གངས་རི་དང་། རྩྭ་ཐང་།
གངས་རི་དང་། རྩྭ་ཐང་།
གཏེར་ཁ་བཞིན་ཞིམ་མངར་གྱི་ཟས་བཅུད།
ཕྱུགས་ཁྱུ་དང་དང་སྦྲ་གུར།
འདི་དག་གིས་སྤང་ལྗོངས་སུ་བཀོད་པའི་མཛེས་སྡུག་དུ་མའི་འོད་སྣང་རེ་རེ།
འབའ་སྒྲ་དང་ངུར་དབྱངས་ལྷན་དུ་མཆིས་པའི་དག་ཞིང་སྟེ།ངའི་མི་ཚེ་འདིའི་གནས་ཚང་ངོ་མ།
གངས་རི་དང་། རྩྭ་ཐང་།
ངོ་མཚར་གྱིས་མཚོན་པའི་གངས་རི་དང་འཚོ་གཞིས་ཀྱི་བར་སྲུབས་ན།
ཆེས་སྔ་མ་ནས་ངའི་ལྟེ་ཕྲག་གི་རི་མོ་བྲིས་ཏེ་བྱིས་དུས་ཀྱི་ངུ་ངག་གམ།
བྱིས་དུས་ཀྱི་རྒོད་སྒྲ་དུ་མ་ཞིག་གིས་འབོད་བརྡ་བྱེད་བཞིན་མི་ཡུལ་དུ་འགྲིམ་པའི་གོམ་ཁ་འཇོག་སའི་དང་གཙང་གི་ཡུ་གྲུ་ཞིག
གངས་རི་དང་། རྩྭ་ཐང་།
ཕ་ཁུ་དང་།
མ་སྲུའི་མཛད་བཟང་ཞིག་གི་འོག་ནས་གཅེས་ཕྲུག་ཚོའི་ལང་ཚོའི་སྨིན་སའི་གཡང་ཁྱིམ་སྟེ།
གནས་འདི་ནས་བུ་ཕྲུག་ཚོ་དཔལ་རྩལ་གྱི་སྙིང་སྟོབས་རྒྱས་ཤིང་།
ངང་རྒྱུན་རིང་བའི་སྨན་ཆུང་ཚོའི་བཞིན་མདངས་ཀྱི་མཛེས་པ་འབར།
གངས་རི་དང་། རྩྭ་ཐང་།
ཀ་ཁ་ག་ངའི་གཏམ་རྒྱུད་ཀློང་ནས་རྣམ་གཡིང་མེད་པའི་བྱིས་དུས་ཀྱི་འཚོ་བ་ལྷད་མེད་ཞིག་གནས་འདི་ན་རོལ་ཏེ་མི་ལོ་བཅུ་དགུའི་བར་གསེང་དེ་ན་ངའི་བསམ་མདུན་སྟོང་གི་ཞེན་ཆགས་ཟབ་བའི་དུང་སྣང་གི་འཇིག་རྟེན་ཆུང་ཆུང་། དེ་ནི། གངས་རི་དང་། རྩྭ་ཐང་། ངའི་ཞེན་ཆགས་ཀྱི་གནས་ཡུལ། གངས་རི་དང་། རྩྭ་ཐང་། གངས་རི་དང་། རྩྭ་ཐང་། ངའི་གངས་རི། ངའི་རྩྭ་ཐང་།
- ཟིན་ཐོ་གོང་མ།བོད་ཀྱི་བཙན་པོའི་འབྱུང་ཁུངས་བཤད་པའི་དཔྱད་གཏམ་གྱི་སྡོམ་ཚིག །
- ཟིན་ཐོ་འོག་མ།གངས་ཏི་སེ།
གུས་སྐུར་འོས་པའི་གོང་གི་སྨྱུག་མཆེད་རྣམ་པ་གསུམ་འདེར་ཕེབ་པར་བཀའ་དྲིན་ཆེ།
གངས་ལྗོངས་དང་ང། གླུ་མ་འཕྱོངས་ཞོལ་སྒྲོལ་མ།
རི་བོ་ཇོ་མོ་གླང་མ། །
ང་ཡི་སེམས་པ་ཡིན་ཞིང་། །
ཆུ་མོ་ཡར་ཀླུང་གཙང་པོ། །
ང་ཡི་སྟོབས་དང་ཤུགས་ཡིན། །
ང་ཡི་ལུས་ངག་ཡིད་གསུམ། །
ཁ་བའི་ལྗོངས་ཀྱི་ནང་ལ། །
གལ་སྲིད་ང་ཡང་མེད་ན། །
རི་ལུང་ཙམ་གྱི་གནས་ཡིན། །
ཡངས་པའི་བྱང་གི་རྩྭ་ཐང་། །
ང་ཡི་བློ་རྒྱ་ཡིན་སོང་། །
རྗིད་ཆགས་ཕོ་བྲང་དམར་པོ། །
ང་ཡི་ཤེས་རབ་ཐབས་ཡིན། །
ང་ཡི་ལུས་ངག་ཡིད་གསུམ། །
ཁ་བའི་ལྗོངས་ཀྱི་ནང་ལ། །
གལ་སྲིད་ང་ཡང་མེད་ན།
ཁ་བ་ཙམ་གྱི་གནས་ཡིན། །
ཁྱེད་ཀྱི་སྙན་ངག་བཀླགས་རྗེས་གཞས་འདི་དྲན་སོང་།
བཀླགས་ཟིན། རང་མོས་སྙན་རྩོམ་ལེགས་པོ་ཞིག་བྲིས་འདུག
རྩྭ་ཐང་གི་རྩྭ་ལ་ཝ་ཟུར་ཡོད་པར་ཤེས་ཀྱང་འདི་ནས་དེ་ཙམ་གསལ་ཐུབ་ཀྱི་མ་འདུག། ཁྱེད་ཀྱིས་རྩྭ་ཐང་ཞེས་བྲིས་པ་དེ་ལ་ལྟོས་དང་།
རྩྭ་ཐང་གི་རྩྭ་ལ་ཝ་ཟུར་ཡོད་རེད།གངས་རི་དང་རྩྭ་ཐང་ང་ཡི་ཕ་ཡུལ། གངས་རི་དང་རྩྭ་ཐང་ང་ཡི་ཁྱིམ་གཞིས།སྙན་ངག་རང་རེད་འདུག འོན་ཀྱང་མཇུག་གི་གངས་རི་དང་རྩྭ་ཐང་ཞེས་པ་དེ་མེད་ན་བཟང་སྙམ།