༧གར་སྟེགས་ནས་འཕུར་བསྐྱོད་བྱེད་པའི་སྒྱུ་རྩལ་གྱི་གསོན་ཤུགས་བཙན་པོ། 
                                     སྐབས་བཞི་པའི་ཁྱུང་པོའི་རས་པའི་སྒྱུ་རྩལ་ལ་གླེང་བ།
                              ཡ་ཐོག་འཁྲབ་སྟངས་རྙིང་པའི་གར་སྟེགས་ནས། །
                                 སྔོན་བྱོན་མེས་པོའི་རྣམ་དཔྱོད་རེ་རེ་ཡིས།
                               སྒྱུ་རྩལ་སྲིད་ན་དཀོན་པའི་ནོར་གྱི་མཆོག །
                            གངས་ལྗོངས་གཡང་གཞོང་ཕྱུག་མོར་ངོམ་འདི་རྨད། །
༧ཆོལ་ཁ་གསུམ་མམ་སྒང་པ་བོད་ཅེས་སུ་འབོད་པའི་ས་ཆ་སྟོད་སྨད་བར་གསུམ་གྱི་ཡུལ་གྲུ་འདིར་མཚོན་ན། གླུ་བྲོ་ནི་མི་གཤིས་དང་སེམས་ཀྱི་དགའ་སྡུག་གི་འགྱུར་འགྲོས་རེ་རེའི་ཁྲོད་ནས་འཚར་ལང་གི་ལང་ཚོ་སྨིན་པའི་སྲོལ་རྒྱུན་རིག་གནས་ཤིག་རེད། དེ་ཡང་དོན་ཐོག་འགྲོ་ཤེས་པས་ནི་བྲོ་གར་ལ་མཁས་ཤིང་། བརྗོད་ཅེས་པ་ཙམ་གྱིས་གླུ་དབྱངས་ཀྱི་ངག་རྟ་ལ་མགྲིན་པར་ཆགས་པས་གླུ་གར་གྱི་རྒྱ་མཚོ་ཞེས་སུ་གྲགས། སྤྱིར་དེ་ལྟ་བུའི་གླུ་དང་བྲོ་དེ་དག་གང་གི་ཆ་ནས་བལྟས་ན་ཐུན་མིན་གྱི་ཁྱད་བོན་རེ་དང་རང་གི་སྒྱུ་རྩལ་གྱི་ཟབ་ཚད་རེ་ཡོད་མོད། དེ་དག་ལས་སྒྱུ་རྩལ་ནི་གླུ་དང་བྲོ་ཙམ་གྱི་མ་ཚད་མི་རིགས་ཀྱི་རིག་གནས་གཞན་པའི་ཕྱོགས་སུ་རྒྱ་ཆེར་ཁྱབ་ལ་ཆེས་ནུས་ཚད་འབུར་དུ་ཐོན་པ་ཞིག་རེད། ཡང་ཆོས་ལུགས་པས་བཤད་པ་ལྟར་སྣང་སྲིད་ཀྱི་བོན་ཐམས་ཅད་སྒྲ་རྟོག་གིས་ཕར་བཞག་པ་ཤར་ཏག་ཅིག་ཏུ་གྲུབ་ཡོད་པས་དེའི་ཕྱིར་སྒྱུ་རྩལ་ཡང་སྒྲ་རྟོག་གིས་ཕར་བཞག་པ་ཞིག་ཡིན་པའི་གཤིས་ཉིད་ཅན་དུ་གྲུབ་ཡོད་པ་ལ། སྒྱུ་རྩལ་ཉམས་མྱོང་ཅན་ཞིག་གིས། ༼མཁས་པས་ཉམས་དང་འགྱུར་ལ་ལྟ་བར་བྱེད། །བླུན་པོས་སྐད་དང་གཟུགས་ལ་ལྟ་བར་བྱེད། །དབུལ་པོས་གོས་དང་རྒྱན་ལ་ལྟ་བར་བྱེད། །བྱིས་པས་རོགས་དང་གློག་ལ་ལྟ་བར་བྱེད། ༽ཅེས་བཤད་པ་ནི་ཅིས་མ་བདེན་ཨང་། དེའི་ཕྱིར་དེ་ལྟ་བུའི་སྒྱུ་རྩལ་དེ་ཡང་འཇོག་སྟངས་མི་འདྲ་བ་ཞིག་དང་། ངོས་འཛིན་བྱེད་སྟངས་མི་འདྲ་བ་དུ་མ་ཞིག་མཆིས། འོན་ཀྱང་ང་ལྟ་བུའི་སེམས་སྟངས་ལ་མཚོན་ན། དེ་སྔོན་མདོ་སྟོད་སྨད་ཀྱི་ཡུལ་གྲུ་གྲངས་མང་ཞིག་གི་སྒྱུ་རྩལ་གྱི་བྲོ་བ་མྱོང་ལ་མི་ལོ་བཅུ་དགུའི་བར་དུ་སྒྱུ་རྩལ་གྱི་ཁྲོད་དུ་མི་ཚེ་སྤྱོད་མྱོང་ཡོད་པ་ལྟ་བུ་ཞིག་ཡིན། འོན་ཀྱང་ཡིད་ཀྱིས་ཡ་མཚར་ལ་སེམས་ཀྱིས་ཁ་ཕྱོགས་འོས་པའི་སྒྱུ་རྩལ་ཞིག་གཏན་ནས་དེའི་རིང་གི་འཚོ་བའི་བར་གསེང་ནས་མཐོང་མྱོང་མེད། ད་ཐེངས་༢༠༡༡་ལོའི་ཁྱུང་པོ་སྟེང་ཆེན་གྱི་སྐབས་བཞི་པའི་རས་པའི་སྒྱུ་རྩལ་དུས་ཆེན་ཞེས་པའི་དུས་ཆེན་དེའི་སྐབས་སུ་འཁྲབ་པའི་རས་པའི་བྲོ་དེའི་སྒྱུ་རྩལ་དེ་ཐོག་མར་མཐོང་ཡོང་བ་ཙམ་གྱིས་ང་སྒྱུ་རྩལ་གྱི་ཕྱོགས་ནས་ལེགས་འདེམས་བྱེད་པའི་བྱ་བ་ལ་གསར་དུ་ཞུགས་དགོས་བྱུང་སོང་། ཡ་མཚར་བ་ཞིག་ལ་བྲོ་དེ་དེ་སྔོན་ཉིས་སྟོང་དགུ་དང་བཅུ་སོགས་རིམ་པ་བཞིན་མཐོང་མྱོང་ཡོད་མོད་ཀྱང་དེའི་ཕྱོགས་ནས་སྒྱུ་རྩལ་གྱི་བྲོ་བ་དེ་ཙམ་ཞིག་མྱོང་ཐུབ་མ་བྱུང་། དེ་ནི་སྟབས་མ་ལེགས་པ་ཞིག་གིས་རྐྱེན་ཏེ་ངས་སྒྱུ་རྩལ་གྱི་ངོ་མ་ཤེས་ཏེ་སྒྱུ་རྩལ་ངོས་འཛིན་བྱེད་རྒྱུར་ལུས་སོང་བ་ཡིན་ནམ། ཡང་ན་ཡར་རྒྱས་གོང་འཕེལ་ལ་མཐའ་མེད་སྟབས་རས་པའི་བྲོ་དེ་ཡི་རང་གི་ངོས་ནས་ཀྱང་ལོ་རེ་རེ་བཞིན་སྒྱུ་རྩལ་གོང་འཕེལ་དུ་སོང་བ་ཡིན་པ་ནི་ངས་ཐག་གིས་མི་ཆོད། དོན་ངོ་མར་བཤད་ན། སྒྱུ་རྩལ་ལ་སྟོབས་ཤུགས་ཡོད་། སྒྱུ་རྩལ་ལ་བྲོ་བ་ཡོད། འོན་ཀྱང་སྒྱུ་རྩལ་གྱི་ཕྱོགས་ནས་བཤད་ན་སྒྱུ་རྩལ་མཐར་ཐུག་པ་ཞིག་གཏན་ནས་མེད་ཅིང་། གལ་སྲིད་སྒྱུ་རྩལ་གྱི་མཐར་ཐུག་ཅིག་ཡོད་ན། དེ་ནི་རས་པའི་འཁྲབ་སྟོན་གྱི་སྒྱུ་རྩལ་རེད་ཅེས་གདམས་ན་ཅི་མི་རུང་། འོན་ཀྱང་སྐབས་དེ་དུས་ལྟད་མོ་བ་ཚོས་སྒྱུ་རྩལ་འདེམས་སྐབས་ངའི་འགྲམ་གྱི་གསར་བུ་གསར་མོ་ཚོས་འཁྲབ་སྟོན་པའི་སྐྱེས་གཟུགས་དང་ལང་ཚོ། བཞིན་གྱི་དཀར་དམར་སོགས་གླེང་བཞིན་དེའི་ཕྱོགས་ནས་སྒྱུ་རྩལ་འདེམས་ཀྱི་གདའ། འོན་ཀྱང་དེ་ནི་སྒྱ་རྩལ་འདེམས་སྟངས་ཀྱི་མཐའ་མ་ཟེར་བ་དེ་ཡིན