རྗེ་མཁན་སློབ་རྣམ་གཉིས་སྐུ་ཚེ་རིང་།།

འཛམ་གླིང་གཡས་སྐོར་བྱེད་པའི་སེར་ཆེན་གྱི་ཉི་མ།།

ཞོག་པའི་སྐྱ་རེངས་གསར་པས་ཤར་རྩེ་ནས་བསུས་སྐབས།།

སྨན་གྱི་ཁྲི་འཛིན་ཆེན་མོ་ཡིད་ངོར་ལ་ཕེབས་དུས།།

དད་པའི་ལྷ་ཕྱག་ཡང་ཡང་བོད་ཡུལ་ནས་བཙལ་ཡོད།།

ཐུན་གསུམ་མུན་པ་བསལ་བའི་མཁའ་དབྱིང་གི་ཟླ་གཞོན།།

བོད་རྒྱལ་པེ་ནེ་རི་ཡི་རྩེ་མོ་ནས་མངོན་དུས།།

སྨྲ་དབང་ཡོངས་འཛིན་ཆེན་མོའི་འཛུམ་ཞལ་དེ་དྲན་ནི།།

སྙིང་གིས་གསོལ་བ་ཚིག་གསུམ་ཁྱེད་ཕྱོགས་སུ་བཏབས་ཡོད།།

མཆོག་སྐུ་གསེར་གྱི་ལྷུན་པོ་ཕྱི་གླིང་ན་བརྗིད་ཅིང་།།

མཛད་ཕྲིན་འོད་ཞག་སེར་པོས་ཤར་ནུབ་ཀུན་ཁྱབ་སྟེ།།

གསུང་གདམས་ལྷ་ཆབ་དྭངས་མ་རྣ་བ་རུ་ལྷུང་ཚེ།།

དགའ་སྤྲོས་སོ་དཀར་བཏུམ་པའི་མཆུ་པགས་དེ་བཅོམས་སོང་།།

དུས་འགྱུར་འདྲེ་རླུང་ནག་པོ་འཚུབ་སྐོར་གྱི་ནང་དུ།།

བསྟན་དོན་སྲོག་ལས་དམར་བའི་ཞྭ་དཀར་གྱི་མགོན་གཉིས།།

རི་ཆུ་སྟོང་གིས་བཅད་པའི་རྒྱ་བལ་གྱི་ཡུལ་དུ།།

མདའ་མཚོན་དྲག་སེར་ཕབས་པའི་སོ་ལམ་ནས་ཆས་དུས།།

བསུ་སྐྱེལ་ཁ་འཛིན་གནང་བའི་མ་གཅིག་གི་བདེ་འགྲོ།།

བསྟན་འཛིན་བུ་ལ་མོས་པའི་དམ་ཅན་གྱི་སྡེ་ཚོགས།།

ལྷ་སྲུང་སྡོང་གྲོགས་ཅན་ལ་གཏང་རག་གི་དཔའ་དར།།

ལོ་ཟླ་དུས་ཀྱི་གསོལ་ཁའི་མཆོད་པ་དེ་མི་བརྗེད།།

གཞིས་འདུག་དམར་སེར་གྱོན་པའི་ལོ་ཆུང་གི་ཚོགས་རྣམས།།

ཁ་རྩང་དི་རིང་འགྲོ་ལམ་ཐིག་སྐུད་ལས་དོག་ཀྱང་།།

རྒྱང་རིང་ནགས་ཀླུང་ཁྲོད་ཀྱི་རྒན་སློབ་ཚོའི་སྐུ་ཁམས།།

དྭངས་བཟང་བདེ་འཚམས་གནས་པས་སྤོབས་པ་དེ་མི་ཞུམ།།

༢༠༡༢། ༨།༤།  ཉིན་བྲིས།།