ང་ཡི་མིང་ལ་བསྟན་འཛིན་ཡེ་ཤེས་འབོད། །
ཁྱུང་པོ་སྟེང་ཆེན་ཞེས་པར་ལྟེ་ཁྲག་ཕོས། །
བརྒྱད་པ་ཁ་ཆགས་ཞེས་པའི་དུས་དེ་ནས། །
དབྱངས་གསལ་སོ་བཞི་ཐོག་མར་གྲོགས་པོ་བསྒྲིཌ། །
དེ་ནས་ལོ་ངོ་བཅོ་ལྔར་མ་ཟིན་པར། །
ཁྱིམ་ལས་ཞོར་དང་བོན་པོ་ཞེས་པའི་མིང་། །
ཁུར་ནས་གྲོང་ཚོའི་བར་དུ་འདོན་ཉུག་བྱས། །
བསམ་བློའི་ཁ་ཕྱོགས་མང་བའི་ཁོ་བོ་ཡི། །
སླར་ཡང་སློབ་ཆུང་ལོ་རིམ་བཞི་པ་རུ། །
ཞུགས་ནས་གཞུང་གི་སློབ་གྲྭའི་འཚོ་བའི་རོལ། །
བོད་ཡིག་མ་གཏོགས་འདོན་ཀློག་མ་ཤེས་པས། །
འདྲ་འདྲའི་དབུས་ནས་རྗེས་ལུས་ཐེངས་མང་བྱུང་། །
དུས་ཚོད་རྫོགས་པས་སློབ་ཆུང་མཐར་དེ་ཕྱིན། །
ཉིས་སྟོང་བཞི་ལོའི་ཟླ་བ་བཞི་པ་རུ། །
འཛམ་གླིང་སྤྱི་ནོར་ཡོངས་འཛིན་རིན་པོ་ཆེས། །
དམངས་སྒོར་འབུམ་ཕྲག་གསུམ་ཙམ་འགྲོ་སོང་བཏང་། །
སྨན་མེད་སྨན་པ་དཀོན་པའི་ལུང་ཁུགས་ལ། །
གཞིགས་ནས་རང་ཡུལ་གསོ་རིག་འཛིན་གྲྭ་ཞིག །
བཙུགས་ནས་ཁོ་བོ་དེ་རུ་ཡང་ཚུད་ནས། །
གསོ་རིག་གཞུང་ལ་སྦྱོང་རྒྱུའི་སྐལ་བཟང་ལྡན། །
དེ་རུ་ལོ་གཉིས་བསྡད་ནས་ཆབ་མདོ་ལ། །
འབྲིང་རིམ་སློབ་གྲྭར་རྒྱུགས་སྤྲད་དེར་འཕྲོད་ནས། །
སླར་ཡང་རིག་གནས་ཀུན་ལ་སྦྱངས་ཁུལ་བྱས། །
ཉིས་སྟོང་བརྒྱད་ལོར་གསོ་རིག་སློབ་གླིང་དུ། །
སློབ་གྲྭར་ཚུད་པའི་བཀྲ་ཤིས་ཕྲིན་བཟང་འབྱོར། །
ཁྱི་ལ་སེང་གེའི་མིང་དུ་བཏགས་པ་བཞིན། །
སློབ་ཆེན་ཞེས་པའི་མིང་དེ་ཁུར་ནས་སོང་། །
དཀོན་མཆོག་གསུམ་གྱིས་ཁ་འཛིན་སྡོང་གྲོགས་དང་། །
ལས་དང་ཀླུང་རྟ་དར་བའི་དན་རྟགས་སུ། །
ད་ལོའི་སློབ་ཐོན་ལས་ཞུགས་ཡིག་ཚད་ནང་། །
གཡུར་ཟའི་གྲུབ་འབྲས་ཐོབ་ནས་ལས་བགོས་སུ། །
རང་ཡུལ་གྲོང་རྡལ་ཞིག་གི་སྨན་ཁང་དུ། །
སྨན་པའི་མིང་ཙམ་འཛིན་ནས་ཉིན་མ་བསྐྱལ། །
གོང་དུ་ཞུས་པའི་རང་གི་ལོ་རྒྱུས་དེ། །
དྲྭ་གྲོགས་རྣམས་ལ་རང་ཉིད་ངོ་སྤྲོད་ཙམ། །
རྩོམ་བྲིས་ཕྱོགས་ལ་སྦྱོང་ཁུལ་བྱེད་ཙམ་ཡིན། །
དེ་ནས་ཁོ་བོས་ལས་ཀའི་བར་གསེང་སྐབས། །
ལེགས་རྩོམ་འོས་སྦྱོར་ཆེད་ལས་བོད་སྨན་སྐོར། །
རང་རྩོམ་ཁྱ་འཁྱོར་སྤེལ་བའི་འདུན་མ་ཡོད། །
འོན་ཀྱང་རྨང་གཞིའི་རིག་གནས་ཞན་དྲག་པས། །
དག་སྙན་སོགས་ཀྱང་དེ་བཞིན་མེད་ངེས་ཤིང་། །
ཤེས་ལྡན་དྲྭ་གྲོགས་རྣམས་པས་དུས་ཐོག་ཏུ། །
བཀའ་སློབ་མང་ཙམ་གནང་བའི་རེ་འདུན་དང་། །
ཐད་ཀར་སྐྱོན་བརྗོད་མང་ཙམ་གནང་བར་རེ། །
