དད་གསུམ་གསེར་གྱི་ཨ་ལུང་།།

འཇིག་རྟེན་འཁོར་བ་འདི་ལ་འགྲས་ཡ་རུ་བཟུང་སྟེ།།

རེ་སྒུག་ལྷ་ལ་བྱས་ནས་མི་ཚེ་འདི་རྫོགས་རན།།

དད་གསུམ་གསེར་གྱི་ཨ་ལོང་སྙིང་ཁར་ནས་བཟེད་ཡོད།།

མ་འགྱང་ཐུགས་རྗེའི་ལྕགས་ཀྱུ་ད་ལྟ་ནས་གཡུག་ཤོག།

ཚིག་སྐམ་ཐོད་ལ་ཕྱར་བའི་ཐ་སྙད་ཀྱི་མཁན་པོ།།

ལྟ་བ་ཁ་ནས་འཁྱེར་བའི་སྨྲ་ལྕེ་དེ་བདེ་ཡང་།།

དཔྱད་འཇོག་ཟུང་གི་དྲངས་པའི་རྟོགས་པ་ཞིག་མེད་ན།།

ཀོ་བ་རླུང་གིས་གྱོང་བའི་རང་རྒྱུད་དེ་ནམ་ཐུལ།།

ཞི་ལྷག་གྲོགས་དང་བྲལ་བའི་ལུས་ཚུགས་དེ་བསྲང་བཞིན།།

བྱིང་རྒོད་ཁ་ལོ་ཤོར་བའི་བྲག་ཕུག་གི་སྒོམ་ཆེན།།

བསམ་པས་རྒྱལ་ཁམས་བསྐོར་བའི་རྣམ་ཐར་དེ་མཐོང་ན།།

ལུས་སེམས་ལྷ་རུ་འགྱུར་བའི་གོ་སྐབས་ཤིག་སྲིད་དམ།།

ཡེ་རིག་གཤིས་གྱི་ལྷ་མོའི་རང་ཞལ་དེ་མ་མཇལ།།

གཉིས་འཛིན་གར་དུ་བསྒྱུར་བའི་རྣམ་རྟོག་གི་འདྲེ་མོ།།

སྟོང་ཁམས་སྒྱུ་མའི་གྲོང་ལ་དངོས་རྒྱུག་ཞིག་བྱས་དུས།།

སྣང་བ་ཁྲ་ཁྲ་བཟོས་པའི་ཆོ་འཕྲུལ་འདི་རྒོད་པ།།

ཐམས་ཅད་བློ་ཡི་བཏགས་ལ་ཡིད་ཆེས་ནི་ཆེ་ཡང་།།

འདི་སྣང་སྒྱུ་མར་གཟིགས་པའི་ཉམས་རྟོགས་དེ་མེད་དུས།།

སྐྱིད་སྐྱིད་སེམས་ལ་སྒོམ་ཡང་སྡུག་བསྔལ་གྱི་རང་བཞིན།།

འཚོ་བ་དངོས་འགྱུར་འདི་ལ་བཟོད་ཐབས་ཞིག་མི་འདུག།

རིག་ཚད་ལེན་ལ་རྔམ་པའི་ཧམ་སེམས་ནི་ཆེ་བ།།

མི་འདོད་རིང་ལ་དོར་བའི་ནུས་པ་དེ་མ་ལྡན།།

ཉིན་གཅིག་དལ་དུ་མེད་པར་བྲེལ་ཟིང་གི་རང་བཞིན།།

འཇིག་རྟེན་མི་ཡུལ་འདི་ནི་སྐྱིད་པོ་ཞིག་མ་མཐོང་།།

ལོ་ཟླའི་འཁོར་འགྲོས་འོག་ནས་ལང་ཚོ་ནི་ཤོར་ཞིང་།།

མང་མང་གཞུང་ལ་འཇུག་ཀྱང་སྒྲོ་འདོགས་ནི་མ་ཆོད།།

ཡུན་རིང་དཀའ་སྡུག་མྱངས་བའི་འབྲས་རྟགས་དེ་བསམ་ན།།

རང་བློ་ཁབ་མིག་ཙམ་དེ་བདེ་བ་ལ་མ་གནས།།

༢༠༡༢།༨།༡༤།དགོང་མོར་བྲིས།།