གདོད་མའི་ཤེས་རིག་དང་ཤེས་རིག་གི་འབྱུང་འགྱུར་གླེང་བ།
གདོད་མའི་བོད་ཡུལ་གྱི་དུས་སྐབས།
དེ་ཡང་རང་རེའི་བོད་མི་རིགས་འདི་གདོད་མ་ནས་འཚོ་ཞིང་མཐོ་སྒང་གི་ཡུལ་ལུང་ཀུན་ཏུ་གནས་པ་བྱུང་ཐུབ་པ་ནི་ཁོ་ཚོ་ལ་ཐུན་མོངས་མ་ཡིན་པའི་ཤེས་རིག་གི་སྟོབས་ཤུགས་དང་སྟོབས་ཤུགས་ལས་འཕྲོས་པའི་བླ་མེད་ཀྱི་ཕུགས་འདུན་ཡོད་པས་མ་ཡིན་ནམ།གདོད་མའི་དུས་སྐབས་སུ་བོད་ཀྱི་ཡུལ་ཁམས་ཡང་དེ་འདྲ་ཆེ་རྒྱུ་མེད་ལ་ཆུང་བའི་ས་ཁམས་ནས་རང་ཉིད་ཀྱི་བློ་གྲོས་ལ་བརྟེན་ནས་རང་ཉིད་ཀྱི་འདུག་ཁང་ནས་མགོ་བརྩམས་ཏེ་ཟས་གོས་ལག་ཆ་སོགས་བཟོ་སྐྲུན་བྱས་ནས་རང་ཉིད་ཀྱི་མཐའ་གཞི་སྲུང་བ་རེད།
དེ་དུས་ཀྱི་བོད་མའི་བློ་གྲོས་ནི་རང་ཉིད་ཀྱི་བློ་གྲོས་ཡིན་པ་ལས་ཐུན་མོངས་ཀྱི་བློ་གྲོས་ཤིག་གི་ཉིང་བཅུད་ལས་བསྐྱེད་པ་ག་ལ་ཡིན།དེ་དུས་ཤེས་རིག་དར་རྒྱས་མི་ཆེ་ན་ཡང་ཤེས་རིག་ཅིག་ཡོད་པ་དེ་རང་ཉིད་ཀྱི་སྟོབས་ལ་བརྟེན་ནས་བྱུང་བ་ཡིན་པ་བསྙོན་འདང་མི་དགོས་པ་ཞིག་རེད།དེ་དུས་བོད་ཡུལ་གྱི་ཆོས་ལུགས་སྤྱོད་སྒོ་ཡང་དེ་འདྲ་ཕུན་སུམ་ཚོགས་པ་ཞིག་གང་ནས་ཡིན།རང་རང་གི་དགོས་མཁོ་ལྟར་ལྷ་མ་ཡིན་དང་།བདུད།བཙན།ཀླུ།ས་བདག་སོགས་ལ་ཤ་ཁྲག་དམར་གྱི་མཆོད་པ་སྣ་ཚོགས་བྱེད་ནས་དེ་ཚོའི་སྡོངས་གྲོགས་ཙམ་ལ་རེ།
དེང་སྐབས་ད་རུང་འདིའི་སྲོལ་མ་ཉམས་པར་སྡེ་བ་སོ་སོའི་སྡེ་འཁྲུགས་ཀྱི་སྐབས་སུ་ར་ལུག་གསུར་དུ་ཕུད་པ་སོགས་མཐོང་རྒྱུ་ཡོད་པ་འདི་མངོན་སུམ་རེད།སྡིག་སྤྱོད་འདི་དག་རྗེས་སུ་འཛིན་པའི་ཕྱིར་དུ་རྒྱལ་བ་སངས་རྒྱས་ཀྱི་མཆོག་བོན་གྱི་སྟོན་པ་གཤེན་རབ་མི་བོ་བོད་ཡུལ་དུ་བྱོན་ནས་འགྲོ་བ་རྣམས་ལ་སྡིག་སྤྱོད་སྤངས་སུ་བཅུག་པ་དང་བོན་བསྟན་ལས་རྒྱུའི་བོན་དར་སྤེལ་བྱེད་པའི་བརྒྱུད་རིམ་བྱུང་།མི་ཁ་ཤས་ཤིག་གིས་འདིའི་གནས་བབས་མ་རྟོགས་པའི་སྒོ་ནས་ཤ་ཁྲག་དམར་མཆོད་བྱེད་པ་དེ་གཡུང་དྲུང་གི་བོན་སྤྱོད་པའི་བོན་པོ་རྣམས་ཀྱི་མགོ་ལ་དཀྲིས་ནས་རང་བསྟན་དག་འདོན་ལྟ་བུ་བྱེད་བཞིན་ཡོད།ལོ་རྒྱུས་ཀྱིས་ང་ཚོ་ལ་གསལ་བཤད་མང་པོ་ཞིག་བྱས་ཡོད་འདུག་གོ།
