བོན་གྱི་གོད་ཆག་ལས་འཕྲོས་པའི་བོད་ཀྱི་བརྡབས་གསིགས།
སྟོན་པ་གཤེན་རབ་ཐར་བའི་འདྲེན་པ་མཆོག།
ཤྰཀྱ་མུ་ནེ་རྩེ་གཅིག་དད་པའི་ཡུལ།།
རང་སེམས་དག་ན་ཀུན་ཀྱང་དཀོན་པའི་མཆོག།
འདི་བཞིན་སྣང་ན་བསྟན་འཛིན་སྐྱེས་བུ་ལགས།།
སེམས་འདི་དང་པོ་མ་རིག་གདོན་གྱིས་བཟུང་།།
བར་དུ་གྲུབ་མཐའི་ཕྱོགས་ཞེན་ཕྱི་རུ་མངོན།།
མཐའ་མར་གཞན་བསྟན་གཏོར་ཞིང་རང་རྒྱུད་ཚིག།
འདི་ནི་ཆོས་པ་འགའ་ཡི་གཟུགས་བརྙན་ལགས།།
ཐུབ་པའི་བསྟན་ལ་མཁན་སློབ་ཆོས་གསུམ་དད།།
དད་པའི་རྐྱེན་གྱིས་གྱེར་སྒོ་ཀུན་ཀྱང་བརླགས།།
བརླགས་པའི་ཤུལ་དུ་སེམས་ཅན་ལས་སྨོན་དབང་།།
དབང་གིས་བོན་བསྟན་ཉི་གཞོན་སླར་ཡང་བཞད།།
བརྡོལ་འཁྱར་བསྒྱུར་གསུམ་བོན་གྱི་གཞུང་ན་མེད།།
སྐྱོབ་པ་མགོན་པོས་རྫུན་གྱི་ཕུང་པོ་བརྩེགས།།
གཞི་ལམ་འབྲས་བུའི་ཐེག་སྒོ་ཀུན་ཀྱང་ཕྱེ།།
དབུ་སེམས་སྔགས་རྫོགས་གཤེན་བསྟན་ཁོ་ན་ལགས།།
འགྲོ་མགོན་འཕགས་པའི་སློབ་མ་གྲྭ་ཆེན་བཞིས།།
མདོ་སྨད་ཕྱོགས་ཀྱི་བོན་བསྟན་སྟབས་གཅིག་བརླགས།།
ཞིབ་ཏུ་བསམ་ན་ཆགས་སྡང་མེ་ལྕེ་འདི།།
འདོད་རྔམ་ཧམ་སེམས་ཁྲོད་ནས་འབར་མིན་ནམ།།
ཆོས་རྗེ་དོན་གྲུབ་ཉིད་ཀྱི་མཐུ་སྔགས་ལས།།
བོན་གྱོང་བྱ་བའི་མིང་གི་རྡོ་རིང་བཙུགས།།
བྲག་དམར་བྱ་ཁྱུང་ཡངས་པའི་ཐེམ་ཀ་ནས།།
གཤེན་གྱི་བསྟན་པ་མིང་གི་ལྷག་མར་གནས།།
གཤེན་རབ་སྟོན་པ་ལོའུ་ཀྱུན་ཡིན་ཞེས་གསུངས།།
ཀོང་ཙེ་འཕྲུལ་རྒྱལ་ཁུང་ཕུ་ཙི་རུ་བཞེད།།
ལྕང་སྐྱའི་སྒྲོ་འདོགས་ཚིག་གི་མདའ་མོ་དེས།།
དྲང་པོའི་ལོ་རྒྱུས་མ་རྨས་གསོན་པོར་གྲུབ།།
བོན་གྱི་གནས་ཆེན་གཡུང་དྲུང་ལྷ་སྡིངས་མཆོག།
གྱེར་སྒོ་འཛོམ་པའི་ཉི་ཟླ་ཆ་གཅིག་ལགས།།
