བོད་ཀྱི་བཙན་པོའི་འབྱུང་ཁུངས་བཤད་པའི་དཔྱད་གཏམ་གྱི་སྡོམ་ཚིག །

དཔྱད་རྩོམ་འདིའི་མིང་དངོས་ལ་འོད་གསལ་ལྷ་ལས་བོད་ཀྱི་བཙན་པོའི་འབྱུང་ཁུངས་བཤད་པའི་གཏམ་ཞེས་འབོད་ལ། སྐབས་འདིར་བོད་ཀྱི་བཙན་པོའི་འབྱུང་ཁུངས་བཤད་པའི་དཔྱད་གཏམ་གྱི་སྡོམ་ཚིག་ཞེས་གོང་གི་དཔྱད་གླེང་དེ་ལས་སྡོམ་ཚིག་རེ་འགའ་ཟུར་དུ་བཀོད་པའི་གཏམ་གླེང་ཞིག་སྤེལ་རྒྱུ་ཡིན། དེ་ཡང་སྡོམ་ཚིག་དེ་ནི། བོད་ཀྱི་བཙན་པོའི་འབྱུང་ཁུངས་གང་ཡིན་གཅིག་རྒྱལ་རབས་དང་ལོ་རྒྱུས་ཁག་དཔྱད་གཞི་བྱས་ཏེ་བཤད་པ་དང་། གཉིས་གཏན་ཚིགས་དང་རྒྱུ་མཚན་ལ་གཞིག་ནས་དཔྱད་པར་བྱས་ཏེ་ས་བཅད་གཉིས་ཀྱི་སྒོ་ནས་མཇུག་གྲུབ་པར་བྱས་པའི་སྡོམ་ཚིག་ཞིག་རེད། དེ་ཡང་དང་པོ་ལོ་རྒྱུས་ཀྱི་ངོས་ནས་བཤད་ན། དཔེར་ན་བོན་གྱི་ལེགས་བཤད་མཛོད་ལས་གཉའ་ཁྲི་ཐོག་མར་ལྷ་ལས་དོག་ལ་བབས་ནས་བོད་ཀྱི་སྲིད་ཁྲིར་འཁོད་ཚུལ་དང་། ཡང་བན་ཕྱོགས་ཀྱི་ལོ་རྒྱུས་དང་ཆོས་འབྱུང་རེ་འགའ་ཞིག་ལས་གཉའ་ཁྲི་བོད་རང་ས་སྟེ་སྤུ་བོའི་ཡུལ་ནས་བྱུང་བ་དང་། རྒྱ་གར་ཤཀྱའི་རྒྱལ་རྒྱུད་ནས་མཆེད་པ་སོགས་བཤད་ཡོད་པ་ལྟར་རེད། རིང་ལུགས་དེ་དག་ནི་གྲགས་པ་བོན་ལུགས་དང་། ཡང་གསང་མུ་སྟེགས་ཀྱི་ལུགས། གསང་བ་ཆོས་ལུགས་ཞེས་སྣ་ཁ་མི་འདྲ་བ་གསུམ་དུ་གྲགས་ཤིང་། དེང་དུས་ཀྱི་ལོ་རྒྱུས་སྨྲ་བ་རེ་འགས་བོད་བཙན་པོའི་རྒྱལ་རྒྱུད་ལྷ་ལས་མཆེད་པ་བོན་པོའི་ལྟ་བ་རུ་འཛིན་བཞིན་ཡོད་ཀྱང་རྒྱུ་མཚན་རྒྱ་ཆེར་མེད་དེ། ལྟ་བ་འདི་ངོས་འཛིན་ཡང་དག་དུ་གནང་བ་ནི་བན་བོན་གཉིས་ཀའི་ཕྱོགས་ནས་ཤུག་རྐྱེན་རྒྱ་ཆེན་པོར་བྱུང་ཡོད་པས་བོན་བན་གཉིས་ཀྱི་འདོད་ཚུལ་ཟབ་མོ་ཞིག་ཏུ་ཆགས་ཡོད་པ་རེད། དེ་ལ་དཔེར་མཚོན་ཙམ་ཞིག་ཞུས་ན། བོན་ཕྱོགས་སུ་སྲིད་པ་རྒྱུད་ཀྱི་ཁ་བྱང