འབྲོག་ཕྲུག  ངས་ཁྱོད་ལ་རྗེས་དྲན་འབྲི།

        ཆུང་གྲོགས་ཤེས་རབ་རྣམ་རྒྱལ་ལ་ཕུལ་བ།

༡

ཨཱོྃ་མ་ཏྲི་མུ་ཡེ་སལེ་འདུཿ

དག་ཞིང་སྟེ་འོལ་མོའི་གླིང་དུ་སྐྱེས་པར་ཤོག

༢

ངའི་འཇིག་རྟེན་གྱི་ལྟོང་ལས་ཤོར་བའི་འབྲོག་ཕྲུག

ད་ལྟ། བར་བདོའི་གྲོང་ཚོ་ནས་ང་ཚོ་དྲན་བཞིན་ཡོད་དམ།

ང་ཚོས་ཀྱང་ཁྱོད་ཀྱི་བརྒྱུད་རིམ་སྐྱོ་བས་གླེང་ཞིང་།

བསྔོ་སྨོན་གྱི་ཚིག་འབྲུ་རེ་རེ་མིག་ཆུ་དང་གདུང་བས་བསྐྱོར།ཁྱོད་ལ་འདྲིས་པའི་ལོ་ཟླ་ཧ་ཅང་ཉུང་ན་ཡང་།

ཁྱོད་ཀྱིས་བཞག་པའི་བརྩེ་སེམས་ལ་ཟད་མཐའ་མེད་པས།

མ་ཏྲིའི་འཛབ་དབྱངས་ཁྲོད་ན།ཁྱོད་ཀྱི་གྲིབ་གཟུགས་དང་རྣམ་ཤེས་ཡོད་ལ།

བརྗེད་དཀའ་བ་དྲན་པའི་ཤུགས་རིང་དང་མྱ་ངན་གྱི་འབོད་པའང་ཡོད།

༣

ངའི་འབྲོག་ཕྲུག་སྟེ།ཤེས་རབ་རྣམ་རྒྱལ།

བླ་མའི་ལམ་སྟོན་ཁྲོད་བདེ་བར་བཞུད་དང་།

ངས་ཀྱང་མ་བརྗེད་པའི་བརྡ་རྟགས་སུ་ཁྱོད་ལ་རྗེས་དྲན་འབྲི།

༢༠༠༩ .༤. ༢༦  ཉིན་བྲིས།