ཐ་ཚིག་གི་ཀློང་དུ་ཞུགས་པའི་སྒུལ་ཤུགས་ཀྱི་སྐན་སྒྲ།
མི་དང་སྙན་ངག་བར་གྱི་ཁ་བརྡ།
གཅིག༽
སྙན་ངག་ལ་ཚད་གཞི་མེད། ཚད་གཞི་ཡོད་པའི་སྙན་ངག་གཅིག་ཡོད་ཚེ་དེ་ནི་སྙན་ངག་མིན། མཁས་པ་༼དུང་དཀར་སོགས་༽འགའ་ཤས་ཤིག་གིས་སྙན་ངག་ལ་ཚད་གཞི་འགའ་རེ་བཞག་ཡོད་མོད་དེ་ནི་སྐད་ཆའི་ཁྲོད་ཀྱི་སྙིགས་རོ་རེད། མིའི་ཚོར་འདུ་དང་རིག་པ་ལ་མཐའ་མེད་པས་སྙན་ངག་ལ་ཡང་མཐའ་མེད་དོ། །
གཉིས།༽
མི་སུ་ཡིན་རུང་རང་ལ་སྐད་དང་ཡི་གེ་ཡོད་ལ་སྙན་ངག་ཀྱང་ཡོད། སྙན་ངག་གི་བློ་སྦྱོང་ཐོག་མའི་བསམ་བློ་དང་འདུ་ཤེས་དེ་ལད་ཟློས་སུ་ཞུགས་ཚེ་གང་གི་དྲི་མས་མ་གོས་པའི་རིག་པ་གསར་བ་དེ་སྙོགས་ཆུས་བསླད་པའི་པདྨ་དང་འདྲ་བས་ལད་ཟློས་ཀྱི་ལམ་དུ་སློང་བའི་གེགས་རྐྱེན་དེ་ནམ་ཡང་འགས་གཏོར་བྱེད་དགོས།
གསུམ།༽
སྙན་ངག་སློབ་པའི་ལས་དང་པོ་བ་ཞིག་ཡིན་ཚེ་རང་རང་གི་སྐད་བརྡ་ལ་བྱང་བའི་སྒོ་ནས་སེམས་ཀྱི་འགྱུ་བ་རྣོན་པོ་ཏམྦུ་རའི་རོལ་དབྱངས་སུ་འདྲེན་ཐུབ་ཚེ་སྙན་ངག་ཏུ་གསར་རྩོམ་ཡོད་ལ་སྒུལ་ཤུགས་ཀྱང་མངའ།
བཞི།༽
ཞིབ་ཏུ་བསམ་ན་མེ་ལོང་མ་ནི་སྙན་ངག་སློབ་པའི་ལས་དང་པོ་བ་ཞིག་གི་རིག་པའི་གསོས་སྨན་མ་ཡིན་ལ་དྭངས་གཙང་ལྷད་མེད་ཀྱི་རིག་པ་གསར་བའི་དགྲ་བོ་རེད། སྙན་གཞུང་ནང་གི་རྒྱན་ཚོགས་ཀྱི་དྭོགས་གཅོད་མི་ཤེས་པའི་དགེ་རྒན་༼ད་སྐབས་སྙན་གཞུང་འཁྲིད་མཁན་ཡིན་ཟེར་བའི་དགེ་རྒན་གྱི་གཟུགས་སུ་འཛིན་པ་ཚོ། ང་ཡང་དེའི་གྲས་སུ་ཐེ་མྱོང་༽ནི་སྙན་ངག་སློབ་པའི་ལས་དང་པོ་བའི་རིག་པ་དྭངས་མའི་ངར་སོ་བཅོམ་པའི་གཤེད་མ་རེད།
ལྔ༽
ཕ་སྐད་གཙང་མ་ཞིག་ཡིན་ཚེ་གྲོང་སྐད་ཡིན་ཡང་སྙན་ངག་གྲུབ་བྱེད་ཀྱི་ཚིག་རྒྱན་དུ་འགྲོ་ལ། ཆོས་དང་འཇིག་རྟེན་གང་ཡིན་ཡང་སྙན་ངག་དམ་པའི་བརྗོད་བྱ་རུ་ཅི་ལ་མི་འགྲོ། ཕྱོགས་ཁྱེར་གྱི་ལྟ་བས་བཀག་རྒྱ་བཟོས་པ་ལས་སྙན་ངག་རང་གི་ཁ་ཕྱོགས་སུ་འགྲོ་དང་མི་འགྲོ་བའི་སྣང་ཚུལ་མེད།
