6-26/ཉིན་གྱི་ཡུལ་གྱར་བའི་མཐོང་སྣང་།

སློབ་གྲྭའི་ངལ་གསོའི་དུས་ཚིགས་དང་འབྲེལ་བའི་སྐབས་ཤིག་ནི། ཕ་ཡུལ་གྱི་སྤྱི་ཚོགས་ཀྱི་གོམ་འགྲོས། ལྷིང་འཇག་གི་འཚོ་བ་རོལ་སྟངས། མི་རྣམས་ཀྱིས་ཀུན་སྤྱོད་སོགས་སྔར་དང་མི་འདྲ་བར་ཟ་ངེ་ཟིང་ངེ། ཚ་བེ་ཚུབ་བེ། འཚབ་བེ་འཚུབ་བེ། གང་ནས་ལྟས་ཀྱང་མི་རྣམས་ཀྱི་ཀུན་སྤྱོད་དང་། འཚོ་གཤིས་སོགས་ཀྱི་ཐད་ནས་འཁྲུག་ཆ་དོད་པའི་འགྱུར་ལྡོག་ཞིག་ཏུ་མངོན་པའི་སྐབས་སུ་ཁེལ། སྐབས་དེ་དུས་ནས་རང་ཉིད་ཀྱི་ཞིབ་དཔྱད་བསམ་བློ་ལྷག་ཏུ་གྲོང་ཁྱེར་ནང་གི་ཇ་ཁང་དང་ཟ་ཁང་། ཁྲོམ་རྭའི་མི་ཚོགས་ཀྱི་སྤྱི་གཤིས་སོགས་ཀྱི་ཐད་ནས་བློ་ཁ་ཅུང་ཟད་ཕྱོགས་ཙམ་བྱས་ནས་བརྟག་དཔྱོད་བྱས་པའི་ཚུལ་འདྲ་མོ་བཟུང་པ་ཡིན། ཇ་ཁང་དང་ཟ་ཁང་ཞེས་པ་ནི་ཕར་ཆེར་ད་ནོང་གསར་དུ་སྐྱེས་པའི་ཨ་ཉོག་བྱིས་པ་ཆུང་ཆུང་དག་དང་། སྐྱེས་ནས་གྲོང་ཁྱེར་དང་འཕྲད་མ་མྱོང་བའི་སྔར་མི་བགྲེས་པོ་རེ་ཟུང་ལས་དེ་མིན་ཕར་ཆེར་མིའི་མཚན་ཉིད་ཚང་ཙམ་གྱི་ཞ་ལོང་འོང་ལྐུག་དག་གིས་ཀྱང་ཤེས་ཡོད་ཚོད་འདུག ཅི་ལ་ཁག དུས་དེ་རིང་ཁ་རྩང་ཕར་ཆེར་གྲོང་ཁྱེར་ནང་དུ་འགྲོ་མ་མྱོང་བ་དང་། ཟ་ཁང་དང་ཇ་ཁང་ནང་གི་ཟ་མ་ཁས་མི་ལེན་པར་གནའ་སྔ་མོའི་བོད་ཀྱི་ཡུལ་སྐོར་བ་བཞིན་ཕོར་པ་རེ་རེ་གློ་ལ་འདོགས་ནས་སྡེ་ཁུག་ཞེས་ཟ་མས་གཙོས་པའི་འཁོ་ཆས་རེ་ཟུང་ནང་དུ་འདུས་ཡོད་པའི་ཁུག་མ་མགོ་སྦྲིལ་གཉིས་འཕྲག་ཐོག་ཏུ་འཕང་སྟེ་འགྲོ་བའི་ཡུལ་གྱར་པ་ཞིག་ལ་མཚོན་ན་མི་ཡི་གྲལ་དུ་མི་འཇོག་ནས་འབྲོག་རྒན། བླན་པ། དགའ་ཧོ་ཞེས་ཕལ་གྱིས་སྨོད་པའི་ཚད་དུ་ལྷུང་ཡོད་པས་ཡིན། འོན་ཀྱང་དུས་རབས་གསར