བོད་རྒྱལ་དུས་སྐབས་དང་དུས་སྐབས་མ་ཡིན་པའི་
ཤེས་རིག
བོད་རྒྱལ་ཐོག་མ་གཉའ་ཁྲི་བཙན་པོའི་སྐབས་ནས་བཟུང་ཞང་ཞུང་གི་བོན་གཤེན་རྣམས་དང་འབྲེལ་བ་དམ་ཟབ་དགོས་ཞང་ཞུང་གི་ཤེས་རིག་གམ་སྟོན་པ་གཤེན་རབ་ཀྱི་ཤེས་རིག་བསྒྱུར་སྤེལ་བྱས་ནས་རིག་པའི་གནས་ཆེན་ལྔ་དང་ཐེག་པ་རིམ་དགུའི་ཤེས་རིག་ཕུན་སུམ་ཚོགས་པ་འདི་བྱུང་བ་རེད།འདི་ཡང་སྐུ་གཤེན་རྣམས་ཀྱིས་རྒྱུན་འཛིན་དང་དར་སྤེལ་ལས་བྱུང་བ་ཡིན་ལ་དེ་དག་གི་སྐུ་དྲིན་མིན་རྒྱུ་ན།ང་ཚོས་བཀོད་སྤྱོད་བྱེད་པའི་ཕུན་སུམ་ཚོགས་པའི་རིག་གནས་འདི་ཅི་ལྟར་བྱུང་།དེའི་སྟབས་ཀྱིས་བཟོ་རིག་དང་གསོ་རིགསྒྲ་ཚད་རིག་པ།ཕྱི་རིགནང་རིག་སོགས་ཀྱི་སྤྱོད་སྒོ་ཡང་གཅིག་ལས་གཅིག་ལྷག་གི་དར་སྤེལ་ཆེན་པོ་བྱུང་བའི་ལོ་རྒྱུས་དངོམ་ཆེ་བ་ཞིག་ཡོད།
ནང་རིག་ལྟ་བུ་ཞིག་ལ་མཚོན་ན་བོད་རྒྱལ་གཉའ་ཁྲི་ནས་བཟུང་མདོ་འབུམ་རྒྱུད་མཛོད་བཞིའི་བོན་སྒོ་ཡོད་ཚད་ཕྱོགས་སུ་ཁྱབ་བརྡལ་དུ་སོང་བར་མ་ཟད་སེམས་ཕྱོགས་ཉམས་ལེན་གྱི་གཙོ་བོར་བཟུང་ནས་ཁྲི་བདུན་གྱི་ཕུང་པོ་ལྷག་མེད་དུ་གྲོལ་བ་རེད།ཕྱི་རིག་ལྟ་བུ་ཞིག་ལ་མཚོན་ན་རྟེན་ཕྱི་སྣོད་ཀྱི་འཇིག་རྟེན་དང་བརྟེན་པ་ནང་བཅུད་ཀྱི་སེམས་ཅན་གྲོལ་ཚུལ་སོགས་གསལ་བྱེད་མེ་ལོང་ལྟ་བུའི་འབུམ་གསུམ༼སྣང་སྲིད་གཏོ་འབུམ་ནག་པོ།རིན་ཆེན་ཀུན་འབུམ་ཁྲ་བོ།གཙུག་ལག་དཔལ་འབུམ་དཀར་པོ།༽ལས་ས་ཁམས་དང་བཅུད་ཁམས་སོ་སོར་ངེས།སྒྲ་ཚད་རིག་པ་ལྟ་བུ་ལ་མཚོན་ན་སྒྲ་ཚད་ཀྱི་འབུམ༼ལྷ་སྲིན་གྱི་འཁྲུག་འབུམ་ནག་པོ།སྒྲ་ཚད་ཀྱི་རྩོད་འབུམ་ཁྲ་བོ།དག་པའི་ཀླུ་འབུམ་དཀར་པོ།༽གསུམ་དང་ཚད