དྲུག༽
ལེགས་བཤད་དང་ཆབ་ཤོག་གསར་སློབ་པའི་འོས་འགན་མིན། སྙན་ངག་གི་ཁོ་ལག་དང་སྙན་ངག་གི་སྟོབས་ཤུགས་དར་བའི་འཕེལ་རྒྱས་ཀྱི་བར་ལམ་ནས་ལེགས་བཤད་གྲུབ་ལ་ཆབ་ཤོག་ཀྱང་བྱུང་ཆོག རིག་པ་གསར་བའི་རིན་ཐང་ལ་སུས་ཀྱང་གཅེས་སྐྱོང་དང་བརྩི་འཇོག་བྱེད་ནས་མདུན་བསྐྱོད་ཀྱི་སྒུལ་ཤུགས་ནམ་ཡང་ཆག་གྲུམ་གྱི་གཡང་ནས་འདེགས་ཐུབ་ཚེ། ང་ཚོའི་ཐོབ་སྐར་ལང་ཚོའི་ཟུངས་ཁྲག་དྲོན་མོའི་ཐོབ་སྐར་རེད།
བདུན།༽
དཔྱད་ཤེས་ན་སྙན་ངག་གི་ལམ་བུ་འདི་འོད་ཀྱིས་བཀྱག་པའི་ལམ་བུ་རེད། སྙན་ངག་གི་རྩོམ་ལུས་ལ་ཁྱད་པར་མེད། ཚིགས་བཅད་ཡིན་ན་ལེགས་པའི་སྙན་ངག་ཞིག་ཡིན་པའི་ངེས་པ་དང་། ཚིག་བར་མི་མཉམ་པ་ཡིན་ན་མི་ལེགས་པའི་སྙན་ངག་ཞིག་ཡིན་པའི་ཁ་ཚོན་སུ་ཞིག་གིས་གཅོད། དེ་འདྲར་བྱེད་ཕོད་པ་ནི་གླེན་པ་རེད།
བརྒྱད།༽
སྙན་ངག ཐ་སྙད་ཀྱི་ཀློང་ན་ཚོར་སྣང་གི་དབྱངས་རྟ་ཞིག་དང་ལྷན་དུ་བསྐྱོད། སྙན་ངག སྨྲེ་ངག་དང་ངུ་འབོད་ཀྱི་གདུང་གླུའི་བར་ན་སྐྱོ་ཞིང་འཁྱོར། དྲན་གཞས་ཀྱིས་བརྒྱུས་ལ། བསྟོད་དབྱངས་ཀྱིས་བཀྱགས། སུ་ཞིག་གི་བར་སྣང་ཁམས་ན། གང་ཞིག་གི་སྟོང་བའི་ཀློང་ན། ངོ་ཚ་དང་འཛེམ་བག་མེད་པར་ལྷོད་ཀྱིས་འོང་བ་ནི། སྙན་ངག ང་རྒྱལ་དང་སྟོབས་ཤུགས་ཀྱིས་འཚོ་ཞིང་འོང་བ་ནི་སྙན་ངག་གོ།
དགུ།༽
འདི་ནི། མི་དང་རང་བྱུང་ཁམས་སྙན་ངག་གི་མཚོན་ཐབས་ཀྱི་རིགས་སུ་གྲུབ་པའི་མི་གཤིས་ཀྱི་རྐན་སྒྲ་ཙམ། འདི་ནི། བསམ་བློ་དང་དགག་སྒྲུབ་ཀྱི་སྒུལ་ཤུགས་ལས་འཕྲོས་པའི་སྙིགས་རོ་བསྲེག་པའི་མེ་དཔུང་དམར་པོ། ནམ་ཡང་མི་འདོད་པའི་བྱ་ངན་གྱི་གདོང་འབག་མི་རབས་ནས་མི་རབས་བར་དུ་བཅོམ་གཏོར་བྱའོ། །
༢༠༠༩ལོའི་ཟླ་༤ཚེས་༥ཉིན་ཁྲི་བློ་རྩེ་རུ་འབོད་པས་ཨ་མདོ་རྔ་བ་རུ་བྲིས།