་པའི་མི་སྣ་གཞོན་པ་རྣམས་སྣང་བ་མཐོ། གཙང་སྦྲ་ཆེ། འཚོ་རྟེན་ཡག་པའི་སྐབས་འདིར། ཧ་ལམ་ཡུལ་ལུང་རེ་རེའི་མདའ་ན་ད་ནོང་རྒྱལ་པོ་དང་། བློན་པོ། བླ་ཆེན། ཡང་ན་མི་སྣ་གྲགས་ཅན་སུ་ཞིག་ཕེབས་ཡོང་བ་ལྟར་གྲྭ་སྒྲིག་དང་གདན་འདིང་བྱེད་བཞིན་པའི་སྟབས་བདེའི་འཚོ་བ་རོལ་ས་ཡོད་པའི་ཚོང་ཁང་རེ་དང་། ཇ་ཟས་ཁང་རེ་ཡོད། དེ་ནི་དེང་རབས་པ་ཚོའི་སྐྱེས་ལུས་སྔོན་མས་བསགས་པའི་བསོད་ནམས་ཀྱི་ཚོགས་ཤིག་ཡིན་པར་སྨོས་མ་དགོས་ཀྱང་། བསོད་ཚོགས་བསོད་ནམས་བསགས་པའི་འབྲས་བུ་ཡིན་པར་སྒོམ་བཞིན་བསོད་ནམས་ཀྱི་ཚོགས་ཆེན་ལོངས་སུ་སྤྱོད་མ་ཤེས་ན། ཕྱུགས་པོ་ཚང་ལ་ལྟས་ངན་འཁོར་ཞེས་པའི་དཔེ་ལྟར། དགའ་བདེའི་དཔལ་ལ་སྤྱོད་བཞིན་ཡར་འདེགས་མི་ཐུབ་པའི་སྡུག་གྱོང་ཞིག་དང་དུ་བླང་པ་བཞིན་རང་རང་གི་མགོ་ཐོག་ཏུ་འབབ་ཉེས་ཆེ། རྒྱུ་མཚན་ནི་གནས་སྐབས་ཀྱི་བདེ་བ་ཙམ་ནི་མཐར་ཐུག་གི་བདེ་མ་མིན་པས་སྡུག་བསྔལ་གྱི་རྒྱུ་རུ་ངེས་ཞེས་སྔ་རབས་ཀྱི་མེས་པའི་ཤེས་ཡོན་ཅན་དང་། ཉམས་ལེན་ཅན། གྲུབ་པ་ཐོབ་པ་དག་གིས་ཞལ་གདམས་གསེར་ནག་གི་མཛོད་འདྲ་བ་ཞིག་ལས་ནང་ཆོས་སྨྲ་བ་ཚོས་སྐྱེས་བ་སྔ་འཕྱིའི་རྣམ་བཞག་ལས་བཤད་པའི་གཤིན་ཐང་བཞིན་ཟད་རྒྱུ་མེད་པར་ཡང་ནས་ཡང་དུ་མཐོང་ཞིང་རིག་རྒྱུ་ཡོད་ཅིང་། ཞིབ་པར་ལྟས་ཚེ་འོ་ཇ་དང་། མངར་མོ། བསྲུས་མ། དེ་མིན་ཞིམ་མངར་གྱི་བཏུང་བྱ་སྣ་ཚོགས་ཅི་དགའ་དགའ་ལེན་ཆོག་ཆོག་གི་ཇ་ཁང་། དཀར་མངར་གྱི་ཟས་རིགས་དག་གིས་གཙོས་པའི་མི་རིགས་མང་པོའི་ཁ་ཟས་སྣ་ཚོགས་འཛམ་གླིང་གི་རྟེན་རྫས་བཤམ་མཛོད་ཁང་དུ་སླེབ་པ་ལྟར་གང་སར་བཀྲམ་ནས་ཡོད་པའི་སྤྲོ་གསིང་གི་གླིང་ཁ་དག་ལས་ད་ལོ་ན་ཉིང་རེ་ཞིག་གིས་མི་ཤ་བརྩོས་ནས་ཚོང་རྗས་བྱེད་པ་དང་། འགའ་ཞིག་ནས་སྒོར་མོ་ལྔ་ཡི་དོན་དུ་ཐ་སྙད་ལྔ་ལྡན་གྱི་མི་སྲོག་ཕྲལ་བ་སོགས་ང་ལྟ་བུའི་གདར་མ་ཞིག་གི་གོ་བ་ཙམ་གྱི་ལུས་འདར་ཞིང་། ཡིད་དྲན་མེད་དུ་བརྒྱལ་འགྲོ་བའི་གནས་ཚུལ་རེ་ཞིག་གོ་ཐོས་ཀྱི་ཡུལ་དུ་གྱུར་དང་འགྱུར་བཞིན་ཡོད་པ་ལྟ་བུ་ལ་བསམ་ན་སྔ་མའི་ཇ་ཁང་ཟ་ཁང་སྤྲོ་སང་གི་གླིང་ཁ་ཡིན་ཡང་། དེང་རབས་ཀྱི་ཇ་ཁང་དང་ཟ་ཁང་གློག་བརྙན་ནང་གི་འཐབ་རྭ་དང་ནག་ཉེས་ཆེ་བའི་ཆད་སྤྱོད་ཁང་བཞིན་འཐབ་འཛིང་དང་། གཤའ་གཏུབ་ཀྱི་གཞིས་ཀ་ཡ་མཚར་པོ་ཡིན་པར་ངེས། ད་དུང་ཇ་ཟས་ཁང་དེ་དག་གི་ནང་དུ་ན་ནིང་གཞེས་ནིང་། གསར་སྐྱེས་ཀྱི་ན་གཞོན་གསར་བུ་གསར་མོ་ཚོ་ལས་གཞན་ལོ་དྲུག་ཅུ་བདུན་ཅུ་སོང་ཡོད་པའི་རྒན་རབས་འགའ་མཐོང་རྒྱུ་མེད་པ་འདི་སྨྱུག་འཛིན་པས་ལོ་ངོ་གཅིག་གི་རིང་དུ་དེ་ཡང་ནག་ཉེས་ཤིག་གི་ཟུར་གྱི་དགེ་མཚན་དུ་བརྩིས་ནས་དགའ་བཞིན་ཡོད་ཀྱང་ཁོ་བོ་ད་ལོའི་དབྱར་ཁ་ཕ་ཡུལ་དུ་ཕྱིར་ལོག་ཐེངས་གཅིག་གི་སྐབས་སུ་ཇ་ཟས་ཁང་དེ་དག་གི་ནང་དུ་མི་ཚོགས་མང་ཙམ་ཞིག་རང་ལོ་དྲུག་ཅུ་དང་བདུན་ཅུའི་ཡན་ཙམ་དུ་བརྒལ་ཡོད་པའི་མི་སྣ་ཤ་ཏག་ཏུ་ངེས་པའི་གནས་སུ་གྱུར་འདུག་ཅིང་། ཇ་ཟས་ཁང་དུ་རོལ་བའི་མི་ཚོགས་རྒན་གཞོན་གཉིས་ལས་རྒན་པ་རྣམས་སྣ་དང་སྨོད་པ་མང་ཞིང་། རེ་ཞིག་རང་གི་རིགས་རྒྱུད་སྔོན་མ་ཚོས་ཤ་ཁྲག་རུས་གསུམ་གྱིས་དཀའ་གསོག་སྡུག་ཉལ་བྱས་པའི་ཅ་དངོས་དང་རྒྱུ་ཟས་ཡོད་ཚད་ཁོ་རང་གཅིག་པུས་ཟླ་བ་གཅིག་གཉིས་ཙམ་གྱི་རིང་དུ་ཚར་ཞིང་བཟད་ཐུབ་མ་སོང་ན་འཛམ་བུ་གླིང་གི་སྟེང་ན་སྐད་གྲགས་ཆེ་