་ལས་། ༼ཕྱྭ་རྗེ་ཡབ་ལྷ་བདལ་དྲུག་དང་། །དམུ་བཙན་རྒྱལ་མོ་གཉིས་ཀྱི་སྲས། །ལྷེའུ་རྗེ་མཆེད་བདུན་བྱ་བ་ཡིན། །ལྷ་སྲས་དེ་ཡི་བདུན་ཚིགས་ནི། །ཁྲི་སད་འབར་བ་ཞེས་ཀྱང་བྱ། །དེ་ཡི་ཞང་པོ་དམུ་ཡི་ཡུལ་དུ་སྤྱུགས། །དམུ་ཟ་གཉིས་_གཉའ་མཐིང་མ་དང་བཤོས་པ་ལ། །ཡར་གཤེགས་སུ་ནི་ཡུམ་གྲོངས། །མར་གཤེགས་སུ་ནི་སྲས་མནོལ་བས། །ལྟག་པའི་བདུད་སྒོ་སྐྲ་ཉག་གཅིག་དང་འཁྲིལ་ནས་བཤོས་པའི་སྲས། །རྗེ་ཉག་ཁྲི་བཙན་པོ་ལགས།༽ ཞེས་གོང་གི་འདོད་ཚུལ་དེ་བསྟན་ཡོད་པ་ལྟར་བན་དྷེའི་ཕྱོགས་ཀྱི་ཆོས་འབྱུང་དང་ལོ་རྒྱུས་འགའ་ལས་བྱུང་བ་སྟེ་དཔེར་ན། ས་སྐྱ་བསོད་ནམས་རྒྱལ་མཚན་གྱིས་བརྩམས་པའི་རྒྱལ་རབས་གསལ་བའི་མེ་ལོང་ལས། ༼དང་པོ་ལྷ་རི་རོལ་པོའི་རྩེ་ལ་བབས་སྟེ་གཟེགས་པས། གངས་ཡར་ལྷ་ཤམ་པོ་མཐོ་བ་དང་། ཡུལ་ཡར་ལུང་བཟང་བར་མཁྱེན་ནས། བཙན་ཐང་གོང་མོའི་རི་ལ་བབས་པས། ཕྱུགས་སྐྱོང་བའི་རྫིའུ་རྣམས་ཀྱིས་མཐོང་སྟེ། རྩར་བྱུང་ནས་གང་ནས་འོང་དྲིས་པས། གནམ་ལ་མཛུབ་མོ་ཀེར་བ་དང་། འདི་ནི་ནམ་མཁའ་ནས་འོང་བའི་ལྷ་སྲས་ཡིན་པར་འདུག་པས། འོ་ཅག་རྣམས་ཀྱི་རྗེ་བཅོལ་ལོ་ཟེར་ཏེ། གཉའ་བར་ཁྲི་བྱས་བཏེགས་ནས་འོང་པ་ན། རྗེ་གཉའ་ཁྲི་བཙན་པོ་ཟེར་ཏེ། བོད་ཀྱི་རྒྱལ་པོ་ལ་སྔ་བ་དེ་ཡིན་ནོ།༽ ཞེས་ཚིག་ཉུང་ངུ་མ་ཞིག་གིས་འོ་ཅག་བོད་ཀྱི་སྤྱི་རྗེ་གཉའ་ཁྲི་ཐོག་མར་གནམ་ནས་དོག་ལ་བབས་པ་དང་དེ་རྗེས་བོད་ཆེན་པོའི་མངའ་མཛད་དུ་བྱས་ཚུལ་འཁོད་ཡོད་པ་ལྟ་བུ་རེད། ཡང་ལོ་རྒྱུས་ཀྱི་ཕྱོགས་ནས་གོང་དུ་བཤད་པ་ལྟར་གྲགས་པ་བོན་ལུགས། གསང་བ་ཆོས་ལུགས། ཡང་གསང་མུ་སྟེགས་ཀྱི་ལུགས་དང་གསུམ་དུ་ཕྱེས་ཞིང་བོད་ཀྱི་མངའ་མཛད་ཐོག་མར་བྱུང་རབས་མི་མཐུན་པ་དེ་བཞིན་བྱུང་ཡོད་པ་དེ་དག་ལས། ཕར་ཆེར་གྲགས་པ་