རླབས་ཆེན་བསྟན་འགྲོའི་ལྷ་སྐལ་རྣམ་གཉིས།

སྨན་ལྗོངས་གངས་ནས་མཚན་དཔེའི་འཛུམ་བརྒྱ་གྲོལ།།

མཛད་པའི་འཕྲིན་ལས་བསྟན་འགྲོའི་དཔལ་དུ་སྐྱོང་།།

སྲིད་ཞིར་ཕན་བདེའི་སྣང་བ་སྦྱིན་པའི་མགོན།།

རླབས་ཆེན་བསྟན་འགྲོའི་ལྷ་སྐལ་རྣམ་གཉིས་ཡིན།།

མཚན་བཟང་སུམ་ཅུས་སྐུ་ལ་རབ་མཛེས་ཤིང་།

ཕུན་ཚོགས་གསུང་གི་ལེགས་བཤད་ཆར་འཇོ་བའི།།

ཐུགས་ཉིད་ལྔ་ཟུང་མཁྱེན་རྩལ་རྫོགས་པའི་དབང་།།

གང་དེ་འཕྲུལ་ངག་བསྟན་པའི་ཀ་ཆེན་ཟུང་།།

རྒྱལ་གཤེན་སྟོན་པས་བརྒྱད་ཁྲིའི་བོན་འཁོར་བསྐོར།།

སངས་རྒྱས་གཉིས་པས་དེ་ཡི་སྲོལ་ཆེན་འཛིན།།

དུས་ཀྱི་འདྲེན་སྟོན་མཁན་སློབ་ཟུང་གཉིས་ཀྱིས།།

རིང་ལུགས་འཁྲུལ་མེད་སྐྱང་བ་རྨད་དུ་བྱུང་།།

འཁོར་ལོ་གསུམ་གྱི་མཛད་འཕྲིན་གེགས་མེད་པར།།

བརྒྱད་ཅུའི་བགྲང་བྱའི་དཔལ་གྱི་གཏེར་འཛིན་པའི།།

གངས་རིའི་མགོན་པོ་སྐྱབས་རྗེ་མཁན་སློབ་གཉིས།།

སྐུ་ཚེ་ཡུན་ཏུ་བརྟན་པའི་བཀྲ་ཤིས་ཤོག །

༢༠༡༢-༧-༤ཉིན་ཕ་ཡུལ་ནས།

གཏམ་རྒྱུད་ཀྱི་རིན་ཐང་།

ལོ་རྒྱུས་ཀྱི་སྔོན་རོལ་ན།།

གངས་རི་དང་གངས་ཆུ་ལས།།

སྙན་འཇེབས་ཀྱི་རོལ་དབྱངས་མཆེད།།

དེ་ནི་རོལ་དབྱངས་ཏེ། ཕ་སྐད་གཙང་མ་ཡིན།།

ལོ་ཟླ་དང་ལོ་ཟླའི་གོང་།།

སྔོན་བྱུང་གི་རྣམ་ཐར་བཞིན།།

སྦྲ་ནག་ལ་རེ་བཅོལ་ཞུས།།

དེ་ནི་ང་ཚོ་ཏེ། འོད་གསལ་ལྷ་ལས་མཆེད།།

གླིང་བཞི་ཡི་ནུབ་ཀྱི་ཕྱོགས།།

རྒྱལ་བ་ནི་གཤེན་རབ་ཀྱིས།།

འཕྲུལ་ངག་གི་བོན་ཞལ་ཕྱེས།།

དེ་ནི་ཞང་ཞུང་གི  བོན་གྱི་ཤེས་རིག་ཡིན།།

སྲིད་གསུམ་གྱི་ཕན་བདེའི་དཔལ།།

རྒྱལ་གཤེན་གྱི་གསུང་བཅུད་ལས།།

རང་སྒྲ་ནི་བོན་གྱིས་སྒྲོག།

དེ་ནི་དབྱངས་ཀྱི་འགྱུར། མ་ཏྲིའི་གཤེན་གླུ་ཡིན།

༢༠༡༢-༦-༢༢ཉིན་ཀོ་རྒྱལ་བཤད་གླིང་ནས།

མཆོད་ཆང་།

ཆང་དང་པོ་སྐྱབས་ཀྱི་བླ་མར་མཆོད།།

མ་འགྲོ་བ་དྲུག་གི་མགོན་སྐལ་དུ།།

དཔལ་མཛད་འཕྲིན་ཉི་བཞིན་རྒྱས་ནས་སུ།།

ཁྱེད་སྐུ་ཚེ་བརྟན་པའི་བཀྲ་ཤིས་ཤོག །

ཆང་གཉིས་པ་དཔོན་ཆེན་བཟང་པོ་མཆོད།།

གོང་དཔོན་པོ་བཀའ་ཁྲིམས་མ་ཉམས་པར།

འབངས་སྡེ་མི་བྱམས་ཀྱིས་སྐྱོང་བཞིན་དུ།

ཁྱེད་ཡུན་དུ་བཞུགས་པའི་ཁ་གཡང་འབོད།།

ཆང་གསུམ་པ་བྱམས་ལྡན་ཕ་མ་མཆོད།།

དྲིན་ཕ་མའི་ལུས་ངག་ཡིད་གསུམ་ལ།

རྐྱེན་འཚེ་བའི་འཇིགས་པ་བྲལ་ནས་ཀྱང་།

དུས་ཀུན་དུ་ནད་མེད་ཚེ་རིང་ཤོག།

ཆང་བཞི་པ་ན་མཉམ་གྲོགས་ལ་མཆོད།

སེམས་མཛའ་མཐུན་གཡུང་དྲུང་རི་མོ་ལས།

དོན་འཚེ་མའི་ཞི་བར་འཚོ་བཞིན་དུ།

གྲོགས་འུ་ཚོའི་ལས་ཀླུང་དར་བར་སྨོན།

༢༠༡༢-༧-༡༠ཉིན་དམར་རི་ནས།