། ངས་དེའི་ཕྱོགས་ཀྱི་སྒྱུ་རྩལ་འདེམས་སྟངས་དེ་དང་ཅུང་ཟད་མི་འདྲ་ཞིང་། ངས་རས་པའི་འཁྲབ་སྟོན་ལས་འདེམས་པའི་སྒྱུ་རྩལ་ནི་འཁྲབ་སྟོན་པ་ཚོའི་ཤེད་སྐོར་དང་། འཁྲབ་སྟངས་ཀྱི་ཉམས་འགྱུར། སོགས་ཀྱི་ཐད་ནས་འདེམས་བྱས་པའི་སྒྱུ་རྩལ་དེ་རེད། དེ་ལྟ་བུའི་སྒྱུ་རྩལ་ནི་སྨན་ཆུང་ཚོའི་འཁྲབ་སྟོན་རེའི་བར་གསེང་ནས་འཛུམ་བག་དང་ལྷན་དུ་སྒྱུ་རྩལ་གྱི་མཛེས་དཔལ་ཡོད། སྟག་ཤར་ཚོའི་ཤེད་སྐོར་རེའི་འོག་ནས་གཟི་བརྗིད་དང་ལྷན་དུ་སྒྱུ་རྩལ་གྱི་འགུལ་ཤུགས་ཡོད། དེ་ལྟར་སྒྱུ་རྩལ་གྱི་མཛེས་དཔལ་དང་སྒྱུ་རྩལ་གྱི་འགུལ་ཤུགས་གསོན་པོ་ཞིག་གིས་སྦས་བསྐུང་མ་བྱས་པར། སྟེང་ཆེན་རས་པའི་ཤེད་སྐོར་ཞེས་ས་སྒང་ཧྲིལ་པོའི་མཁའ་དབྱིངས་ནས་སྙན་པ་དབྱར་རྔ་ལྟར་མཆེད་ཅིང་གར་སྟེགས་ནས་འཁྲབ་སྟོན་པ་དེ་ཚོས་རྡོག་བྲོ་དལ་གྱིས་རྒྱབ་དུས་སྟག་ཤར་ཚོས་གཤང་དཀྲོལ་གྱི་སྙན་དབྱངས་ལས་གནའ་སྲོལ་གྱི་རང་འོད་འཚེར། སྨན་ཆུང་ཚོས་རྔ་རྡུང་གི་བོན་དབྱངས་ལས་ཉམས་འགྱུར་གྱི་གཟི་མདངས་མཆེད། དེ་ནི་སྒྱུ་རྩལ་རེད། གནའ་དེང་ཟུང་འབྲེལ་གྱི་སྒྱུ་རྩལ་རེད། གནའ་བོའི་སྲོལ་རྒྱུན་རིགས་གནས་ཀྱི་རང་མདངས་ཡལ་ལ་ཉེ། དེང་རབས་སྲོལ་རྒྱུན་རིགས་གནས་ཀྱི་ལང་ཚོ་དོན་ངོ་མ་ཞིག་སྨིན་མ་ཐུབ་པའི་དེང་གི་དུས་ཀྱི་ཆར་འདི་ལ་མཚོན་ན་གནའ་དེང་ཟུང་འབྲེལ་གྱི་སྒྱུ་རྩལ་ཞིག་མཐོང་བར་དཀོན་པ་ནི་དཔེ་ཉིན་སྐར་བཞིན་ཅེས་བཀོད་ན་ཅི་མི་རུང་། རྒྱུ་མཚན་དེ་ལྟར་གྱིས་མཚོན་པའི་ཁ་སོང་དེ་རིང་། གར་སྟེགས་ཤིག་ནས་གནའ་དེང་ཟུང་དུ་འབྲེལ་བའི་སྒྱུ་རྩལ་གྱི་རང་མདངས་ཤིག་ངོམ་གྱི་འདུག་པའི་སྒྱུ་རྩལ་ནི་ངའི་གླེང་མོལ་ཐུང་ངུ་འདི་འམ་ཡང་ན་དེ་འབྲི་བའི་རྐྱེན་ཏེ་བག་ཆགས་ཞིག་གི་རུམ་ཁ་ནས་དུས་རྟག་ཏུ་བོར་མ་མྱོང་བའི་སྒྱུ་རྩལ་དེ་རེད་ལ། མིང་དུ་བོས་ན། ཁྱུང་པོའི་རས་པའི་སྒྱུ་རྩལ་ཁོ་ན་ལས་མ་འདས། སྤྱིར་འཇིག་རྟེན་གྱི་འཚོ་བའི་ཁྲོད་ན། གླུ་ལེན་པ་དང་། བྲོ་འཁྲབ་པ་སོགས་ཀྱིས་མཚོན་པའི་དམངས་ཁྲོད་ཀྱི་སྲོལ་རྒྱུན་རིགས་གནས་གྲངས་ལས་འདས་ཤིང་། དེ་དག་ལ་ཡང་ཡོད་ཚད་ཀྱང་སྒྱུ་རྩལ་གྱི་མ་གཞིས་སྟོང་སོང་བ་ཞིག་མ་རེད་དེ། འོན་ཀྱང་དེ་དག་སུ་ལ་མཚོན་ན་སྒྱུ་རྩལ་གྱི་རབ་འབྲིང་ཟེར་བ་སྒྱུ་རྩལ་གྱི་ཆུ་ཚད་མཐོ་དམན་མང་དུ་ཡོད་པ་ལས། དེང་རབས་ཀྱི་གླུ་དང་བྲོ་ཡི་རིགས་མང་ཆེ་བ་ཞིག་ནི་ཕར་ཆེར་སྒྱུ་རྩལ་གྱི་ཕྱོགས་ནས་སྟོང་སོང་བ་འདྲ་ཞིག་རེད། བྲོ་ཞིག་འཁྲབ་ཚེ་ལུས་ཀྱི་སྟངས་སྟབས་རེ་རེའི་བར་ན་བཙན་དབང་གིས་བཅོས་བསྒྱུར་དུ་མ་ཞིག་དང་། གླུ་ཞིག་བླང་ཚེ་དབུགས་ཀྱི་ཡུན་ཚད་རེ་ལ་དབྱངས་འགྱུར་བཅུ་ཕྲག་གྲངས་མེད་དུ་འབྱུང་གི་ཡོད་པས་ཡིན། རས་པ་ཞེས་གནའ་བོའི་ཡུལ་སྲོལ་མ་ཉམས་པའི་སྟེང་ནས་བྲོ་དེ་འཁྲབ་ཚེ་སིལ་སྙན་གྱི་དབྱངས་རྟ། རྔ་རྡུང་གི་རང་སྒྲ། སྨན་ཆུང་གི་མཛེས་སྐོར། སྟག་ཤར་གྱི་ཤེད་སྐོར། ལུས་ཀྱི་ཉམས་འགྱུར། ངག་གི་གྲགས་སྟང་། མདོར་ན་དེ་དག་ཡོད་ཚད་སྒྱུ་རྩལ་གྱི་བདག་པོ་རྐྱང་རྐྱང་དུ་གྲུབ་ཡོད་པས། སྒྱུ་རྩལ་དེ་དག་ཕྱོགས་གཅིག་སྡོམ་ན་ཕུལ་བྱུང་གི་སྒྱུ་རྩལ་ཞེས་བསྔགས་པ་ནི་དོན་དུ་བདེན་པ་ཁོ་ན་མ་ཡིན་པ་ནི་ཅི་ལ་སྲིད།    

                             རྨད་བྱུང་ཞང་ཞུང་མེས་པོའི་གནའ་སྲོལ་གྱི། 
                                 དོན་གྱིས་ཕྱུག་པའི་སྒྱུ་རྩལ་རེ་རེ་ཡང་། 
                           ཉེར་གཅིག་དུས་རབས་གསར་པའི་རུམ་ཁ་ནས། 
                         སླར་ཡང་དགེ་མཚན་སྟོང་གིས་འཁྲུངས་འདི་རྨད། ཅེས་སྨྲས་སོ།
སྐད་ཆ་ལ་རྫོགས་མཐའ་མེད་ལ། གཏམ་བཤད་ལ་ཟད་མཐའ་མེད་པས་འདི་ལྟར་གྱི་གླེང་མོལ་ཞིག་འབྲི་བ་ལ་རྫོགས་མཐའ་ག་ལ་ཡོད། འོན་ཀྱང་ངས་བསམ་པའི་དྲན་སྣང་རེ་རེས་སྨྱུག་ཁ་དཀྱུས་ཏེ་གཏམ་གླེང་གི་འགོ་འཛིན་པ་ནས་མཐར་བསམ་པས་བཙན་རྫོང་ཞིག་གིས་རྩོམ་ཡིག་འདིའི་དངོས་ཡོད་ཀྱི་བརྗོད་བྱ་དུམ་བུ་ཤོག་སྟེང་དུ་བཀོད་ཟིན་པ་ལྟ་བུ་ཞིག་རེད་འདུག་པའི་མཚམས་འདིར་སླེབས་དུས་ཕྱིར་དྲན་གྱི་མིག་ཟུར་ཙམ་གྱིས་བལྟས་ན་རྩོམ་ཐུང་འདིའི་ནང་དུ་འཁོད་