བོན་ལུགས་ཀྱི་བཤད་ཚུལ་དེ་དོན་དུ་མཐུན་པར་བརྩིས་པའི་འདོད་ཚུལ་མང་ཡོད་པ་ལྟར་དོན་དུ་གནད་ཆེ་བའི་ཞིབ་འཇུག་གི་གཞི་རྩ་དེ་དག་བསམ་གཞིགས་ཅུང་ཟད་བྱས་ན། དེ་ལྟར་གྱི་གནད་ཐོག་ཏུ་འབབས་ཐུབ་ཀྱི་འདུག་པར་སེམས། གཉིས་པ་རྒྱུ་མཚན་དང་གཏན་ཚིག་ལ་གཞིག་ན་བོད་རྒྱལ་ཐོག་མ་གཉའ་ཁྲི་ལྷ་ལས་བོད་ཆེན་པོའི་མངའ་མཛད་ཀྱི་རྒྱལ་པོར་བྱོན་པར་བཤད་ཡོད་པ་ནི་དོན་དུ་བདེན་པའི་གཏམ་ཞིག་ཏུ་འདོད་ཆོག་སྟེ། སྤུ་རྒྱལ་གཉའ་ཁྲི་བཙན་པོ་ཁོང་གི་མཚན་འདོགས་ཚུལ་གྱིས་གྲགས་པ་བོན་ལུགས་ལྟར་གྱི་འདོད་ཚུལ་དེ་ལྟར་དུ་ར་སྤྲོད་ཆེན་པོར་བྱེད་ཐུབ་ཀྱི་འདུག་སྟེ། དེང་དུས་གཉའ་ཁྲིའི་མཚན་གྱི་གོ་རིམ་དེ་དག་ལ་ཞིབ་འཇུག་བྱེད་སྐབས་སུ། གཉའ་ཁྲིའི་མཚན་ཟུར་གྱི་གཉའ་ཞེས་པའི་ཐ་སྙད་དེ་བོད་སྐད་ཡིན་པ་དང་ཞང་སྐད་ཡིན་པ་སོགས་འདོད་ཚུལ་མི་མཐུན་པ་མང་དུ་བྱུང་ཡོད། འོན་ཀྱང་གོ་བདེ་བའི་སྡོམ་ཚིག་ཉུང་ངུ་ཞིག་གིས་གཉའ་ཞེས་པའི་ཐ་སྙད་དེ་བོད་རྒྱལ་ཐོག་མའི་མཚན་ཟུར་འདོགས་དགོས་པའི་རྒྱུ་མཚན་གསལ་པོ་ཞིག་ངོ་སྤྲོད་བྱས་ཡོད་པ་སྟེ། ལོ་དེབ་ཞང་བོད་ཤེས་རིག་འདོན་ཐེངས་བཞི་པའི་སྟེང་གི་ _{ཆོས་འཁོར་ཚང་དགེ་བཤེས་ཉི་མ་འོད་ཟེར་གྱིས་བརྩམས་པ།} རྒྱལ་རབས་དང་ལོ་རྒྱུས་སུ་བརྫུས་པའི་སྒྲུང་གཏམ་ཐེར་འདོན། ཞེས་པའི་ནང་དུ། དོན་དངོས་སུ་གཉའ་ཁྲི་ཞེས་པའི་གཉའ་ནི་ལུས་པོའི་གཉའ་བ་དང་འབྲེལ་ནས་བཏགས་པ་ཞིག་གཏན་ནས་མིན་ལ། ཞེས་དང་། འདིར་ནི་རྒྱལ་པོ་རང་གི་ཡུམ་དམུ་ཟ་གཉའ་མཐིང་མ་ཞེས་པའི་མཚན་ཟུར་གྱི་གཉའ་ལས་དྲངས་ནས་བཏགས་པར་འདོད་པས་སོ། དེ་ལྟར་ཡིན་པ་ནི་གཉའ་ཁྲི་ཙམ་དུ་མ་ཟད་གནམ་གྱི་ཁྲི་བདུན་ཀུན་གྱི་མཚན་གནས་ཀྱང་རང་རང་གི་ཡུམ་གྱི་མཚན་ཟུར་རེ་གྲས་པ་ལ་བཏགས་ཡོད་པ་སྟེ། ཞེས་པ་ལྟ་བུས་བོད་རྗེ་གཉའ་ཁྲི་དམུ་ཟ་གཉའ་མཐིང་མའི་སྲས་སུ་འཁྲུངས་པ་ཡང་དེ་ལྟར་བཤད་ཡོད་པ་ཙམ་གྱི་གོ་ནུས་པ་ཞིག་རེད་ལ་དེ་ལྟར་དམུ་ཟའི་སྲས་སུ་འཁྲུངས་ཡོད་པའི་དབང་བྱས་ན་བོན་ལུགས་ཀྱི་དཔེ་རྙིང་སྲིད་པ་རྒྱུད་ཀྱི་ཁ་བྱང་སོགས་གྲགས་པ་བོན་ལུགས་ཀྱི་བཤད་སྟང་དེ་དང་མཐུན་ཤས་ཆེ་བས་བོད་ཀྱི་བཙན་པོ་ཐོག་མར་ལྷ་ལས་བྱུང་ཡོད་པར་ངེས་ཤེས་བརྙེད་ཐུབ་ཀྱི་འདུག་ལ། ཡང་ན་བོད་ཀྱི་ཡིག་ཚང་ལས་བྱུང་བའི་༼འཕྲུལ་གྱྀ་ལྷ་བཙན་པོ་འོད་ལྡེ་སྤུ་རྒྱལ་༽ཞེས་པ་དང་། གོང་གི་གཉའ་ཁྲིའི་མཚན་ཟུར་ལས་བྱུང་བའི་ཁྲི་ཞེས་པ་སོགས་ལ་དཔྱད་ན། ཕར་ཆེར་བོད་ཀྱི་བཙན་པོའི་འབྱུང་ཁུངས་ལྷ་ལས་མཆེད་པ་ཞིག་རེད་འདུག་པར་བཤད་ཐུབ་ཀྱི་འདུག་སྟེ་འཕྲུལ་གྱི་ལྷ་བཙན་པོ་ཞེས་པའི་༼ ལྷ ༽་དང་། གཉའ་ཁྲི་ཞེས་པའི་༼ ཁྲི ༽་སོགས་ནི་གང་དྲན་བྱུང་རྒྱལ་གྱི་ཐ་སྙད་ཞིག་མིན་པ་དང་། ཐ་སྙད་དེ་དག་གཉའ་ཁྲི་བཙན་པོ་དང་འབྲེལ་བ་ཡོད་པའི་རྒྱུ་མཚན་དུ་བྱས་ན། གོང་གི་ལྷ་ཞེས་པ་ནི་བོད་སྐད་ཀྱི་སྒྲ་ཁོ་ན་ཡིན་པ་དང་། བཤམ་གྱི་ཁྲི་ཞེས་པའི་ཐ་སྙད་དེ་ཞང་བོད་ལོ་རྒྱུས་ཏི་སེའི་འོད་སོགས་རྒྱལ་རབས་དེབ་ཐེར་ཁག་ལས། དང་ཐོག་ཞང་སྐད་ཡིན་པ་དང་། དེ་བོད་སྐད་བསྒྱུར་ཚེ་ལྷ་ཞེས་པའི་ཐ་སྙད་དང་གཅིག་མཚུངས་སུ་འབྱུང་བར་བཤད་ཡོད་ཅིང་། དེ་ལྟར་བོད་སྐད་དང་ཞང་སྐད་གཉིས་ཀྱི་ཐོག་ནས་དོན་དུ་ལྷ་ལ་གོ་དགོས་པའི་མིང་ཚིག་ཞིག་གཉའ་ཁྲི་ལྷ་ལས་བྱུང་བའི་རྒྱ་

མཚན་ཙམ་མ་གཏོག་ལྷ་དང་འབྲེལ་བ་མེད་པ་ཞིག་ལ་མཚན་དེ་འདོགས་པ་ལ་རྒྱུ་མཚན་མེད་ཅིང་དེ་བས་ཀྱང་འདོགས་ཐབས་མེད་པ་ཞིག་ཡིན་པས་སོ། །

                                                                           ༢༠༡༡ ༡༠ ༢༣ ཉིན།