བའི་ནག་ཁྲིམས་ཤིག་ཁོ་རང་ཁོ་ནའི་གཉའ་ཐོག་ཏུ་འབབ་ཡོང་བ་ལྟར་དུས་ཐོག་གཅིག་ལ་དམངས་སྒོར་ཁྲི་ཚོ་དུ་མ་རང་གི་སྡང་ཡ་དང་འཐབ་ཡ་ལ་གཏོ་མོ་སྦྱིན་ཞིང་། སྐབས་འགར་མི་དྲུག་བདུན་ཞིག་གི་ཉལ་ས་དགོས་ཀྱང་ཤོང་མིན་ལ་དོགས་མི་དགོས་པའི་མདུན་གྱི་སྒྲོམ་སྟེག་དེ་དག་གི་སྟེང་ན་བཟའ་བཏུང་གི་རིགས་འདྲ་མིན་བཅུ་གྲངས་དུ་མ་ཞིག་སྒྲིག་སྟེ་ཡ་ཁ་དང་མ་ཁ་གཉིས་ཀྱི་བར་ན་རྫས་ཆ་ལྟ་བུ་ཙམ་ཞིག་མཐུང་ཙམ་ཟ་ཙམ་བྱས་ནས་ཟ་མཐུང་གི་སྐབས་གཅིག་ལ་མེས་རྒྱལ་གྱི་དམངས་སྒོར་ཡོད་ཚད་རང་ལ་དབང་བ་ལྟར་ཤོག་དངུལ་ཁྲི་སྟོང་མང་པོའི་འགྲོ་གྲོན་བཏང་བ་ལ་ཁྱིམ་གྱི་བཟའ་མི་དང་ལོ་གཅིག་གི་འཁྱག་ལྟོག་སྐོམ་གསུམ་ལ་བསམ་གཞིག་མི་ཤེས་པའི་མི་ངན་རེ་ཞིག་ནི་སྤྱིར་ན་ད་ལོ་སྟེ་དུས་རབས་གསར་པའི་ཇ་ཟས་ཁང་གི་མི་སྣ་དག་ཡིན་ཞིང་། དེའི་ནང་ནས་ཀྱང་སྦྲ་ཁྱིམ་གྱི་མགོ་མཇུག་གར་གཏད་རང་ལ་དབང་ཞིང་། མི་རབས་འདི་ཡི་སྡུག་ཚད་ལག་དུ་ཐོག་མར་ལེན་མཁན་གྱི་ཐན་རྟགས་ཕྱི་རུ་མངོན་པའི་ནག་མོ་ལས་ངན་མ་དེ་ཚོ་དང་། ཕ་ས་ནང་བསྟན་གྱི་བསྟན་པའི་གཞིས་ཀ་ཞིག་ཏུ་གྱུར་ཞིང་། བོན་དང་ཆོས་ཀྱི་བསྟན་པའི་དར་ཆེན་འདས་མ་ད་གསུམ་ལ་རྒྱས་བཞིན་པའི་བོད་གངས་ཅན་གྱི་ལྗོངས་ནས་འཚར་ལོང་བྱུང་ཡང་ལས་རྒྱུ་འབྲས་ཀྱི་ཕྱོགས་སུ་བསམ་བློ་ཉིན་གཅིག་འཁོར་མི་ཐུབ་པའི་སྐྲ་མདོག་དཀར་པོར་གྱུར་ཞིང་ཡ་ཐོད་གཉེར་མ་བབ་པའི་བསོད་ཟད་བཟའ་དཔོན་ཕོ་སྐྱེས་དེ་ཚོ་རེད། ལོ་འདིའི་ཕ་ཡུལ་གྱི་ཇ་ཟས་ཁང་གི་རང་མི་རིགས་ཀྱི་གོམ་གཤིས་ལ་བསམ་ན། ཇ་ཟས་ཁང་ནི་ཇ་ཟས་ཁང་དང་སྤྲོ་གསིང་གི་གླིང་ཁ་ཞིག་འབོད་པར་ངོ་ཚ་བའི་གནས་