དགུན་ཁའི་དུས་སུ་བཟའ་བཏུང་སྤྱོད་པ་ཚད་ལས་འདས་ཤིང་། འཚོ་བ་དང་ཐོན་སྐྱེད་ཀྱི་དབང་གིས་མི་ལ་ངལ་དུབ་བྱུང་བ་དང་དུས་ཚིགས་
གཞན་དང་བསྡུར་ན་འཚོ་བ་རྒྱུན་ལྡན་དུ་མ་གྱུར་པས། དཔྱིད་ཚུགས་རྗེས་
འགུལ་སྐྱོད་བྱེད་འགོ་རྩོམ་རྒྱུ་མ་ཟད། སེམས་ཁམས་དང་ལུས་ཟུངས་སྙོམ་སྒྲིག་
བྱས་ཏེ། ལོ་གསར་བར་ནུས་ཚད་གསོག་འཇོག་བྱས་ན།
ལོ་དེར་ལུས་ཁམས་བདེ་ཐང་ཡོང་བར་རེ་བ་ཆེན་པོ་ཡོད་ངེས།
གཅིག འགྲོ་འདུག་སྐོར་གྱི་ཆོས་ཉིད།
དཔྱིད་ཚུགས་སྐབས། མིའི་ལུས་ཕུང་གི་ཟུངས་ཁྲག་དེ་ཕྱིར་མངོན་པས། སྐྱི་པགས་ལྷོད་པོར་འགྱུར་ཅིང་། ཁྲག་རྒྱུན་གྱི་འཁོར་ཚད་མང་བ་དང་། རྔུལ་ཐོན་རྨེན་བུའི་ཟགས་ཐོན་ཇེ་མང་དུ་འགྱུར་འགྲོ་བས། ལུས་པོའི་དབང་བོ་སོ་སོའི་ཁག་འཁུར་ཇེ་ཆེར་འགྲོ་ནའང་། དབང་རྩ་ལྟེ་བའི་སྡེ་ཁོངས་ལ་ལྷོད་འཇགས་དང་གཉིད་འགུག་པའི་ནུས་པ་
འབྱུང་བས། རྐང་ལག་དུབ་པའི་ཚོར་བ་འབྱུང་སྲིད། སྐབས་འདིར་གཉིད་ལ་སྲེད་དྲགས་ན་
ལུས་ཟུངས་བརྟས་པར་ཕན་ཆེན་པོ་མི་ལྡན། གནམ་གཤིས་ཀྱི་འགྱུར་ལྡོག་
འདི་རིགས་ལ་མཐུན་ཆེད། འགྲོ་འདུག་གི་ཐད་ནས་ནངས་སྔ་ལངས་དང་དགོང་སྔ་ཉལ་བྱེད་རྒྱུ་མ་ཟད། རྒྱུན་པར་ཁང་བའི་ཕྱི་དང་སྡོང་གསེང་དུ་སོང་ནས་འཆམ་འཆམ་དུ་འགྲོ་ཐབས་
བྱས་ཏེ། རང་བྱུང་ཁམས་ཆེན་པོ་ཉམས་སུ་རོལ་དགོས། དཔྱིད་ཀའི་གནམ་གཤིས་ལ་
འགྱུར་ལྡོག་ཆེ་བས། སྐབས་འགར་འཁྱག་ལ་སྐབས་འགར་དྲོ། དེའི་རྐྱེན་གྱིས་མིའི་ལུས་ཕུང་གི་སྐྱི་པགས་ལྷོད་པོར་འགྱུར་བས། ཕྱི་ཡོང་གི་གནོད་འཚེ་འགོག་པའི་ནུས་ཤུགས་ཇེ་ཞན་དུ་འགྲོ་བ་ཡིན། དེར་བརྟེན་དཔྱིད་ཚེས་མ་ཐག་ཏུ་གྱོན་པ་མཐུག་པོ་ཕུད་མི་རུང་། ལྷག་པར་དུ་བགྲེས་པོ་དང་ལུས་ཟུངས་ཞན་པའི་རིགས་ཀྱིས་དེ་ལྟར་བྱས་ན་
