ཤུགས་རྐྱེན་ཞིག་གིས་རང་ཚུག་ཤོར་བའི་མི་རིགས།།
མི་རིགས་གཞན་གྱིས་སློབ་གསོའི་ཤུགས་རྐྱེན་འདིས་།།
རང་ཚུགས་མི་ཐུབ་ཕྱི་མིའི་ལད་མོ་བྱེད།།
གཞན་གྱི་རྐང་འོག་ཚུད་དོགས་ཡིད་ལ་མེད།།
མི་རིགས་གཞན་གྱིས་སློབ་གསོའི་ཤུགས་རྐྱེན་འདིས།།
ངོ་ཚ་མེད་པར་ཁྲོམ་ལ་གཅེར་རྒྱུག་བྱེད།།
རིགས་གཅིག་སྤུན་ཟླས་ཁྲེལ་དོགས་ཡིད་ལ་མེད།།
མི་རིགས་གཞན་གྱིས་སློབ་གསོའི་ཤུགས་རྐྱེན་འདིས།།
སྐད་ཡིག་ཆ་ལུགས་ར་མ་ལུག་ཏུ་བསྒྱུར།།
བོད་པའི་ཞབས་འདྲེན་འགྱུར་དོགས་ཡིད་ལ་མེད།།
མི་རིགས་གཞན་གྱི་སློབ་གསོའི་ཤུགས་རྐྱེན་འདིས།།
མགོ་བདེ་དྲན་འཕྲུལ་སྔོན་ཐོན་རྒྱུ་རུ་བརྩི།།
དྲང་བདེན་མི་བུས་འཕྱ་དོགས་ཡིད་ལ་མེད།།
མི་རིགས་གཞན་གྱི་སློབ་གསོའི་ཤུགས་རྐྱེན་འདིས།།
ནང་ཆོས་ཟབ་མོའི་གཞུང་ལ་ཡིད་ག་ཆད།།
ཞི་བདེའི་རྩ་བ་བརླག་དོགས་ཡིད་ལ་མེད།།
མི་རིགས་གཞན་གྱི་སློབ་གསོའི་ཤུགས་རྐྱེན་གྱིས།།
གདམས་ངག་རྩ་ཆེན་རྨོངས་པའི་ལོངས་སྤྱོད་མཐོང་།།
ཐར་མེད་ངན་སོང་ལྷུང་དོགས་ཡིད་ལ་མེད།།
མི་རིགས་གཞན་གྱིས་སློབ་གསོའི་ཤུགས་རྐྱེན་གྱིས།།
མི་ཆོས་གཙོ་བོ་བླ་མས་དོན་དུ་གཉེར།།
ལྷ་ཆོས་རྣམ་དག་སྒྲུབ་འདོད་ཡིད་ལ་མེད།།
མི་རིགས་གཞན་གྱི་སློབ་གསོའི་ཤུགས་རྐྱེན་འདིས།།
ལ་ཁའི་དར་ལྕོག་མེ་ལ་གྲྭ་པས་བསྲེགས།།
སྒྲིབ་དང་ཉེས་པས་གོས་དོགས་ཡིད་ལ་མེད།།
མི་རིགས་གཞན་གྱི་སློབ་གསོའི་ཤུགས་རྐྱེན་གྱིས།།
ས་མདོའི་རྡོ་འབུམ་ཆུ་ལ་དགེ་མས་དབྱུག།
སྐྱབས་འགྲོའི་སྡོམ་པ་ཉམ་དོགས་ཡིད་ལ་མེད།།
མི་རིགས་གཞན་གྱི་སློབ་གསོའི་ཤུགས་རྐྱེན་འདིས།།
སྐྱེས་པ་ཕོ་ཡི་གོ་ས་མོ་ཡིས་འཛིན།།
སྐྱེ་བ་མཐོ་དམན་ཡོད་སྣང་ཡིད་ལ་མེད།།