སུ་མཐོང་ལ། དེ་ལས་ཟློག་སྟེ་རེ་ཞིག་གིས་ཁམས་སྟོད་ནང་འཁྲུག་ཁྲག་གི་ཆོལ་ཁ་ཞེས་སུ་འདོགས་ན་མཚོན་ཐུབ་པར་བཤད་པ་བཞིན། འདི་དག་གི་མིང་ལ་དུས་རབས་གསར་པའི་ཐན་རྟགས་དང་། མ་རུང་བའི་ལྟས་ངན་ཡོད་ཚད་འཚར་ལོང་བྱུང་ཞིང་མགོ་བོའི་རྩ་བ་རྒྱས་སའི་དུག་སྣོད་ཀྱི་འདམ་རྫབ་ལྟ་བུའི་དོན་གྱིས་མཚོན་པའི་མིང་ཞིག་འདོག་པར་བྱས་ན་འོས་ཤིང་འཚམ་པའི་གནས་སུ་ངེས།

ཁྲོམ་རྭའི་མི་ཚོགས་དང་། ཕ་ཡུལ་གྱི་མི་རིགས་སྤྱི་གླེང་།

དེ་མིན་ཁྲོམ་རྭའི་མི་ཚོགས་སྤྱི་ཡི་གོམ་གཤིས་ནི་ཕར་ཆེར་དེ་དང་འདྲ་བར་བརྟན་ལྷིང་དང་། བདེ་འཇག སྤྲོ་སྐྱིད་སོགས་ཀྱི་རང་གཤིས་དང་རིང་དུ་བྲལ་བར་བྱས་ནས་ཟུར་ཟ། སྨ་འབེབ། སྐྱོན་བརྗོད། ངན་མཚང་། སྡང་ཚིག་སོགས་བརྗོད་བཞིན་སྒོར་མོ་ཁེར་ལོ་གཅིག་པུ་ཙམ་དང་། ཇ་ཕོར་པ་གང་རེའི་ཆེད་དུ་ཕོ་བརྒྱའི་ལ་རྒྱ་ཟེར་བའི་མིང་སྐམ་སྟོང་པ་རེ་སེམས་ལ་ཉར་བཞིན་ཕ་རོ་དང་མ་ཁྲག་ཞེས་མ་རུང་བའི་སྡིག་སྨོད་རེ་ཁ་འདོན་ལྟར་བསྒྲོན་པའི་སྐབས་འགར་སྟོང་ལོ་གཉིས་པའི་དུས་སྐབས་འདིར་མི་རིགས་ཀྱི་རྣམ་དཔྱོད་གོང་འཕེལ། ཞི་བདེ་གཙོ་འཛིན། འཐབ་འཁྲུག་ཁ་བྲལ། སྤྱི་ཚོགས་བརྟན་ལྷིང་བྱེད་པའི་འཛམ་གླིང་སྤྱི་ཡི་རང་གཤིས་དང་དངོས་འགལ་མིང་ཙམ་མིན་པར་དོན་གྱིས་བྱེད་བཞིན་མི་རིགས་ཀྱི་ཞི་བདེ་དང་། ཁོད་སྙོམས་སེམས་ནང་དུ་ཉིན་མོ་གཅིག་ལ་བསམ་མྱོང་མེད་པའི་མི་ཚད། གཉིད་ཐུན་རྩིག་གི་རྨི་ལམ་དུ་འཁོར་མ་མྱོང་བའི་དེང་རབས་ཀྱི་དུས་ཚོད་སྐར་ཆ་འདི་དང་འདིའི་སྟེང་དུ་ཞེས་གཅིག་བསད་གཅིག་བརྡུང་བྱ་བའི་དུས་ཚོད་ཐག་གིས་གཅོད་པའི་གནས་ཚུལ་ཐོས་པ་ལ་བསམ་