བའི་ལེགས་སྐྱེས།
ཨ་མྱེ་ཡང་མྱེ་དག་གིས་གསུངས་ཚུལ་ལ།།
འཇིགས་རྟེན་ཁམས་ཀྱི་སྐྱེ་འགྲོ་ཡོད་ཅོག།
ཕ་མ་མ་གྱུར་པ་ནི་གཅིག་ཀྱང་མེད།།
དེ་ནི་ལོས་བདེན་དམ་པའི་ཞལ་གདམས་རེད།།
སྤྱིར་ནི་ཕ་མས་བུ་ཕྲུག་འཚོ་བའི་དོན།།
རང་ལུས་གང་ཡོད་ལེགས་སྐྱེས་འབུལ་བ་དང་།།
བུ་ཕྲུག་ཆེད་དུ་སྡིག་ལས་སྒྲུབ་པ་སྟེ།།
དེ་ནི་ལོས་ཡིན་འཁོར་བའི་འགྲོ་ཕྱོགས་རེད།།
ཕ་མ་མེད་པའི་བུ་ཕྲུག་མེད་ངེས་ལ།།
བུ་ཕྲུག་མེད་པའི་བྱ་བཏང་རེ་འགའ་ཙམ།།
གང་ལྟར་ཕ་མ་ཞེས་པའི་སྐྱེས་བུ་འདི།།
ཇི་འདྲའི་གཅེས་སུ་འཛིན་པའི་མི་བུ་ཞིག །
ལུགས་མཐུན་འཚོ་བར་རོལ་བའི་བཟའ་ཟླ་ཡི།།
བུ་ཕྲུག་ཞིག་གིས་ངོས་ནས་བརྗོད་པ་ན།།
ཕ་མ་གཉིས་ཀྱི་བཀའ་དྲིན་ཆེ་ཆུང་དེ།།
དབྱེ་འབྱེད་དཀའ་བ་ཡིན་པའི་དོན་ཅིག་རེད།།
ཤེས་འཇོན་ནུས་གསུམ་ལྡན་པའི་ཕ་རྒན་དེས།།
ཉིན་མཚན་དབྱེར་མེད་འཚོ་བའི་དོན་ལ་རེམ།།
གཞུང་དྲང་གཤིས་རྒྱུད་ལྷོད་པའི་མ་རྒན་དེས།།
རང་ཁྱིམ་དྲོད་ཀྱིས་ཁེངས་པའི་ཡུལ་ཞིག་བསྐྲུན།།
ལོ་རེའི་སྤྱི་ཟླ་ལྔ་པའི་ཚེས་བཅུ་གཉིས། །
དྲིན་ཆེན་ཨ་མའི་དུས་ཆེན་ཡིན་འདུག་ཟེར།།
གང་ལྟར་ཨ་མར་ཕུལ་བའི་སེམས་གཏམ་འབྲི།།
ཨ་མའི་དྲིན་ལན་དྲན་ཚུལ་ཅུང་ཙམ་འགོད།།
སྦྱང་ནས་ཟད་རྒྱུ་མེད་པའི་རིག་གནས་དང་།།
ལས་ནས་ཚར་རྒྱུ་མེད་པའི་འཁོར་བ་ཡིས།།
སྐྲ་ལོའི་མདོག་འགྱུར་ལུས་ཀྱི་སྟོབས་ཉམས་པའི།།
ཕ་མར་བྱམས་སྐྱོང་མ་བྱུང་སེམས་རེ་ཕམ།།
ཟླ་དགུ་ཞག་བཅུ་ངལ་མེད་ལྷུམས་སུ་ཁུར།།
བུ་ལ་གནོད་ཀྱི་དོག་པའི་སེམས་ཕྲལ་གྱིས།།
ཟས་སྐོམ་གང་ཞིམ་དུག་ལྟར་རིང་དུ་དོར།།
ན་ཟུག་ཆེ་རུང་སྨན་དཔྱད་བཟོད་སྒོམ་གནང་།།
སྐྱེ་གཟེར་ཞེས་པའི་ན་ཟུག་ཆེན་པོ་དེས།།
མྱལ་བར་ཐེངས་ཅིག་འགྲིམ་པའི་ཚོར་སྣང་སྟེར།།
དྲན་མེད་བརྒྱལ་ཞིང་དབུགས་ཀྱང་འཆད་ལ་ཁད།།
ལུང་དང་མྱོང་བས་གྲུབ་པའི་མི་འགས་བཤད།།
ང་ཡི་འབོད་སྐད་ཐོག་མ་ཨ་དང་མ།།
མི་གཙང་སྣབ་ལུད་འཕྱི་མཁན་ཨ་མ་ཁྱེད།།
བུ་ཕྲུག་ཚ་གྲང་ལྟོག་སྐོམ་གང་བྱུང་ཡང་།།
ངུ་བགད་གཉིས་ནས་འབོད་ས་ཨ་མ་ལགས།།
བུ་ཕྲུག་སྐྱེས་ནས་རང་ཉིད་མ་ཤི་བར།།
བུ་ཕྲུག་ཆེད་དུ་ཡོད་ཚད་བློས་བཏང་བྱེད།།
བུ་ཕྲུག་ཆེད་དུ་རང་ལུས་སྡུག་ལ་བརྒྱལ།།
བུ་ཕྲུག་ཆེད་དུ་རིན་ཆེན་སྲོག་ཀྱང་བྲལ།།
རང་ཉིད་མི་ཚེ་ཟས་གོས་ངན་ངོན་ཙམ།།
ཁྲག་དང་རྔུལ་ཆུའི་གྲུབ་པའི་འབྲས་བུ་དེས།།
མཁར་དང་ཁང་པ་རྒྱལ་གཞིས་ལྟ་བུ་བསྐྲུན།།
བུ་ཕྲུག་འཚོ་རྟེན་ཡིན་ཅེས་རྗེས་བཞག་མཛད།།
མདོ་མེད་བུ་ཕྲུག་རང་ཉིད་ལྟ་བུ་ནི།།
ལོ་མང་སློབ་སྦྱོང་ཡིན་ཅེས་ས་མཐར་འགྲིམ།།
རྔུལ་ཆུའི་བསྐྲུན་པའི་ཕ་མའི་དངུལ་ལོ་སོགས།།
གང་འཇམ་གྱོན་ཏེ་གང་ཞིམ་ཟས་ལ་རོལ།།
སློབ་གྲོགས་དགའ་གྲོགས་གྲོགས་པོ་དུ་མའི་ལྷན།།
སློབ་ལ་མ་བརྩོན་ཆང་ཁང་དྲྭ་ཁང་སོགས།།
ཉིན་མ་གང་འཁྱོལ་བྱེད་པའི་དུས་ཚོད་དེ།།
ད་ལྟ་བསམ་ཚེ་ཅི་འདྲའི་ཁྲེལ་མེད་ཅིག །།
ལྷག་ཏུ་ཨ་མ་ལགས་ཀྱི་ཞལ་གསུངས་ལ།།
བུ་ཁྱོས་རིག་པའི་གནས་ལ་བློ་སྒྲིམ་ནས།།
སྦྱང་འབྲས་མི་དམན་ཙམ་ཞིག་ལོན་ཐེངས་རེར།།
ཨ་མ་དགའ་བའི་སེམས་ཀྱིས་ཁེངས་ཡོད་ཅེས།།
ཉིན་ཤས་རིང་ལ་སྔ་ལོང་ཕྱི་ཉལ་གྱིས།།
སྐར་གྲངས་མཐོ་ཙམ་ལོན་ཆེད་འབད་ཁུལ་བགྱིས།།
གནམ་གཡེང་ལེ་ལོའི་ཕྱོགས་སུ་ཤོར་དྲགས་པས།།
ཨ་མའི་རེ་བ་མ་འགྲུབ་ཡིད་རེ་སྐྱོ།།
སྐྱེ་བ་སྔོན་མའི་སྡིག་སྒྲིག་ཡིན་ངེས་ལ།
ད་ལྟའི་ཚེ་ཡི་བར་ཆད་ཡིན་ཡང་སྲིད།།
ཡང་ན་ལུས་ཀྱི་ཟུང་སྟོབས་ཟད་ཀྱང་ཆོག །