ནད་ཡམས་འབྱུང་སླ།
གཉིས། བཟའ་བཏུང་སྐོར་གྱི་གསོ་སྐྱོང་།
བཟའ་ཆས་ཀྱི་བྲོ་བ་ལྔ་དང་དུས་ཚིགས་མི་འདྲ་བ་ལྟར་སྙོམས་སྒྲིག་བྱེད་དགོས། དཔྱིད་ཀར་མིའི་ལུས་སྟེང་གི་རྙིང་ཚབ་གསར་བྱེད་ཧ་ཅང་རྒྱས་ཡོད་པས། རོ་ཚ་བོ་དང་མངར་པོ། དྲོ་མ་འཇམ་གྱི་བཟའ་བཏུང་སྤྱད་ན་འོས་ཤིང་འཚམ། དཔྱིད་ཀར་སྣུམ་ཆེ་བ་དང་
རློན་པ། འཁྱག་པ་སོགས་ཀྱི་བཟའ་བཏུང་སྤྱད་ན་ཆེས་མི་འཚམ་པས། འཚོ་བཅུད B ཆད་པ་ནི་དཔྱིད་གདུག་རྒྱག་པའི་རྒྱུ་རྐྱེན་ཞིག་རེད། དཔྱིད་ཀར་སྐྱུར་ལྡན་
བཟའ་ཆས་མང་པོ་ཟོས་ན་མཆིན་ཚ་ལྷག་ཏུ་རྒྱས་ཏེ།མཚེར་བ་དང་ཕོ་བར་
གནོད་པ་སྐྱེལ་སྲིད། དེར་བརྟེན་དུས་རྒྱུན་རོ་མངར་ལ་སྙོམས་པ་དང་སྤྲི་དཀར་
དང་ཀ་རའི་རིགས། འཚོ་བཅུད། གཏེར་རྒྱུ་མང་བའི་བཟའ་ཆས་ཏེ་ཤ་གནག་
དང་བྱ་སྒོང་། འོ་མ། སྦྲང་རྩི། སྲན་མའི་རིགས། སྔོ་ཚོད་གསར་བ། སིལ་ཏོག་སོགས་མང་པོ་ཟ་དགོས།
གསུམ། སེམས་ཤུགས་འདང་པོ་གསོ་དགོས།
མིའི་སེམས་ཁམས་ཀྱི་འགུལ་སྐྱོད་དེ་གནམ་གཤིས་ཀྱི་འགྱུར་ལྡོག་དང་
བསྟུན་དགོས། མིའི་ལུས་ཕུང་ལ་དུས་ཚིགས་ཀྱི་ཤུགས་རྐྱེན་ཆེ་ཤོས་ཐེབས་པའི་
སྐབས་ནི་བར་བརྒལ་དུས་ཚིགས་ཡིན་པ་སྤྱི་དང་། ལྷག་པར་དུ་དགུན་དཔྱིད་ཀྱི་
བར་མཚམས་དེ་ཡིན།མི་ལ་ལ་དཔྱིད་ཀའི་གནམ་གཤིས་ཀྱི་འགྱུར་ལྡོག་དང་
མཐུན་དཀའ་བས་སྨྱོ་ནད་འབྱུང་སླ་བ་རེད།དེང་རབས་ཀྱི་གསོ་བ་རིག་པའི་
ཞིབ་འཇུག་ལས་ང་ཚོར་གསལ་བོར་བསྟན་དོན།སེམས་ཁམས་མི་ལེགས་པ་ལས་
མཆིན་རླུང་འཁྱིལ་ཏེ། དབང་རྩའི་གསང་རྒྱུད་ཟགས་གཤེར་མ་ལག་གི་ནུས་པ་