ན་ནང་བསྟན་གྱི་བོན་དང་ཆོས་སྨྲ་བ་ཚོས་སྐྱེས་བ་སྔ་འཕྱིའི་རྣམ་བཤད་ལས་འཕྲོས་པའི་ལྷ་མིན་འཐབ་རྩོད་ཀྱི་རྣམ་ཐར་དང་ཕྱོགས་ཡོངས་ནས་འདྲ་བར་སྙམ། ད་དུང་རང་ལོ་ཉི་ཤུ་ལས་མ་བརྒལ་ཞིང་། ཕོ་ལོ་བཅུ་བཞི་ཙམ་ནས་ཡུལ་གྱར་བའི་མཚན་ཉིད་འཛིན་པའི་འཁྱམས་པོ་སྨྱུག་འཛིན་པ་བདག་ལ་མཚོན་ན་ཕྱོགས་གང་སར་རམ། ཡུལ་གང་མང་ལ་འགྲུལ་སྤྱོད་བྱེད་ཆེ་བའི་དབང་གིས་མདོ་དབུས་ཁམས་གསུམ། རྒྱ་ཧོས་བོད་གསུམ་སོགས་ཀྱི་མི་རིགས་སྤྱི་ཡི་གོམ་གཤིས་ཀྱི་ཕྱོགས་ཙམ་ནས་རྒྱུས་ལོན་བྱུང་ཞིང་། མི་རིགས་དེ་ཚོའི་འཚོ་སྟངས། གུས་ལུགས། རྣམ་དཔྱོད། བསམ་བློ། ལྟ་བ། རིག་གནས། རྨང་གཞི་སོགས་ཀྱི་མཚོན་པའི་ཁྱད་ཆོས་ཀྱི་ཐད་ནས་བསམ་ན་བོད་གངས་ཅན་སྤྱི་རུ་བྱས་པའི་སྒོས་ཀྱི་ཕྱོགས་ཙམ་སྟེ། ཨ་སྒོས་ནང་གི་ཡང་སྒོས་སུ་གྱུར་པ་བདག་གི་ཕ་ཡུལ་འདིའི་མི་རིགས་ཀྱི་ཁྱད་ཆོས་ནི་མི་ཞིག་ཡིན་ན་རྐང་ལག་ཞ་སོང་བ་ལྟར་རམ། རོ་ཞིག་ཡིན་ཚེ་དུས་སར་སྦས་ཚར་བའི་མི་ཚད་རུལ་ཟིན་ནས་ཡོད་ཚད་འབྱུང་ལྔའི་བག་ལ་འཐིམ་ཟིན་པ་ལྟར་དགོས་པའི་རྣམ་དཔྱོད་དང་། སློབ་གསོ། རིགས་ཞེན་སོགས་ནི་རྗེས་ལུས། ནུས་ཟད། ཟུང་བྲལ། བག་འཁུམ་གྱི་མཚན་ཉིད་དང་ལྡན་པ་ཞིག་དང་། མི་དགོས་པའི་གདུག་རྩུབ། བླན་རྟགས། སྲ་མཁྲིགས་ཀྱི་དད་མོས་སོགས་ནི་སྔོན་ཐོན་དང་། ཤད་ཅན་ནམ། མདོར་ན་སྟོབ་དང་ལྡན་པ་ཞིག་ཡིན་པར་གསལ་བཤད་དགོས་པའི་གནད་གཅིག་ཏུ་ངེས། དེའི་མི་ཚད་ཚ་བ་རང་གི་མདའ་སྨྱུག་པས་ཤེས་བྱ་ཡོན་ཏན་དགའ་ཞིང་དོན་དུ་གཉེར་བའི་བསམ་བློ་རྒྱུད་ལ་ཡོད་པ་དེ་མི་ཡི་མཚན་ཉིད་ཡིན་པའི་དབང་དུ་བཏང་ན། ཁམས་དབུས་གཉིས་