སྐྱོ་གདུང་གི་འབོད་པ།

---གྲོགས་ཁྲི་འཇམ་ལགས་རྗེས་སུ་དྲན་པ།

༡

སྨྱུག་གྲོགས་ལགས། ཁྱོད་གཤེགས་རྗེས།

ངས། འཇིག་རྟེན་ཞིག་ལ་ཡང་སྙིང་མེད་པ་ཚོར་ཞིང་།

ཁོར་ཡུག་ཅིག་ལ། འོད་སྣང་དང་བཀྲག་མདངས་མེད་པ་རྟོགས།

དེའི་རྐྱེན་པས། འཁོར་བ་ནི་མ་གཞི་སྡུག་བསྔལ་གྱི་གཞི་མ་རུ་ཤེས།

༢

སྨྱུག་གྲོགས་ལགས། སྐྱོ་གདུང་ལ་ཟད་མཐའ་མེད་ལ།

འབོད་པ་ལ་དྲན་སྣང་གི་ཟིལ་ཤུགས་ལྕི་བས།

དོ་ནུབ། ངས། ཁྱོད་ཀྱི་འདས་སོང་གི་ལོ་ཟླ་དྲན།

ཁྱོད་ཀྱི་མི་ཚེ་ནི་ལྷ་རིས་སྒྱུ་རྩལ་གྱིས་འཚོ་ཞིང་།

ཁྱེད་ཀྱི་ལང་ཚོ་ནི་ངག་རིག་མེ་ཏོག་གིས་བརྒྱན་པས།

ཁྱེད་ལ་ལྡན་པ་ནི། གསེར་མདོག་གི་དུས་ཚིགས་ཤིག

༣

སྨྱུག་གྲོགས་ལགས། མོག་མོག་གི་མཚན་མོ་འདི་ལ།

ང་གང་ལ་སོང་ཡང་། ང་གང་ནས་བསྡད་ཀྱང་།

ཁྱེད་ཀྱི་ལང་ཚོ་དང་། ཕུགས་བསམ་བརྗེད་རྒྱུ་མ་བྱུང་བས།

སྐྱོ་གདུང་མིག་ཆུ། ཁེར་རྐྱང་གི་ཀློང་དུ་སིམས་ཤིང་།

རེ་འབོད་ཀྱི་སྙིང་གཏམ། དྲན་སྣང་གི་དབྱིངས་ན་འཐོར།

༤

སྨྱུག་གྲོགས་ལགས། ང་ཚོ་ལ་ཕྱི་མིག་ཅིག་གཟིགས་རོགས།

ཕ་ཡུལ་ན་རྟེན་མེད་དུ་ལུས་པ་ནི།

ཁྱེད་ཀྱི་ལྷག་བསམ་འོ་མཚོའི་ཀློང་ནས་བརྡོལ་བའི།

རྩོམ་རིག་གི་སྐྱེད་ཚལ་ཏེ༼ཞིང་གྲོང་གི་འགྱུར་ཁུགས༽ཡིན་ལ།

ད་དུང་། གཤོག་རྩལ་མ་རྫོགས་པའི་གླག་ཕྲུག་དེ་དག་གི་ཕྱིར་དུ།

ང་དང་ང་ཚོའི་མགོན་དུ་བྱོན་རོགས། སྨྱུག་གྲོགས་ལགས།

༢༠༠༥,༥,༥ཉིན་རྔ་བ་ནས་བྲིས།