མི་ཚེའི་སྟོད་ཀྱི་ཟིན་བྲིས་ཁ་འཐོར།

                     ༡

ང་མི་ཡུལ་དུ་ཐོག་མར་འགྲིམས་ནས་བགྲངས་བྱ་བཅུ་བཞིར་སླེབ་དུས།

ཨ་ཕས་གཅེས་ཕྲུག་ཞེས་སློབ་སྟོན་མཛད་པ་མང་།

ཨ་མས་བྱམས་བརྩེ་ཡིས་འཚོ་སྐྱོང་བྱེད་པ་མང་།

བིའུ་དང་ལུག་གུས་རྩེ་འཇོ་འགྲན་པའི་སྤང་ལྗོངས་ཤིག་ན།

ལྟེ་ཁྲག་གིས་རི་མོ་བྲིས་པ་ནས་ཕ་མ་ལ་དགའ་ཞིང་།

ཕ་ཡུལ་ལ་དུངས།

                               ༢

འོན་ཀྱང་གློ་བུར་དུ་བཙན་གྱི་བཀོད་སྒྲིག་ཞིག་གིས།

དྲིན་ཕ་མའི་ངག་ལམ་ནས་སྐྱབ་འགྲོ་ཡི་ངག་རྟ་དང་།

ཁྱིམ་བཟའ་མི་ཚོའི་གདུངས་སེམས་ཀྱི་ངུ་ངག་ཁྲོད་ནས།

སྐབས་རེ་འག་ཞིག་ང་ཁྱེད་ཚོ་དང་བྲལ་སོང་།

ཞེན་ཆགས་ཀྱི་བསམ་པ་ཡོད་ཚད་ཁྱེད་ཚོར་ཆགས་བཞིན་བྲལ་སོང་།

                                    ༣

ལྷ་ལྡན་གྱི་ཡུལ་གྲུ་དེ་ནས་མེ་འཁོར་གྱིས་མགྱོགས་མྱུར་ཞིག་གིས།

ལེ་བར་དུ་མ་དར་གྱིས་བརྒལ་བཞིན་རྔ་གཡང་ཕྱུག་མོའི་ལྟེ་བར་སླེབ་དུས།

ཕ་མ་དང་། ཕ་ཡུལ་། མིང་སྲིང་དང་། གཉེན་ཉེ།

ངས་ཁྱེད་ཚོ་ཕྱིར་དྲན་ཐེངས་རེ་རེའི་ཁྲོད་དུ་རྒྱུན་ཆད་མེད་པའི་མིག་ཆུ་ལྷུང་མྱོང་།

ཟླ་འོད་མེད་པའི་མཚན་ལྗོངས་རིང་མོར་སྒྱུ་མའི་འཁྲབ་སྟངས་བཞིན།

ངའི་རྨི་ལམ་གྱི་གྲུ་ཁ་ཞིག་ན་ཁྱེད་ཚོར་མཇལ་འཕྲད་བྱུང་མྱོང་།

དེ་ནི་རྨི་ལམ་སྟེ། རྫུན་མའི་འཇིག་རྟེན་དུ་ངེས་པས།

དེ་དག་གིས་སེམས་ཀྱི་སྐྱོ་སྣང་རེ་རེ་འབོད་བཞིན།

སྐྱོ་སྣང་གི་མིག་ཆུ་སྐྲུན།

རྩོམ་འདི་སྣང་དགོན་ནས་༢༠༠༦ལོར་བྲིས་ཤིང་སླར་

༢༠༡༡ལོར་ཚིག་སྦྱོར་གྱི་ཆ་ནས་རེ་ཟུང་བཅོས་ཁུལ་བྱས་པ་ཡིན།