རོལ་བའི་རྡོ་རྗེ་ཉིད་ཀྱི་ཟློས་གར་གྱིས།།
གསལ་བའི་སྣང་བ་ནུབ་རིའི་ཕག་ཏུ་བརྫངས།།
ཀོང་ཙེས་བཞེངས་པའི་གཤེན་རབ་སྐུ་བརྙན་ཞིག།
རྨ་ཆུའི་འགྲམ་ན་གཟི་བྱིན་འོད་དུ་འཚེར།།
ཀུན་དགའ་རྣམ་སྲས་མཆོག་གི་སྒྱུ་འཕྲུལ་ལས།།
གཙུག་ཏོར་བཀབ་ནས་བྱམས་སྐུའི་རྣམ་པར་བསྒྱུར།།
བརྗོད་ན་ཐུབ་པའི་གཞུང་ན་མང་ཡོད་གསུངས་།།
ཐོས་པ་དཔྱད་ན་ཐེག་ཆེན་བཀའ་མེད་ཟེར།།
ཀླུ་སྒྲུབ་བདུད་ཀྱི་སྤྲུལ་བ་མ་ཡིན་ལ།།
ཐེག་ཆེན་བཀའ་འབུམ་ཀླུ་ཡི་ཡུལ་ནས་དྲངས།།
མོ་རྩིས་གཏོ་གསུམ་ངན་པར་སྨོད་ཀྱང་རུང་།།
གཡང་ལེན་གཡང་འགུགས་བཟང་པོར་བགྲང་ཡང་ཆོག།
འདི་ནི་གཤེན་རབ་སྟོན་པའི་གཞུང་ལགས་ཀྱང་།།
ཐུབ་པའི་གཞུང་དང་གཞུང་གཞན་བཟུང་བར་གྲགས།།
པད་འབྱུང་ཤྰཀ་ཐུབ་བསྣོལ་བའི་གདན་སྟེང་ན།།
ཁྲོ་བོའི་རྒྱལ་བོ་སྟག་ལ་མེ་འབར་བཞེངས།།
ཞེས་པའི་ཚིག་དང་བསྐུར་འདེབས་འཆལ་གཏམ་འགའ།།
མི་སེམས་ཚལ་བར་གཤེགས་པའི་མཚོན་ཆ་ཉིད།།
བོན་པོ་ལྟ་བ་གང་ཡང་ལོག་མེད་ཀྱང་།།
ལྟ་ལོག་བོན་པོའི་མགོ་ལ་ཚལ་མདའ་རྒྱོབས།།
ཞེས་སོགས་ཕྱོགས་ཞེན་ཕྱོགས་སུ་ལྷུང་བའི་ཚིག།
ཕྱི་རུ་མངོན་པ་ཐེངས་གཅིག་མ་ཡིན་ནོ།།
སྲོང་བཙན་སྔོན་དུ་བོད་ཡུལ་མུན་པའི་གླིང་།།
ཞེས་པའི་གཏམ་འདི་ཀུན་ལ་འུད་པོ་ཆེ།།
གསལ་བྱེད་སུམ་ཅུ་ཐོན་མིས་གསར་གཏོད་མཛད།།
ཅེས་པ་དེ་ཡིས་ཡང་སྙིང་ཅི་ཞིག་མཚོན།།
བོན་འདི་བརླགས་ན་བོད་འདི་གཏོར་དང་མཚུངས།།
བོད་ཀྱི་རིག་གནས་ཕྱི་མོ་བོན་ལགས་པས།།
བོད་དང་བོན་གཉིས་ངོ་བོ་གཅིག་ཏུ་གྲུབ།།
བོན་བོད་དབྱེ་འབྱེད་ངལ་བའི་རྒྱུར་ཟད་དོ།།
༢༠༡༢, ༨, ༥ ཉིན་བྲིས།
༢༠༡༢ ལོའི༼དཔྱོད་ལྡན་མཆོད་པའི་མེ་ཏོག༽སྤྱིའི་དེབ་ཕྲེང་དགུ་བ་ལས་བཏུས།