དང་ཨ་མདོའི་བར་ན་མི་ཡི་མཚན་ཉིད་ཚང་མ་ཚང་གི་ཁྱད་པར་ཞིག་ཤོར་བའི་ཉེན་ཁ་འདུག་སྟེ་ཞེས་གསུངས་པ་བཞིན། སྨྲ་ཤེས་ཤིང་དོན་གོ་བ་དེ་མིའི་མཚན་ཉིད་ཀྱི་ཁྱད་ཆོས་གཅིག་ཡིན་པའི་དབང་དུ་བྱས་ན་གོང་དུ་བརྗོད་པའི་ང་ཚོའི་མི་རིགས་དང་། མི་རིགས་གཞན་པོ་ཚོའི་བར་དུ་མི་ཡི་མཚན་ཉིད་ཚང་མ་ཚང་གི་ཁྱད་པར་ཞིག་དེ་སྔོན་ཤོར་ཟིན་མེད་ན། ད་ཕྱིན་འཆོར་འགྲོ་བའི་ཉན་ཁ་ཆེ་བར་སྙམ། ཡིན་ཡང་སྨྱུག་འཛིན་པའི་ལྟེ་ཁྲག་མཐོལ་བའི་རི་ལུང་ཆུང་ཆུང་འདིར། ནང་ཆོས་སྨྲ་བའི་གྲྭ་གཞོན་དང་། རྒན་རབས་འགའ་ཡོད་ཀྱང་ཕར་ཆེར་འཛམ་བུ་གླིང་ན་རང་ཉིད་ལས་ཡོན་ཏན་ཆེ་བའི་མི་ཞིག་མེད་པ་ལྟར་བྱས་ནས་ཆེ་འདོག་དང་ཡིན་སྣང་། ཕྱོགས་རིས། འཇིག་སྣང་སོགས་ཀྱིས་རང་སྣང་རང་གིས་འདེགས་ཅི་ཐུབ་བྱེད་བཞིན་རང་གི་སྦྱང་བྱ་རིག་གཞུང་དེབ་བམ་པོད་ཏི་གཅིག་ཡིན་ན་གཅིག གཉིས་ཡིན་ན་གཉིས་ཙམ་ལས་དེང་རབས་ཀྱི་ན་སྐོར་ཞིག་སྟེ་རྣམ་རིག་གནམ་སྔོན་ལས་ཡངས་ཤིང་། བསམ་བློ་རྒྱལ་མཚོ་ལས་ཟབ་པའི་གདོང་མཆོང་གི་ཕོ་མོའི་རུ་ཚོགས་ལྟར་ཟུར་སྦྱང་དང་། མི་རིགས་སྤྱི་ཕན་གྱི་སློབ་གསོ། རང་མི་རིགས་ཀྱི་འདུ་ཤེས་དང་བསམ་བློ་ཕར་འཛམ་གླིང་གི་རིག་གནས་དང་ཤེས་བྱ་ལ་ཁ་ཕྱོགས་པར་བྱེད་པ་ལ་མཐུན་སྦྱོར་མཛད་པའི་རྣམ་རིག་ལྟར་གུ་ཡངས་ཤིང་། གཏིང་ཟབ་པའི་ཤེས་རིག་དང་། རྣམ་དཔྱོད་དང་ལྡན་པ་དམིགས་བསལ་བ་རེ་ཙམ་ཡོད་སྲིད་ཀྱང་། ཕར་ཆེར་རུ་སྦལ་གྱི་སྤུ་དང་། ནམ་མཁའི་མེ་ཏོག་བཞིན་དཀོན་པའི་གནས་སུ་མཐོང་ངོ་། །ཞེས་གཙང་ཚ་གཤེན་སྨྱུག་པས་ཕ་ཡུལ་འབྲོག་པའི་སྦྲ་གུར་གྱི་གྲིབ་གཟུགས་འོག་ནས། ༢༠༡༢-༦-༢༧ཉིན།