འཁྲུག་པ་དང་། རིམས་འགོག་ནུས་པ་ཇེ་ཞན་དུ་འགྱུར་བས།སྨྱོ་ནད་དང་མཆིན་ནད། ཀླད་པའི་ཁྲག་རྩའི་ནད།འགོ་བའི་རང་བཞིན་གྱི་ནད་ཡམས་སོགས་འབྱུང་
སླ་བ་རེད།དེར་བརྟེན་དཔྱིད་ཀར་སེམས་ཁམས་སྐྱིད་པོ་ཞིག་བཟུང་ན་
མཆིན་རླུང་བདེ་མོར་རྒྱུ་ནས་ནད་འགོག་བདེ་སྲུང་གི་ནུས་པ་ཐོན་ཐུབ་པ་རེད།
དཔྱིད་ཟླ་གསུམ་པ་ནི་སྐྱེ་དངོས་ཡོད་རྒུ་འབུས་པའི་དུས་ཚིགས་ཡིན་ཕྱིར། སྐབས་འདིར་ཁོང་ཁྲོ་ལང་མི་རུང་བའི་ཁར། ཡིད་ཀྱང་མི་མུག་པར་ཁོག་རྒྱ་ཡངས་ཤིང་སྤྲོ་བས་ཁེངས་དགོས་པ་དང་། ལུས་པོ་བག་གཡེང་དང་སྤྲོ་སེམས་ཀྱིས་ཁེངས་པར་བྱས་ན་འཚོ་སྟོབས་ཡོངས་སུ་
རྒྱས་སྲིད།
བཞི། འགུལ་སྐྱོད་སྐོར་གྱི་གསོ་སྐྱོང་།
དཔྱིད་ཚེས་རྗེས་ཀྱི་མཁའ་དབུགས་རྒྱས་པའི་ཁྱད་ཆོས་དང་མཐུན་དུ་འཇུག་ཆེད། མཁའ་དབུགས་དྭངས་པའི་རང་བྱུང་ཁམས་ཆེན་མོར་སོང་ནས་རྒྱུག་པ་དང་
དྲག་རྩལ་སྦྱོང་བ། འཆམ་འཆམ་དུ་འགྲོ་བ། ལྒང་ལི་རྩེ་བ། ཤོག་བྱ་གཏོང་བ་སོགས་ཀྱི་འགུལ་སྐྱོད་དང་སྦྱོང་བརྡར་བྱས་ཏེ། སྐྱེ་ལྡན་ཕུང་པོར་རྙིང་དོར་གསར་ལེན་བྱེད་དུ་འཇུག་པ་དང་། རྒྱུས་པ་གསོ་ཞིང་རྩ་དཀར་བསང་པོར་བཏང་སྟེ། ལོ་ཧྲིལ་བོའི་བྱ་བ་དང་སློབ་སྦྱོང་ལ་རྨང་གཞི་ལེགས་པོ་འདིང་དགོས། དཔྱིད་ཀའི་དུས་སུ་རྒྱུན་པར་སྦྱོང་བརྡར་བྱེད་མཁན་ལ་ནད་ཡམས་འགོག་པ་དང་
རིག་ལམ་སྐྱེན་པོ།ངལ་དུབ་མི་འབྱུང་བ།དོན་སྒྲུབ་ལས་ཆོད་མཐོ་བ་བཅས་ཀྱི་
ནུས་པ་འཛོམས་པ་ལག་ལེན་དངོས་ལས་ར་སྤྲོད་བྱུང་ཡོད།
ལྔ། དྲོད་བསྲུངས་ནས་ནད་འགོག་པའི་སྐོར།
དཔྱིད་ཚེས་རྗེས་ནམ་ཟླ་ཇེ་དྲོར་ཡོང་བ་དང་ནད་རིགས་འབྱུང་བའི་འབུ་ཕྲ་དང་
