མེ་ཏོག

གྲང་ངར་གྱིས་བརྒྱན་པའི་དགུན་ཟླ་གསུམ་རི་བོ་དང་ལ་མོའི་ཕ་རོལ་དུ་བཞུད་ཟིན་རྗེས།

ཁ་བ་བུ་ཡུག་གི་འཚུབ་མ་མེད་པར།

ལྷིང་འཇག་གི་རི་གྲོང་ངམ།

ཡང་ན་རྩྭ་ཐང་དང་སྤང་ཁ་ནས་འདབ་མ་འཛུམ་བཞིན་འཛུམ་བཞིན།

འཇའ་ཚོན་གྱི་འཕྲེང་བ་ལྟར་ཅི་འདྲའི་མཛེས་སྡུག་དང་།

ལང་ཚོ། བཀྲག་མདངས། གང་ལྟར་ཡིད་དུ་འོང་བའི་སྣང་རྙན་ཞིག
མེ་ཏོག

བསིལ་བསིལ་གྱི་རླུང་བུ་སྒྱུ་ཕྱོགས་ཤིག་གིས།

འདབ་མ་སྔར་བཞིན་རྒྱས་བཞིན།

གཡོ་འགུལ་དང་ཉམས་འགྱུར་ཐེངས་གཅིག་གིས་ཡོད་ཚད་ཀྱི་སྣང་བ་བཀུག

མེ་ཏོག།

འབྲོག་པའི་ལྷས་རྭ་དང་། ཡུས་ཧྥའི་རྒྱ་ཞིང་གི་ཁུག་ནས་ཁྱིད་ཀྱི་ལང་ཚོ་སྨིན་ཞིང་།

རྟ་ནོར་ལུག་གསུམ་དང་། ལྡེམ་ལྡེམ་སྙེ་མའི་རུ་བསྟར་ཁྲོད་དམ་། ཡང་ན།

ཡོད་ཚད་ཀྱི་སེམས་ཁམས་ན་མཛེས་པ་འབར་བའི་ཁྲ་ཆེམ་ཆེམ་གྱི་འདྲ་གཟུགས་གསོན་པོ།

མེ་ཏོག

ངའི་ཞེན་ཆགས་ཀྱི་གྲུ་ཟུར་ནས་ཁྱེད་ཀྱི་མཛེས་པ་འབར་ཞིང་།

ཁྱེད་ཀྱི་མཛེས་སྡུག་གི་ལོ་འདབ་བར་ན་བདག་གི་བརྩེ་བ་ལུས།

དེ་ཕྱིར་ངས་དགུན་ཟླ་གསུམ་གྱི་ཡོ་ལང་བར་ནས་སེམས་ཆགས་ཀྱི་རེ་སྒུག་མྱོང་ཞིང་།

སྟོན་ཟླ་གསུམ་གྱི་མཐའ་མཇུག་ན་སྡུག་སུན་གྱི་རྣམ་ཐར་འབྲི་མྱོང་།

2012-6-29ཉིན་ཕ་ཡུལ་དམར་རི་ནས།