་མ་སྡེ་བདུན་གྱི་རིགས་ལམ་དར་ཞིང་རྒྱ་གར་ཡུལ་གྱི་ཕྱི་རོལ་བ་ཕམ་པར་མཛད་པའི་རིགས་ཤེས་ཀྱི་ཡང་སྙིང་དེ་འདི་ལ་ཐུག་པ་འབྱུང་འགྱུར་གྱི་ཐབས་ལམ་ལས་ཤེས་ཐུབ།གསོ་རིག་ལྟ་བུ་ལ་མཚོན་ན་གསོ་རིག་འབུམ་བཞི༼གསོ་རིག་རྩ་བ་ཐུགས་འབུམ་མཁའ་སྔོན།སྡུག་བསྔལ་ཞི་བྱེད་གསོ་བྱེད་སྨན་འབུམ་དཀར་པོ།སྡུག་བསྔལ་ཞི་བྱེད་གསོ་ཐབས་དཔྱད་འབུམ་ཁྲ་བོ།སྡུག་བསྔལ་ཞི་བྱེད་གསོ་བྱའི་ནད་འབུམ་ནག་པོ།༽དར་རྒྱས་བྱུང་བ་ལ་བརྟེན་ནས་སྟག་རི་གཉན་གཟིགས་མིག་ལོང་ཡིན་ཡང་གསོ་བའི་ཐབས་ཤེས་ཡོད་པ་དེ་ཞང་ཞུང་རིག་གནས་ཀྱི་རྩ་བ་ཚུགས་ཤིང་རྩེ་མོ་རྒྱས་པའི་རྟགས་སུ་ཆེ་བ་དཔྱོད་ཤེས་ཀྱིས་གྲུབ་འདུགབཟོ་རིག་ལྟ་བུ་ལ་མཚོན་ན་དང་པོར་གཏན་ལ་ཕབས་ཏེ་བཟོ་རིག་གི་འབུམ་གསུམ༼བསྐལ་བ་སྣང་སྲིད་འཁོར་ལོའི་འབུམ།སྲིད་པ་མིའུ་རྒྱུད་ཀྱི་འབུམ།འབྱུང་བ་ཆགས་འཇིག་སྟོང་གི་འབུམ།༽ལ་བརྟེན་ནས་བཟོ་བྱའི་ཡུལ་ལ་མཁས་པ་མང་པོ་བྱུང་བས་གསས་ཁང་ལ་སོགས་འཇིག་རྟེན་སྟེང་གི་ཁྱད་ནོར་དུ་གྱུར་བ་མང་པོ་བྱུང་བའི་བརྒྱུད་རིམ་ཤུགས་ཆེར་དར།
ཤེས་རིག་འདི་རྣམས་ཀྱི་རྨང་རྡོ་དེ་ཤེས་བྱ་ཀློང་བརྡོལ་བོན་གྱི་སྟོན་པ་གཤེན་རབ་ཀྱི་རིག་གཞུང་ལས་འཕྲོས་པ་ཡིན་ལ་ཞང་ཞུང་ས་གནས་ནས་དར་བའི་ཤེས་རིག་དང་ཤེས་རིག་གི་འབྱུང་འགྱུར་ཡང་ཡིན།མདོར་དྲིལ་ན་བོད་ཀྱི་ཤེས་རིག་ནི་བོན་གྱི་ཤེས་རིག་དང་ཞང་ཞུང་གི་ཤེས་རིག་ལས་གཞན་མེད་ཅེས་ཁ་ཚོན་བཅད་ཆོག་པར་འདོད།རྒྱུ་མཚན་ཤེས་རིག་གང་ཞིག་བདེན་དངོས་ཀྱི་སྒོ་ནས་གླེང་ན་བོན་ནམ་ཞང་ཞུང་གི་ཤེས་རིག་ཅིག་མ་གླེང་ཐབས་མེད་ཡིན་པས་རེད།
གདོད་མའི་ཤེས་རིག་དང་ཤེས་རིག་ལ་བཅིངས་པའི་ཁ་ཕྱོགས།