ཨ་མའི་སྙུང་གཞི་འདི་ལ་ཤ་རེ་ཚ།།
བོས་ཀྱང་གོ་དཀའ་རྣ་བའི་ཐོས་ཤུགས་ཉམས།།
ཚིག་གཞིའི་ནུས་ཤོར་འགུལ་བསྐྱོད་དཀའ་མོར་གྱུར།།
ཕོ་བའི་དྲོད་ཉམས་ཁ་ཟས་འཇུ་བར་དཀའ།།
ལུས་ཟུང་སྐྱོ་པོ་འདི་འདྲ་ཡ་རེ་ང་།།
སྐྲ་ཡི་མདོག་འགྱུར་སོ་ཡི་གྲལ་དེ་ཞིག །
ཐོད་ལ་ཉིན་བཞིན་གཉེར་མ་ཇེ་མང་གྱུར།།
གཟུགས་པོའི་དབྱིབས་འགྱུར་ཁོག་རྒྱ་ཆུང་དུ་ཕྱིན།།
འདི་ལྟར་མཐོང་དུས་བཀའ་དྲིན་ལྷག་དུ་དྲན།།
རང་ཉིད་ལོ་མང་སྦྱང་བའི་སྨན་གཞུང་འདི །།
དྲིན་ཆེན་ཨ་མའི་ན་ཟུག་འཇོམ་བྱེད་དུ།།
སྨན་དཔྱད་ཕར་ཞོག་སྨན་ཆུ་སྟེར་ལང་ཙམ།།
མེད་པ་འདི་ནི་བདག་གི་སེམས་པ་སྐྱོ།།
ས་ཐག་རིང་ཐུང་གང་དུ་ཕྱིན་ན་ཡང་།།
དྲིན་ཆེན་ཨ་མ་ཁྱེད་ཀྱིས་བཀའ་སློབ་དང་།།
སྐྱབས་འགྲོ་སྨོན་ལམ་གྲངས་མེད་བརྗོད་པ་དེ།།
ནམ་ཡང་བརྗེད་ཐབས་བྲལ་བའི་ཞལ་གདམས་སོ།།
ལས་བྱེད་ཞེས་པའི་མིང་ཆེན་རྫིག་པོ་ཞིག །
མི་དམངས་ཞབ་འདེབས་སྒྲུབ་ཅེས་སྐད་སྙན་ཞིག །
འོན་ཀྱང་ཞིབ་ཕྲའི་བསམ་བློ་བཏང་པ་ན།།
ཕ་མར་ཞབས་ཕྱི་མ་ཐུབ་ལྷག་ཏུ་སྐྱོ།།
ཨ་མ་ཁྱེད་ནི་ང་ཚོའི་ཡོད་ཚད་ཡིན།།
ཁྱེད་རང་ཡོད་པས་ང་ཚོར་དགའ་སྐྱིད་ཡོད།།
ཁྱེད་རང་ཡོད་པས་རང་ཁྱིམ་དྲོད་ཀྱིས་ཁེངས།།
ཁྱེད་རང་ཡོད་པས་བུ་ང་སྟོབས་ཤུགས་ལྡན།།
མ་ཅིག་ཡུམ་ཆེན་ཐུགས་རྗེ་བྱམས་མ་དང་།།
མ་ཅིག་མཆོག་གྱུར་སྲིད་པ་རྒྱལ་མོ་སོགས།།
མ་འོངས་དུས་གསུམ་གཟིགས་པའི་མཆོག་གསུམ་གྱིས།།
མ་རྒན་དྲིན་ཆེན་འདི་ཚོར་མགོན་སྐྱོབས་མཛོད།།
སེམས་ཀྱི་གཏིང་ནས་བཞུར་བའི་ཁྲག་ཐིགས་འདི། །
དྲིན་ཆེན་ཨ་མའི་བཀའ་དྲིན་མཚོན་བྱེད་ཙམ། །
ཨ་མའི་སྐུ་སྲོག་རི་རྒྱལ་བཞིན་དུ་བརྟན ། །
ཨ་མ་མི་འདོད་ནད་ལས་མྱུར་གྲོལ་ཤོག །
