རང་མི་རིགས་རྗེས་ལུས་དེ་ལ་ཐུག།

                       དེང་བླུན་རྨོངས་མདུན་ལམ་ལྟག་སྒོས་ཕྱེས།།

                      ཤེས་རིག་གནས་མེད་ཚད་གོ་སར་སླེབས།།

                      མཁས་རྣམ་དཔྱོད་ཅན་དེ་དམའ་ལ་ལྷག།

                      རང་མི་རིགས་རྗེས་ལུས་དེ་ལ་ཐུག།

                      ཡུལ་མཐོ་སྒང་གོ་ལའི་གཞིས་ཁྱིམ་ནང་།།

                      རིགས་གཅིག་པའི་རྒས་དང་གཞོན་གཅེས་ཚོ།།

                     རོགས་ཕན་ཚུན་བརྩི་འཇོག་མེད་པ ་དེས།།

ཤེས་གོ་བ་མེད་པའི་རྟགས་མཚན་མངོན།།

གཞུང་མཐོ་རིམ་འགྲིམ་པའི་སློབ་མ་ཚོ།།

ཁ་གླ་ཕོགས་ཙམ་ལ་མ་གདངས་པར།།

གངས་རེ་བ་ཅན་གྱི་ཁོར་ཡུག་འདིར།།

བཟང་ཆབ་དཔལ་རིག་གནས་གསར་བཏོད་དགོས།།

རིགས་མི་གཅིག་གྲུབ་མཐའ་འདུས་པའི་ཁྲོད།།

གཞུང་ཚིག་གསུམ་གོ་བ་མ་ཆགས་པར།།

ཐོབ་སྒོར་གྱིས་ཉོས་པའི་དགེ་རྒན་དེ།།

གཞོན་མདུན་ལམ་བརླག་པའི་ཕུང་འདྲེ་དངོས།།

ངོས་འཛུམ་དཀར་ལྷན་དུ་མཐུན་འབྲེལ་གླེང་།།

ཁ་བསྐོར་ནས་ལྐོག་བཤད་ཁྲོམ་ལ་བསྒྲགས།།

དོན་སྤྱི་སེམས་བོར་བའི་མགོ་འཛིན་མཁན།།

དགོན་སྡེ་བར་དཀྲུག་པའི་འབར་རྫས་རེད།།

ཉིན་གཅིག་ལ་ཐོས་བསམ་མ་ནུས་པར།།

ཁྲིམས་སླབས་པ་ཉམས་པའི་ཚུལ་འཆལ་འགས།།

གོས་དམར་སེར་གྱོན་པ་སྒོར་མོའི་ཆེད།།

སྡེ་རྒྱུས་མེད་མགོ་བོ་སྐོར་ཚོད་གྱིས།།

མགོ་སྐྲ་ལོ་དམར་པོ་གནམ་ལ་གཟེང་།།

རྐུབ་གཞོང་ཤ་རློན་པ་ཕྱི་ལ་ངོམས།།

རྒྱན་བོད་ལ་ཕུད་པའི་བུ་མོ་དེ།།

གངས་གཤིས་བཟང་མཛེས་མའི་ཞབས་འདྲེན་རེད།།

བྱམས་ཕ་མའི་ངག་ལ་མི་ཉན་པར་།།

བཟང་ཡར་དཔེ་ལྟ་བའི་བློ་མིག་ཞར།།

ངན་གཡོ་རྫུན་ཅན་གྱི་ཕོ་འཁྱམ་ཚོ།།

སྨྲས་བཞག་ན་མི་ཡི་ཕྱེད་ཀ་ཞིག།

༢༠༡༢།༩།༡༥།