གདོད་མའི་ཤེས་རིག་འདི་ལྟར་འོངས་ཤིང་འདི་ལ་བཅིངས་པའི་ཁ་ཕྱོགས་གཏོར་བཤིགབཅིངས་གྲོལ།གསར་བརྗེ།ངོ་རྒོད།འདི་ལྟར་བྱེད་དུས་བོད་མིའི་ཤེས་རིག་ཚར་ཟིན་པ་ཡིན་ལ་བོད་མི་ཡང་རྫོགས་ཟིན་པ་རེད།བོད་མི་འདི་མེད་པར་བཟོ་འདོད་ན་སྐད་དང་ཤེས་རིག་ཟད་དགོས་ལ་སྐད་དང་ཤེས་རིག་ཟད་རྗེས་བོད་མི་བྱེ་རླུང་ཁྲོད་ཀྱི་རྐང་རྗེས་རེད།
བོད་མིའི་ཤེས་རིག་ལ་ལྟ་ཤེས་ན་ལྷ་ཆོས་བསྒྲུབས་ནུས་ལ་མི་ཆོས་ཡང་སྤྱོད་ནུས་པས་ཡིད་བཞིན་གྱི་ནོར་བུ་དེ་དེ་ལས་གཞན་ཞིག་མ་རེད།ནོར་བུ་བཀོད་སྤྱོད་བྱེད་ཐུབ་མིན་འུ་ཚོ་ལ་རགས་ལས་པས་ང་ཚོས་མཉམ་དུ་སྟོབས་ཤུགས་གཅིག་སྒྲིལ་གྱི་རང་རང་གི་ཁ་ཕྱོགས་བརྩོན་ལེན་བྱེད།མེས་པོ་སྐོར་ཞིག་ལ་དྲན་རྒྱུ་མང་དྲགས་པས་ང་ཚོ་ལ་གནས་བབ་འདི་བྱུང་བ་ཡིན་ལ་ང་ཚོ་ལ་ཡང་དྲན་རྒྱུ་མང་དྲགས་ན་སྤྲེལ་གྱིས་རི་བོང་བདས་པའི་གཏམ་རྒྱུད་དུ་མི་འགྲོ་བའི་ཉེན་ཁ་ཅི་ལ་མེད།ཉེན་ཁའི་གནས་སུ་ལྷུང་འདོད་པ་ཚོ་ཚ་ཚ་འུར་འུར་གྱི་སྒོ་ནས་རྒྱུགས་བཞིན་ཡོད།དམིགས་འབེན་དང་བྲལ་བའི་སྒོ་ནས་རླུང་ནང་གི་ཤོག་བུ་གང་བྱུང་དུ་རྒྱུ་བ་ཚོས་ཡ་ཐོག་གི་ཤེས་རིག་རྨེག་མེད་དུ་གཏོང་ལ་ཉེ་ཡང་ཚོར་བ་རྐྱེན་པས་སུ་ཞིག་གི་ངོ་གདོང་ལ་ཅེར་གྱིས་ལྟོས།གང་ལྟར་ང་ཚོ་མགོ་འཐོམ་བཞིན་ཡོད།
ཅི་མ་རུང་གི་རེ་འདུན་རིང་མོ།
ང་ཚོ་སུ་ཡིན་རུང་རྨོངས་པ་དེ་ཁུར་ནས་ཡུན་རིང་འགོར་སོང་།རྨོངས་པ་དེ་གང་རེད་ཟེར་ན་ས་རྩོད།ཆུ་རྩོད།ནང་དམེ།གྲུབ་མཐའི་བར་གྱི་འགལ་འདུ།ལྟ་བ་གསར་རྙིང་གི་འཐབ་ར།འདི་རྣམས་ལས་ཐར་བའི་དུས་ཤིག་ཡོད་ན་ཅི་མ་རུང་།འཆམ་མཐུན་མ་ཡིན་པའི་འཇིག་རྟེན་ཞིག་ནས་ཚེ་སྲོག་གི་རྩ་བ་རྒྱས་དགོས་ན་སྤྱི་མཐུན་གྱི་བསམ་བློ་མེད་ཚེ་སུ་ཞིག་གི་བླ་སྲོག་སློང་ཐུབ་བམ།གནམ་སའི་ཧྲག་བར་དུ་ལྷུང་བའི་སྡུག་འགྱོད་ཀྱི་ཤུགས་རིང་སུ་ཞིག་གི་བྲང་ཁོག་ཏུ་ཡང་ཡང་འཐེན་ཞིང་བློ་སྤོབས་ཀྱི་མཐོ་རླབས་དགོས་ངེས་ཀྱི་དབེན་ལྗོངས་ན་གྲག་མེད་དུ་ལུས་འདུག་གོ།
༢༠༠༨.༩.༢༡ ཉིན་བྲིས།
