གྲྭ་ས་བ།།

                        ས་སྟེང་གོ་ལ་ཧྲིལ་པོའི་ཕྱོགས་གང་ནས།།

འདྲིས་དང་མ་འདྲིས་ཤར་ནུབ་མི་རིགས་སྟོང་།།

མ་བོས་ལྷན་འཛོམས་དམར་སེར་སྡེ་བའི་ཁྱུ།

ཞི་མཐུན་མདུད་བརྒྱ་དམ་པའི་གྲྭ་ས་བ།།

སྲིད་དང་རྒྱུད་པས་གོ་ས་མ་བླང་ཞིང་།།

བློ་གསར་མགོ་ཟླུམ་ཚོགས་པའི་མར་གཤམ་ནས།།

གཞུང་ལུགས་མཁྱེན་དཔྱོད་ཡངས་པའི་འབྲས་རྟགས་ཀྱིས།།

མང་འདུས་གྲལ་གོང་ཕེབ་མཁན་གྲྭ་ས་བ།།

བཙན་པོ་ཡིན་ཟེར་མཐོ་ལ་མཆོང་ས་མེད།།

གཉོམ་ཆུང་ཡ་རབ་དམའ་ལ་སྙིགས་དོག་མེད།།

སྒྲིག་ལམ་མདའ་ཡིས་ཕྱེས་པའི་རིས་ཁ་ནས།།

ཡང་པའི་གོམ་སྟབས་བསྒྱུར་མཁན་གྲྭ་ས་བ།།

ངེས་མེད་གནས་ཡུལ་འགྲིམ་ཡང་རང་སྣང་སྤྲོ།།

འཚོ་བ་ཙམ་རྐྱང་ཞིག་གིས་ལུས་ཉམས་བརྒྱགས།།

ལུས་གོས་སྔོ་དམར་སེར་གྱིས་གཞན་ཡིད་འཕྲོག།

རང་སེམས་སྐྱིད་ལ་འཁོད་པ་གྲྭ་ས་བ།།

 རི་ཆུ་སྟོང་ཕྲག་བརྒལ་ལ་ཉམས་མི་ང་།།

གཞན་དོན་སྲོག་ལ་ཐུག་ཀྱང་འཆི་ཕོད་པ།།

བསྟན་ལ་ལྷག་བསམ་དཀར་བའི་མི་བུ་དེ།།

ལོ་ཆུང་སྙིང་སྟོབས་ཆེ་བ་གྲྭ་ས་བ།།

རིགས་རུས་མཐོ་ཞེས་ཁྲི་ལ་མི་འདེགས་ཤིང་།།

སྤྲུལ་པའི་སྐུ་ལོ་སྒོར་གྱིས་མི་བསུ་བར།།

བསླབ་གསུམ་དོན་དང་ལྡན་པའི་སྐྱེས་མཆོག་གང་།།

མོས་འདུན་བློ་ཡིས་བཀུར་མཁན་གྲྭ་ས་བ།།

མི་ཚེ་གཅིག་གི་བདེ་སྐྱིད་ཁོ་ན་དང་།།

གླ་ཕོག་ཆེད་དུ་གཞུང་བསྐྱོད་སློབ་གྲྭ་བར།།

ཕུག་བསམ་མི་མཐུན་འདི་ཕྱི་གཏན་བདེའི་དོན།།

འཛེམ་མེད་ངལ་བརྒྱས་གཉེར་མཁན་གྲྭ་ས་བ།།

ཕ་དང་ཁུ་བོས་བརྩེགས་པའི་ཁང་བཟང་དང་།།

མ་དང་སྲུ་མོས་བསོགས་པའི་རྒྱུ་ནོར་ཡི།།

ཁྱིམ་བདག་ཞིག་གི་གོ་ས་མ་བཙལ་ཞིང་།།

གཞིས་འཁོར་ཁ་བྲལ་ཕོད་མཁན་གྲྭ་ས་བ།།

ཕྱི་གླིང་རྒྱ་གར་ཡུལ་ལ་སོང་ཡང་རུང་།།

རང་དབང་མི་སྟེར་རང་ལུས་འཆིང་པའི་ཐག།

སྙིང་ན་ཉེ་བའི་བུ་དང་ཆུང་མ་མེད།།

རང་བློ་ཁེར་གཅོད་ནུས་མཁན་གྲྭ་ས་བ།།

རང་ལྟ་གཅིག་པུ་མཆོག་ཏུ་མི་འཛིན་ཞིང་།།

འཛམ་གླིང་གཟུར་གནས་མཁས་པའི་སྤྱན་སྔ་རུ།།

བདེན་དོན་བློ་ཡིས་འཚོལ་བའི་དཔྱོད་ལྡན་དངོས།།

རྒྱལ་ཁམས་རིག་པས་བསྐོར་མཁན་གྲྭ་ས་བ།།

 མཐོ་མིང་ཐོག་ཚད་མགོ་བོ་མི་སྒུར་ཞིང་།།

དམའ་སར་ལུས་ཚད་སྣ་གཉེར་མི་སྟོན་པར།།

དྲང་བདེན་ལས་དང་ཚུལ་མཐུན་སྤྱོད་པ་དེས།།

བཟང་ངན་མི་གཞི་འབྱེད་མཁན་གྲྭ་ས་བ།།

རྫིག་ཚད་མཛེས་ཚད་གྲོགས་སུ་བཀུག་མ་མྱོང་།།

ངན་ཚད་གཟན་ཚད་གཡོག་ཏུ་བཀོལ་བ་མིན།།

རང་ལུས་ཤོང་ཙམ་རང་ཤག་གྲུ་བཞིའི་ནང་།།

རོགས་མེད་ཁེར་འདུག་ཕེར་མཁན་གྲྭ་ས་བ།།

  སྐབས་གསུམ་པའི་ཚད་མའི་རིག་སྒྲ་ཆེན་མོའི་དམ་བཅའ་གྲོལ་རྗེས་སུ་ཁྱུང་དཀར་འདུས་སྡེ་འཁྱིལ་བའི་གླིང་སྨད་འབོ་ཤིང་ལོ་མ་རྒྱས་པའི་རྩར་༢༠༡༢ ། ༦ ། ༢༩།ཉིན འབྲིང་གི་གཡུང་ཕྲིན་པས་བྲིས།།