གངས་རིའི་དབལ་སོ་བལྟམས་པའི་ཕར་ཕྱོགས་སུ། །
རྫ་སྤང་རི་ཚོམ་འཁྱིལ་བའི་འདབས་རོལ་དུ། །
སྦྲ་ནག་གྲུ་བཞིས་ཕྱུག་པའི་སྤང་ལྗོངས་སུ། །
བདེ་བར་འཚོ་ཞིང་ཨེ་ཡོད་སྲིང་སྡུག་མ། །
ཁ་བ་བུ་ཡུག་འཚུབ་པའི་རི་སུལ་དུ། །
ནོར་ལུག་རི་ལ་བགོ་བའི་ཉིན་སྲིབ་ཏུ། །
རི་སྤྱང་ངུ་ཚག་འདེབས་པའི་ལ་ཀླུང་དུ། །
གཅུང་པོ་ཡིད་ལ་ཨེ་འཁོར་སྲིང་སྡུག་མ། །
ལྕི་རྫིང་འབག་གིས་བརྫིས་པའི་ལྷས་འདབས་སུ། །
འབྲི་མོས་ངུར་སྒྲ་སྒྲོག་པའི་སྦྲ་འདབས་ན། །
འོ་ཇའི་རླངས་པ་འཐུལ་བའི་གོ་ཁ་ནས། །
གཅུང་པོ་ཡིད་ལ་ཨེ་འཁོར་སྲིང་སྡུག་མ། །
ཆུ་བོ་དར་ཁ་འགྲིག་པའི་དགུན་དུས་སུ། །
ཁྲུང་ཁྲུང་ལྷོ་རུ་གཞུད་པའི་ནམ་དུས་སུ། །
རི་ཀླུང་དངུལ་སྐུས་བརྒྱན་པའི་ས་སྲོད་དུ། །
གཅུང་པོ་ཡིད་ལ་ཨེ་འཁོར་སྲིང་སྡུག་མ། །
མཆོད་མེས་མདོ་སྦུག་གསལ་བའི་ཁྱིམ་གཞི་ན། །
འདྲེ་སྒྲུང་གནའ་གཏམ་གླེང་བའི་མཚན་དཀྱིལ་དུ། །
ཨ་མས་འཕྲེང་གོག་བགྲང་བའི་པང་ཁུག་ཏུ། །
གཅུང་པོ་ཡིད་ལ་ཨེ་དྲན་སྲིང་སྡུག་མ། །
རྩིག་ཆུང་ཞིག་རལ་སོང་བའི་རྩེད་ར་ན། །
རྡོ་ཀོང་ཕོར་པ་བཟོས་པའི་རྩེད་ཁྱིམ་དུ། །
སྣང་བ་རྒྱ་ཡན་བཏང་བའི་ལོ་ཟླ་རུ། །
གཅུང་པོ་ཡིད་ལ་ཨེ་འཁོར་སྲིང་སྡུག་མ། །
རི་ཆེན་དགུ་ཕྲེང་བལྟམས་པའི་ཚུར་རོལ་ནས། །
ལོངས་སྤྱོད་མངའ་ཐང་རྒྱས་པའི་ནུབ་གླིང་ནས། །
ཁོམ་མེད་འདུ་འཛི་རྒོད་པའི་གྲོང་ཁྱེར་ནས། །
ཁྱེད་ཉིད་ཡིད་ལ་འཁོར་གྱི་སྲིང་སྡུག་མ། །
རྨི་ལམ་འཇའ་ཚོན་བཀྲ་བའི་མདང་ནུབ་ཏུ། །
ཁེར་རྐྱང་གཉིད་དུ་ཡོལ་བའི་སྔས་འགྲམ་དུ། །
ཞི་འཇམ་བཞིན་རས་མཇལ་བའི་ཚོར་སྣེ་རུ། །
གཅུང་པོས་དྲན་གླུ་ཤོར་ཐལ་སྲིང་སྡུག་མ། །
ཞེས་རྩོམ་ཐུང་འདི་རྨི་ལམ་ཞིག་གིས་རྐྱེན་བྱས་ཏེ་ལོ་མང་རིང་མ་མཇལ་བའི་སྲིང་མོ་ཚེ་སྒྲོན་ལགས་སུ་གཅུང་འོད་རྒྱལ་པས་ཕྱི་ལོ ༢༠༡༡ ཟླ་ ༩ ཚེས ༥ ཉིན་ནུབ་གླིང་འབྲས་ལྡན་གྲོང་དུ་བྲིས།། །།
- ཟིན་ཐོ་གོང་མ།ཏྲི་ཤུལ་སྐོར་ལ་ཐོག་མར་དཔྱད་པ།
- ཟིན་ཐོ་འོག་མ།ཁྱེད་ཀྱིས་མེས་པོའི་ཤུལ་བཞག་གླེང་ཨེ་ཤེས།
བཀླགས་ཟིན།
ཞག་ཤས་མ་མཇལ་རིང་སྐུ་ཁམས་བདེ་ལགས་སམ།
ལྷ་གཡག་དར་མས
ཁྱུང་དཀར་ཟླ་བ་ལགས་ཕེབས་ནས་ལེགས་འདེམས་གནང་བར་ཐུགས་རྗེ་ཆེ།