བགྲངས་བྱ་ཁྲི་ཕྲག་གི་བང་རིམ་བརྩེགས་པའི་ཁ་སོང་།བསིལ་རླུང་གིས་མ་སྒྲིབ་པའི་ཉི་མ།

འཆར་སྤྲིན་གྱིས་མ་གཡོལ་བའི་ཟླ་གཞོན། དོན་དུ་སྐར་ཚོགས་བཞིན་བཀྲ་བའི་དྭངས་གཙང་གི་ཉི་ཟླ་ཆ་འགྲིག། འདི་ནས་ཡར་བརྩིས་པའི་ལོ་ངོ་ཁྲི་སྟོང་དུ་མའི་རིང་ལ་གསོན་ཤུགས་ཀྱི་འོད་སྣང་ལ་ཉམས་པ་མེད། དུས་རབས་དང་འཕོ་འགྱུར་སྟོང་གི་ཁྲོད་ན་སྙན་འཇེབས་ཀྱི་དབྱངས་རྟ་མཆེད་བཞིན་ངེད་ཚང་གི་མཁའ་དབྱིངས་ནས་ཁ་འབབ་རྣམ་བཞི་ལས་རིང་བའི་ལོ་རྒྱུས་ཀྱི་རི་བོ་བསྐྲུན། དུས་རབས་ཉེར་གཅིག་པའི་ཡར་སྔོན་ཞིག་ན་སྔོ་ལྡེམ་ལྡེམ་གྱི་ལོ་འདབ་རེ་རེ་ནི་ཁྱོད་ཀྱི་ཚེ་སྲོག་ཡིན་ལ། དེའི་ཕྱིར། སྟོན་རླུང་གི་ཁུར་བཞིན་པའི་ལྕང་ལོ་དེ་དག་ཁྱོད་ཀྱི་རྒུད་པ་མ་ཡིན་ནམ། སྐབས་དེ་དུས་གོང་གི་མགོ་དཔོན་དང་འོག་གི་སྡེ་འབངས་ཡོད་ཚད་ཀྱིས་ཁྱེད་ལ་ཡིད་སྨོན་གྱི་བསྔགས་བརྗོད་མང་ཞིང་། ལས་རླུང་གི་མེ་ཏོག་འབུལ་མྱོང་། ད་དུང་མེས་པོ་ཞིག་གིས་རྗེས་རབས་ཚོའི་ཆད་དུ། རྔུལ་ཆུའི་ཐིགས་ཕྲེང་རེ་རེས་མཛད་བཟང་བསྐྱངས་པ་ནི་ཁྱེད་ཁོ་ན་འཚོ་བསྐྱོངས་བྱེད་པ་དེ་ཡིན་སྐད། འོན་ཀྱང་འཇིག་རྟེན་ནི་མི་རྟག་པའི་རང་གཤིས་ཞིག་གམ། འཕོས་འགྱུར་ནི་འཇིག་རྟེན་གྱི་རང་གཤིས་གསོན་པོ་ཞིག་ཏུ་གྲུབ་པས། དུས་རབ་ཀྱི་སྐྱོག་མཚམས་འདིར་སླེབ་དུས་ཆེས་བཙན་ པའི་ཁ་ལོ་བ་ཞིག་གིས་རང་ཉིད་ཀྱི་ལས་དབང་རླགས་བཞིན། སྐད་དང་ཡི་གེ།  ཁྱེད་དང་ང་། ང་དང་ཁྱེད་གཉིས་ཀྱི་བར་ན་ཆེས་རིང་བའི་བར་ཐག་ཞིག་བསྐྲུན་སྟེ། གས་ཆགས་ཀྱི་དོན་ཞིག་ཏུ་མཚོན་པའི་གཏམ་ཕྲེང་གི་གོ་རིམ་སྒྲིག་བཞིན། ཡིད་སུན་པའི་རྣམ་ཐར་བྲིས་སོང་། སེམས་སྐྱོ་བའི་ན་ཟུག་སྦྱིན་བྱུང་། དེ་ནི་ངའི་མྱོང་ཚོར་ཞིག་སྟེ་ཁྱེད་ཀྱི་གྱོན་རྒུད་ཡིན། ཨ་ཁ་ཁ།

                                              2011 9 24/ཉིན་སྟེང་ཆེན་ནས།