ཀ་བ་བརྒྱ་ཡིས་འདེགས་པའི་ཁང་ཆུང་སྟེ།།

ཁ་བ་ཅན་སོགས་མི་རིགས་མང་ཙམ་ཞིག།

ག་ལེར་དལ་གྱིས་འདུས་པའི་གཞིས་ཀ་ན།།

ང་ཅག་དམིགས་ཡུལ་མི་གཅིག་ལྷན་དུ་འཛོམས།།

ཅ་ཅོ་སོད་སོད་རྒྱོབ་ཅེས་འབོད་པའི་ཁྲོད།།

ཆ་ལུགས་དམར་ཡ་ཆགས་པའི་གྲྭ་འཁྱམས་ང།།

ཇ་ཡུན་ཙམ་ལ་གནས་འདིར་སྡོད་ན་ཡང་།།

ཉ་ཉོགས་དེ་ཚོས་རྟག་ཏུ་མིག་ལ་གཟན།།

ཏ་ཐ་ག་ཏའི་བསྟན་སྒོར་ཞུགས་པ་ཞིག།

ཐ་སྙད་གཞུང་ལུགས་ཀུན་ལ་སྦྱང་མཁན་ཞིག།

ད་ཆར་སློབ་ཚོགས་སྐྱོང་བའི་དགེ་རྒན་ཞིག།

ན་ཚོད་རྒས་ཡང་རོལ་རྩེད་འབད་པས་གཟན།།

པ་ཏྲའི་རིས་ཚགས་བསྟར་འདྲའི་འཕྲུལ་ལམ་ནས།།

ཕ་མར་མི་བསམ་ཉིན་མཚན་དུས་ཀུན་དུ།།

བ་ལང་ཁྱི་བཞིན་ངན་སྤྱོད་ལ་རོལ་བའི།།

མ་འོང་ཕྱི་འདིང་མེད་པའི་མི་རྣམས་གཟན།།

ཙ་རི་གནས་སྐོར་འགྲིམ་ལ་མི་དགའ་པར།།

ཚ་ཚུབ་མདུན་ལམ་ཕུང་བའི་མཛད་ངན་ཅན།།

ཛ་ཡ་བསྟན་ལ་དེད་འདུན་རིང་དོར་བའི།།

ཝ་དང་སྦེ་བཞིན་ཁ་ཕྱོགས་བོར་བས་གཟན།།

ཞྭ་དཀར་ལ་སོགས་རང་གཞན་གྲུབ་མཐའི་གཞུང་།།

ཟ་ཧོར་རྒྱ་སོགས་འདྲ་མིན་ཡུལ་གྲུ་ཀུན།།

འ་འུར་བཤད་གྲྲྭར་སྦྱང་པར་ཕྱིན་ན་ཡང་།།

ཡ་མཚན་གསོད་དང་རྒྱག་ལ་རོལ་བས་གཟན།།

ར་ལུག་ཇི་བཞིན་རྨོངས་པ་ཆེ་ན་ཡང་།།

ལ་ལུང་མི་གཅིག་ན་གཞོན་རེ་ཞིག་ནི།།

ཤ་ཟ་སྲོག་གཅོད་ལྟ་བུས་ཆེས་མཚོན་པའི།།

ས་སྟེང་རོལ་རྩེད་ཚོགས་ལ་མོས་པས་གཟན།།

ཧ་ཧ་ཧེ་ཧེ་སྒྲོག་པའི་ཚོམ་ཁང་དུ།།

ཨ་བུ་ཨ་ཞེ་མིང་སྲིང་རེ་ཞིག་གིས།།

ཧ་ལམ་ངན་སྤྱོད་ཁོ་ནར་བརྩོན་པ་ཡིས།།

ཨ་རོགས་ཁམས་པའི་གཤེན་སྨྱུག་བདག་ལ་གཟན།།

                                  སྟེང་ཆེན་གྱི་དྲྭ་ཁང་ཞིག་ནས།