མི་རིགས་གཞན་གྱི་སློབ་གསོའི་ཤུགས་རྐྱེན་འདིས།།
བོད་པའི་ཆ་ལུགས་ཕལ་ཆེར་དོར་ཚར་འདུག།
ཁ་བའི་སྲོལ་བཟང་སྐྱོང་འདོད་ཡིད་ལ་མེད།།
མི་རིགས་གཞན་གྱི་སློབ་གསོའི་ཤུགས་རྐྱེན་འདིས།།
ཞིབ་འཇུག་མཁན་ཚོས་ལུང་རིགས་རྫུན་དུ་མཐོང་།།
ཚད་གསུམ་གཞུང་དང་འགལ་དོག་ཡིད་ལ་མེད།།
མི་རིགས་གཞན་གྱི་སློབ་གསོའི་ཤུགས་རྐྱེན་འདིས།།
གཞོབ་དུད་བཏང་སྟེ་མཁའ་རླུང་བཙོག་ཏུ་བཅུག།
གཙང་རིགས་ལྷ་སྲུང་མནོལ་དོགས་ཡིད་ལ་མེད། །
མི་རིགས་གཞན་གྱི་སློབ་གསོའི་ཤུགས་རྐྱེན་འདིས།།
གད་སྙིགས་བསྲེགས་པའི་གསུར་དུད་གང་སར་བཏང་།།
གཞི་བདག་ཕོག་ཐུག་ཤོར་དོགས་ཡིད་ལ་མེད།།
མི་རིགས་གཞན་གྱིས་སློབ་གསོའི་ཤུགས་རྐྱེན་འདིས།།
འབུ་སྲིན་དུད་འགྲོ་ཡོད་ཚད་ཁ་ཟས་སེམས།།
ཕ་རོལ་སྲོག་ལ་འཚེ་དོགས་ཡིད་ལ་མེད།།
མི་རིགས་གཞན་གྱི་དངོས་གཙོའི་ཤུགས་རྐྱེན་དང་།།
རང་ཚུགས་མི་ཐུབ་རང་གི་ཨ་གསར་འདིས།།
རང་རིགས་བོད་པའི་སྲོག་རྩ་གཅོད་ལ་ཉེ།།
༢༠༡༢།༧།༣༡། འབྲིང་རྒྱུད་པས།།
- ཟིན་ཐོ་གོང་མ།གྲྭ་ས་བ།
- ཟིན་ཐོ་འོག་མ།དབྱར་དུས་ཀྱི་ཕ་ཡུལ།
དུས་ནི་མི་འགྱུར་མི་རྣམས་འགྱུར་བ་ཡིན། ཞེས་པ་ལྟར་མི་རྣམས་རང་ཚུགས་ཤོར་ན་ཅིས་ཀྱང་མི་ཉན་པས་རྩོམ་འདི་དངོས་གནས་ཡག་པོ་འདུགསྐུ་ཉིད་ཕེབས་པར་སྙིང་ནས་དགའ་བསུ་ཞུ།
དྲ་གྲོགས་ལགས་བཀྲ་ཤིས་བདེ་ལེགས། དུས་རབས་ཀྱི་ཤུགས་རྐྱེན་ངན་པའི་འོག་ནས་འཛམ་གླིང་སྤྱིར་འགྱུར་བ་འགྲོ་བཞིན་ཡོད་པ་ལས་བོད་
མིས་རང་ཚུགས་ཤོར་བས་རྒྱུ་མཚན་མིན་པར་སྙམ།
ཡག་པོ་བྲིས་གནང་འདུག་དེ་དངོས་གནས་རངརེད།ད་དུང་མུ་མཐུད་འདི་དང་འདྲ་བའི་བསླབ་བྱ་གནང་རོགས་ཞུ་ལྷ་ས་གཙང་ཚས།ཕེབས་པར་དགའ་བསུ་ཞུ།