ནད་དུག་སོགས་དེ་དང་བསྟུན་ནས་གསོ་སྤེལ་བྱུང་བས། ཆམ་རིམས་དང་སིབ་བུ། ཀླད་རྒྱུངས་སྐྱི་མོའི་གཉན་ཚད་ཀྱི་ནད་ཡམས། ཚ་རིམས་དམར་སྐྱ། གློ་བའི་གཉན་ཚད་སོགས་འགོ་ནད་འབྱུང་སླ་བ་རེད། “དཔྱིད་ཀར་མི་འཁྱག་པ་དང་སྟོན་ཁར་མི་དྲོས་པ་བྱེད་རྒྱུ་”ནི་གནམ་གཤིས་དང་བསྟུན་པའི་ལུས་གསོ་བདེ་སྲུང་ཉམས་མྱོང་ཡིན། རྒྱུ་མཚན་ནི་དཔྱིད་དུས་སུ་ནམ་ཟླར་འགྱུར་ལྡོག་ཆེ་བས། སྐབས་འགར་འཁྱག་ལ་སྐབས་འགར་དྲོ་བ་དང་། དེའི་ཁར་དགུན་ཁར་མི་རྣམས་ཀྱིས་གྱོན་པ་མཐུག་པོ་གོན་ཡོད་པའི་རྐྱེན་གྱིས་
རྙིང་ཚབ་གསར་བྱེད་ཀྱི་ནུས་པ་ཇེ་ཞན་དུ་གྱུར་ཏེ།ལུས་ཀྱི་དྲོད་གྲང་མགྱོགས་མྱུར་
ངང་སྙོམས་སྒྲིག་བྱེད་དཀའ་བ་རེད།གལ་ཏེ་གྱོན་པ་སྲབ་ན་ནད་ཡམས་འགོ་བས་
ལུས་ཁམས་བདེ་ཐང་ལ་གནོད་པ་བསྐྱལ་ངེས། ཁྲག་ཤེད་མཐོ་བའི་ནད་དང་སྙིང་ནད་བྱུང་ཡོད་པའི་དར་མ་དང་བགྲེས་པོས་
གྲང་འགོག་དྲོད་སྲུང་ལ་དེ་བས་མཐོང་ཆེན་བྱས་ནས་གྲིབ་ནད་དང་སྙིང་རྩ་
འགག་པ་སོགས་ཀྱི་ནད་འབྱུང་བ་སྔོན་འགོག་བྱེད་དགོས།
གཞན་ཡང་སོས་ཀའི་དུས་སུ་སྣ་བརྒྱའི་མེ་ཏོག་ཕན་ཚུན་འགྲན་པ་བཞིན་དུ་
ལྷུག་ལྷུག་བཞད་དེ།མེ་ཏོག་གི་རྡུལ་ག་ས་གང་དུ་མཆེད་པས་ཚོར་ལྷག་ལོག་པའི་
དབུགས་འཚང་ནད་འབྱུང་སླ།དེ་སྔོན་འགོག་བྱེད་པའི་ཐབས་མཆོག་ནི་ལུས་ཕུང་
སྦྱོང་བརྡར་རྒྱུན་འཁྱོངས་བྱས་ཏེ།སྐྱེ་ལྡན་ཕུང་པོའི་ནད་འགོག་ནུས་ཤུགས་
ཇེ་མཐོར་གཏོང་དགོས་པ་དང་གཅིག གཙང་སྦྲར་དོ་སྣང་བྱེད་དགོས་པ་དང་། ནད་འབུ་གནོད་འཚེ་སེལ་ཐབས་བྱས་ནས་ནད་ཡམས་འབྱུང་ཁུངས་གཏན་
འགོག་བྱེད་དགོས་པ་དང་།སྒེའུ་ཁུང་ཕྱེ་ནས་ཁང་བའི་མཁའ་དབུགས་
བརྗེ་དགོས་པ་དང་གཉིས་སོ། །
ལོ་ཙཱ་བ། འབྲུག་མོ།
མཚོསྔོན་བོད་སྐད་རྒྱང་སྒྲོག་བརྙིན་འཕྲིན་དྲྭ་ཚིགས་ལས་དྲངས།