རྒྱལ་ཁམས་འདི་གླུ་རུ་སྒྱུར་འདོད།།

བསམ་བློ་ཡི་ཁ་ཕྱོགས་ཐད་དུ།།

                           སྨྲ་བརྗོད་ཞིག་རང་དབང་ཡོད་ན།།

ཚོར་སྣང་དེ་དམར་རྗེན་ཕུད་དེ།།

རྒྱལ་ཁམས་འདི་གླུ་རུ་སྒྱུར་འདོད།།

ན་དམར་གྱི་མེ་ཏོག་གསེབ་ན།།

ནོར་ལུག་དང་རྩེད་གར་སྡེབ་པའི།།

འབྲོག་ཕྲུག་ཚོ་གླུ་སྒྲའི་གསེང་ནས།།

སྙན་ངག་གི་འོ་དྲི་འཐུལ་ཤོག།

དཔྱིད་དཔལ་གྱི་ལྗང་བུའི་ཚལ་དུ།།

འབྲས་བཟང་གི་སྙེ་ལོ་འཐུ་བའི།།

རོང་ཕྲུག་ཚོ་གོམ་སྟབས་བར་ནས།།

སྙན་ངག་གི་རྩམ་དྲི་འཕྱུར་ཤོག།

ཕྲ་ལྡེམ་དང་ལུས་ཤ་དཀར་ཞིང་།།

རེག་འཇམ་གྱི་ཚ་དྲོད་མཆེད་པའི།།

ཡིད་འཕྲོག་མ་གངས་རིའི་བུ་མོ།།

སྙན་ངག་གི་ལང་ཚོ་ངོམ་ཤོག།

སེམས་ཁོང་ན་མཛའ་བའི་སྙིང་སྡུག།

གྱེས་བྲལ་གྱི་ན་ཟུག་ལྕི་བའི།།

རོགས་མེད་ཀྱི་ཁེར་རྐྱང་འཁྱམ་པོ།།

སྙན་ངག་གི་མིག་ཆུ་བཞུར་ཤོག།

ལོ་ཆུང་གི་རྩེད་རའི་ཁྲོད་ནས།།

ལུས་སེམས་དེ་དགའ་སྤྲོས་ཁེངས་པའི།།

གཤིས་བཟང་གི་བུ་དང་བུ་མོ།།

སྙན་ངག་གི་དགོད་སྒྲ་ཁྲོལ་ཤོག།།

གནམ་འོག་གི་འཇིག་རྟེན་འདི་ལ།།

དགའ་སྐྱོ་དང་ཆགས་སྡང་ཁྲོད་དུ།།

སྐྱིད་སྡུག་གི་འཚོ་བ་རོལ་ཞོར།།

སྙན་ངག་གི་ཚེ་སྲོག་གླེང་ཤོག།

རང་རྩལ་གྱི་བསམ་བློའི་གྲུབ་ཆ།།

དྲང་པོ་རུ་སྨྲ་བར་འདོད་ན།།

ཚིག་གསར་གྱི་གོ་ས་འགོག་པའི།།

མངོན་བརྗོད་དེ་དགོས་དོན་ཅི་ཡོད།།

རྣམ་རྟོག་གི་དྲན་འཆར་གསོན་པོ།།

སྡེབ་ལེགས་ཀྱི་དབྱངས་ལ་བསྐྱོན་དང་།།

གང་དྲན་གྱི་ཚིག་འཁྱམ་དེ་ལ།།

སྙན་ངག་གི་རིན་ཐང་མངོན་སྲིད།།

བརྗོད་མཁན་གྱི་བསམ་བློའི་གཤིས་དང་།།

སྨྲ་མཁན་གྱི་ལྟ་བའི་ཕྱོགས་གཉིས།།

མཐུན་གྲུབ་གྱི་ཚིག་སྦྱོར་རིགས་ལ།།

བྲོ་བ་ནི་ཧ་ཅང་ཆེར་སྙམ།།

འབྲིང་རྒྱུད་པས་ ༢༠༡༢ལོའི ༦ ཚེས ༢༡  ཉིན་སློབ་གླིང་དུ་བྲིས།།