དགོས་པའི་གཏམ་རེ་འགའ་ལུས་འདུག་པའི་ཚོད་ལྟ་བུ་མཐོང་གི་འདུག། དེ་ནི་གལ་ཆེ་ཤོས་གཅིག་སྟེ། མཐར་མཇུག་ངས་རས་པའི་སྒྱུ་རྩལ་ལ་བཅངས་བའི་བརྩེ་སེམས་ཀྱིས་བསྐུལ་བའི་ཤིས་བརྗོད་ཉུང་ངུ་དེ་ཡིན་པ་སྟེ། ཁྱུང་པོའི་རས་པའི་སྒྱུ་རྩལ་དེ་སྒྱུ་རྩལ་གྱི་ཡང་རྩེ་དུ་བསྔགས་པ་ནི་ངའི་སེམས་འགྱུ་གསར་པའི་སྒོམ་སྟངས་ཞིག་ཡིན། དེའི་ཕྱིར་ངས་ཤིས་བརྗོད་ཀྱི་གཏམ་བཟང་དེ་ལ་གཏད་ན་མི་རུང་བ་ཞིག་ནི་མ་མཆིས་སོ། དོན་དུ་སྒྱུ་རྩལ་དེ་ཉིད་གནའ་ནས་ད་བར་མཚོ་བོད་མཐོ་སྒང་དུ་སྒྱུ་རྩལ་གྱི་གསོན་ཤུགས་མ་ཡལ་པར་དུས་རབས་ཀྱི་ཁྲོད་དེར་གནས་མྱོང་ཡོད། དེ་ལྟར་མ་འོངས་པའི་དུས་དེ་དག་ལ་མཚོན་ན་ཡང་གོ་ལ་ཧྲིལ་པོ་འདིའི་མཁའ་དབྱིངས་ནས། མདུན་སྤྱོད་ཀྱི་གོམ་སྟབས་མགྱོགས་པོས་སྒྱུ་རྩལ་གྱི་ཡང་རྩེ་དེ་ན་རྒྱལ་ཁའི་རང་རྟགས་ལེན་བཞིན་མི་ཡུལ་གྱི་གར་སྟེགས་འགྲམ་ནས་རྔ་གཤང་གི་དབྱངས་འགྲོས་དང་ལྷན་དུ། འཁྲབ་སྟོན་གྱི་གཡང་ཁྱིམ་དེ་ནས་ཤེད་སྐོར་དང་མཛེས་སྐོར་ངོམ་བཞིན་སྒང་པ་ཚང་གི་བྲོ་ར་ཁྲ་མོའི་གཟི་བརྗིད་དང་ངོ་མཚར། རྒྱལ་ཁ་དང་མཚན་སྙན། རླུང་རྟ་དང་དབང་ཐང་། མདོར་ན་ལེགས་ཚོགས་ཀྱི་ཉིང་བཅུད་ཟབ་མོའི་རྒྱན་དུ་འགྱིང་བཞིན་ནམ་ཞིག་འཛམ་གླིང་གི་ཡང་རྩེ་དེ་ན་ཆེས་དཔའ་བའི་སྒྱུ་རྩལ་གྱི་སྣང་བརྙན་རེ་དང་། འཇིག་རྟེན་འདིར་ཡོད་ཚད་ཀྱིས་དུང་གྲགས་པའི་རྩེད་ར་ཞིག་ཁྱེད་དམ་མིང་དུ་བོས་ན་ཁྱུང་པོའི་རས་པའི་སྒྱུ་རྩལ་གྱིས་བསྐྲུན་འོང་བའི་རེ་བ་དང་བཅས་ཏེ་ད་ངོ་མ་གླེང་སྟེགས་ནས་གཏམ་ཐུང་འདིའི་མཇུག་བསྡུས་པའོ།  །
                  ཀ་རུའི་ཡུལ་ནས་མི་རྐྱང་འཁྱམས་ཐེངས་ཤིག།
                     ཁ་བའི་ལྗོངས་ཀྱི་ཞང་ཞུང་བོན་པོའི་སྲོལ། 
                 ག་ལེར་མིག་ཟུང་གཅིག་གིས་མཐོང་ཙམ་གྱིས། །
                  ང་དང་སྨྱུག་རྩེའི་བསྔགས་བརྗོད་ཤོར་ཟིན་ཐལ།
                                                                      ༢༠༡༡ ༨ ༥ཉིན་སྟེང་ཆེན་ནས།