བོད་མོ་དབྱངས་ཆེན་ལགས།

ཆེད་རིམ་སློབ་གྲྭར་འདོན་སྐབས་ཀྱི་དཔའ་ཤོད་བུ་མོ་དེ་ལ་བྲིས། །

ས་རྒྱང་རིང་ཡུལ་དུ་གནས་པའི། །

ཆེས་འགྲོགས་འདྲིས་ཆེ་བའི་བུ་མོ། །

ལོ་ཁ་ཤས་ངོ་འཕྲད་མེད་པས། །

ལུས་གཟུགས་གཞི་བདེ་མོ་ཡིན་ནམ ། །

ས་སྐྱིད་པོ་ཆབ་མདོའི་ཡུལ་ལ། །

སློབ་དགའ་བའི་ལས་རིགས་ལག་རྩལ། །

ཁྱོད་ང ་དང་འདྲ་བའི་ཕོ་མོ། །

ཤེས་རིག་གི་མངར་ཁ་རོལ་ས། །

བྱ་ཁུ་བྱུག་སྔོན་མོའི་གསུངས་སྐད། །

ལྷང་ལྷང་དུ་གྲགས་པའི་ཞོགས་པར། །

ཆར་ཟིམ་ཟིམ་འབབ་པའི་དུས་དེར། །

ཁྱོད་ངེད་གཉིས་ཐོག་མར་ངོ་ཤེས། །

ངོ་ཤེས་ནས་དུས་ཡུན་རིང་པོར། །

ཕྱོགས་སོ་སོའི་མི་གཞི་ཀུན་སྤྱོད། །

རྒྱུན་ལོན་ནས་ཕན་ཚུན་མཐུན་ནས། །

བྲལ་དཀའ་བའི་དགའ་རོགས་གྱུར་སོང་། །

ལོ་གཉིས་ཙམ་མཉམ་གཤིབ་བྱེད་རིང་། །

གནས་ལྔ་རིག་མཉམ་བརྩོན་བྱས་ནས། །

རང་ཉིད་ཀྱི་མ་འོངས་མདུན་ལམ། །

བསུ་བ་ལ་མཉམ་བསྐྱོད་བྱས་ཡོད། །

ངས་ནམ་ཡང་བསམ་གཞིགས་ཐུབ་ཀི །

རོགས་ཁྱོད་ཀྱི་ང་ལ་བཅངས་བའི། །

བརྩེ་དུངས་དེ་ལྷད་མེད་ཡིན་པ། །

ནམ་ཡིན་ཡང་སེམས་ལ་ལྷང་ངེར། །

ཡིན་ན་ཡང་ང་ཡི་ཁྱོད་ལ། །

སེམས་གཏིང་ནས་དགའ་པོ་ཡོད་ཀྱང་། །

དོན་དངོས་ཐོག་གཞན་དང་འདྲ་བའི། །

ཕྱི་ཚུལ་དེ་མ་ཤེས་ལུས་སོང་། །

དུས་ཚོད་ནི་ཆུ་བོ་ནང་བཞིན། །

མདུན་བསྐྱོད་ལས་ཕྱིར་བལྟས་མེད་རྐྱེན། །

ཁྱོད་ངེད་གཉིས་བྲལ་ལ་ཉེ་བས། །

སེམས་ཁོང་ལ་མུན་པ་འཁྲིག་སོང་། །

གནས་སྐབས་ཀྱི་མུན་པའི་ཚུལ་དེ། །

མ་འོངས་པའི་འོད་ཟེར་སྒོམ་ནས། །

ཤེས་རིག་གི་ཐང་ཆེན་དེད་ནས། །

མདུན་བསྐྱོད་ཀྱི་ལམ་ལ་ཆས་ཡོད། །

གནས་སྐབས་ཀྱི་བར་ཆད་ཞིག་གམ། །

ཚེ་སྔོན་གྱི་ལས་དབང་ཞིག་གིས། །

སློབ་ཆེན་ལ་ཚུད་མིན་རྒྱུགས་དེར། །

རེ་ཞིག་ཏུ་ཁྱོད་རྗེས་ལུས་སོང་། །

ཁྱོའི་སེམས་ནང་དྲན་གྱི་འདུག་གམ།

ངས་ཁྱོད་ལ་གང་ཞིག་བཤད་ཀྱང་། །

ངོས་དགའ་དང་མགོ་སྐོར་མི་བྱེད། །

གང་ཐུབ་ཀྱི་བདེན་པའི་ལམ་བསྐྱོད། །

དུས་མི་རིང་ངེད་གཉིས་བྲལ་རན། །

བྲལ་དགོས་པ་འཇིག་རྟེན་ཆོས་ཉིད། །

ཁྱོད་དགའ་བའི་མི་དེ་འཕྲད་ན། །

ང་མ་སྒུག་ཁྱོད་ཀྱི་འདོད་མོས། །

ཕོ་མདོ་མེད་བསྟན་འཛིན་མིང་ཅན། །

རིག་གནས་ཀྱི་རྨང་གཞི་ཞན་པས། །

ལོ་གང་མང་སློབ་སྦྱོང་འདོད་པས། །

ཁྱོས་མ་སྒུག་མདུན་དུ་བསྐྱོད་ཤིག །

ང་སློབ་ཆེན་ལོ་ཤས་སྡོད་རིང་། །

གང་སྦྱོང་བྱའི་རིགས་ལ་མ་གཏོགས། །

དོན་གཞན་ལ་མི་གཡེང་དམ་བཅའ། །

བརྟན་པོ་དེ་མངོན་གྱུར་བྱུང་ཡོད། །

གཤིས་ངང་རྒྱུན་བཟང་བའི་བུ་མོ། །

ས་གང་ཕྱིན་བརྗེད་མྱོང་མེད་ལ། །

ཁྱོའི་འཚོ་བའི་གནས་སྟངས་བདེ་མིན། །

གང་བྱུང་མིན་ཤེས་རྟོགས་བྱུང་སོང་། །

མི་འགའ་ཡིས་ཟེར་སྲོལ་ཞིག་ལ། །

ཁྱོས་གཉེན་སྟོན་ལས་ལ་རོལ་འདུག །

ལུགས་མཐུན་གྱི་འཚོ་བ་སྤྱད་འདུག །

སྔར་བཞིན་དུ་བདེ་ཐང་རེད་འདུག །

ངས་བསམ་བློ་གང་མང་བཏང་ཐལ། །

ཁྱོད་དགའ་བའི་མི་དེར་ཕྲད་ན། །

ང་ཁྱོད་ཚོའི་ཟུར་དེར་བུད་ནས། །

རང་ཉིད་ཀྱི་མདུན་ལམ་བཙལ་འགྲོ །

ངས་མ་བཅོས་སེམས་ཀྱི་སྨོན་ལམ། །

སེམས་ཁུང་གི་རུས་པའི་གཏིང་ནས། །

བཏབས་ཏེ་ཁྱེད་གཉིས་ཀྱི་མི་ཚེ། །

བདེ་སྐྱིད་ཀྱི་དགོད་སྒྲས་ཁེངས་ཤོག །

ང་དགའ་སའི་བུ་མོ་དབྱངས་ཆེན། །

ཁྱོའི་མ་འོངས་མི་ཚེ་རིང་མོར། །

སྐུ་ལུས་ལ་ན་ནད་མེད་ཅིང་། །

སྤྲོ་སྣང་གི་འཚོ་བར་རོལ་སྨོན། །

འདིའི་བཞུག་ད་དུང་དོན་འགའ་ཡོད་མོད་རེ་ཞིག་ངལ་གསོ་བྱས།