གྲྭ་རྐྱང་ཚོ། མི་རབས་ཀྱི་དཔའ་པོ་རེད།
༡༽
ལྷིང་འཇགས་ཀྱི་གངས་ཁྲོད་ན་འགྲེང་བའི།གྲྭ་རྐྱང་ཚོར།
ཕྱག་ཕྲེང་དང་ཅ་ནེ་ཙམ་ལས་ཅི་ཡང་མེད་ན་ཡང་།
རྩམ་སྐྱ་དང་ཇ་རྐྱང་གི་རྒྱགས་ཕྱེ་ལ་བརྟེན་ནས།
གཞུང་ཆེན་པོད་ལྔ་རྣམ་དཔྱོད་ཀྱིས་བཏེགས་ཏེ།
ཤེས་རིག་གི་མེ་རོ་བསླང་བ་ཐེངས་གཅིག་མིན་པས།
གྲྭ་རྐྱང་ཚོ།སྐར་ཚོམས་བཞིན་མཐོ་སྒང་འདིར་ལྷེམ་མེར་བཀྲ།
༢༽
༼གྲྭ་པ་གྲྭ་རྐྱང་།ཟླ་གམ་ཁེར་རྐྱང༽
གདོད་མ་ནས་བརྒྱུད་པའི་ཁེར་གཞས་ཕྲ་མོ་ལས།
གྲྭ་རྐྱང་ཚོར།འདོད་པ་ཆུང་ཞིང་ཆོག་ཤེས་ལྡན་པ་རྟོགས་ལ།
བཟོད་པ་དང་བརྩོན་སེམས་ལྡན་པ་ནི་དེ་བས་ཀྱང་གོ་ཐུབ་པས།
བཀའ་རྒྱ་མའི་གསང་རྣམ་གྲོལ་བའི་གྲྭ་རྐྱང་ཚོ།
རྟག་བརྟན་གྱི་གཟུགས་སུ་སྨིན་པའི་མི་རབས་ཀྱི་དཔའ་པོ་རེད།
༣༽
གྲྭ་རྐྱང་ཚོའི་སེམས་ངོས་སུ་འགྲིལ་བ་ནི།
རིགས་དྲུག་ལ་འགྱེད་པའི་བྱམས་སྙིང་གི་བདུད་རྩི་ཡིན་ལ།
གྲྭ་རྐྱང་ཚོ་ཕུགས་བསམ་གྱི་ཀློང་རུམ་དུ་འཕྱོ་བ་ནི།
བདེན་དོན་དང་གནས་ལུགས་ཀྱི་ཐར་ལམ་ལས་བརྒལ་བའི་དོན་པོ་ལས།
ཟོལ་བཅོས་ཀྱི་འཁོར་བ་ལ་བློ་མིག་ཙམ་ཡང་ཕྱོགས་མ་མྱོང་བ་ངོ་མ་བདེན།
༤༽
གྲྭ་རྐྱང་ཚོས་ས་འཁྱག་གདན་དུ་བཏང་ཞིང་།
རིགས་ལམ་ཟས་སུ་ཟ་བའི་ཉིན་མོ་ནས་བཟུང་།
ཡིད་ཆེས་དང་སྤོབས་པས་ཁེངས་པའི་དབུ་འཕང་དེ།
ནམ་ཡང་སྨད་མ་མྱོང་ལ།བར་དོ་དང་འཇིག་རྟེན་གང་ཞིག་ནས་ཀྱང་།
རང་ཉིད་ཀྱི་རྣམ་ཤེས་ཕྲ་མོ་ཡང་བོན་ཉིད་ཀྱི་ཀློང་ལས་དོར་མ་མྱོང་བས།
གྲྭ་རྐྱང་ཚོ།དག་ཞིང་གང་ཞིག་གི་ལྷ་དང་ལྷ་ཚོགས་ཀྱི་རྣམ་སྤྲུལ་རེད།
༥༽
ཡིན་ཡང་།གདོད་མའི་རིག་གཞུང་གི་སོན་རྩ་གྲྭ་རྐྱང་ཚོ་ཡིན་ལ།
ད་ལྟའི་བྱང་ཐང་གི་འོད་སྣང་འདྲེན་མཁན་ཡང་གྲྭ་རྐྱང་ཚོ་ལས་སུ།
བདེན་པ་དེའི་ཕྱིར་དུ།གྲྭ་རྐྱང་ཚོའི་ལང་ཚོ་ལ་འཇིག་མེད་ཀྱི་གཟི་བྱིན་ཤར།
༢༠༠༦.༣.༢༧ ཉིན་བྲིས།
