དབྱར་དུས་ཀྱི་ཕ་ཡུལ།།

མཐོ་སྒང་གི་ཡང་རྩེ་

གྲགས་ཅན་གཤེར་གྱི་ལ་མོ

ཁྱོད་བརྒལ་ཉིན་ང་སེམས་པ་སྤྲོ་སོང་།།

གནས་དེ་ནི།   རྫས་འཕྲུལ་ཀྱི་དུག་རླང་མ་ཐེབ།།

མཁའ་རླུང་ནི་དྭངས་གཙང་གཙང་།།

ལྷོ་ཕྱོགས་རྒྱང་རིང་ལ་དལ་གྱིས་བསྐྱོད་པའི།།

སྤྲིན་དཀར་ནི་གཡོ་ལང་ལང་།།

ཁ་བ་བོད་པའི་གཟི་བརྗིད་ཞིག་དང

དར་སེང་བཙན་པོའི་ཕ་ས་ཏེ།།

གངས་དཀར་ནི་འོད་འཚེར་འཚེར།།

གོ་ལ་ཧྲིལ་པོའི་ལ་རྩེ་

གནམ་འདེགས་ཀྱི་ཀ་བ།།

རི་བོ་ནི་མཐོ་སེང་སེང་།

རྫ་སྤང་ངོག་ནས་ལྷུང་ལྷུང་དུ་འབབ་པའི།།

ཆུ་བོ་ནི་དྭངས་གཙང་གཙང་།།

རུ་ཐུར་གནམ་ལ་གཟེངས་བའི་བྲེ་སེར་འབྲོང་ཁྱུ་ཚོའི་འགྲིམ་ལམ་

རྫ་རི་ནི་ངམ་ནག་ནག།

ཡ་ཐོག་འདྲེ་སྲིན་མི་རྣམས་བསྡད་རྗེས།།

བྲག་ཕུག་ནི་སྟོང་ཧབ་ཧབ།།

ལ་ལུང་དང་ནགས་ཚལ་གསེབ་ནས་ཁུ་བྱུག་གི་གྲེ་འགྱུར་སྒྲོག་བཞིན།།

སྨུག་རླངས་ནི་འཕྱུར་ལྷོག་ལྷོག།།

སྐྲ་ལོ་དལ་གྱིས་གཡོ་ཞིང་དབུགས་ལམ་གཙང་སེལ་སྟོན་པའི།།

རླུང་བུ་ནི་འཇམ་སིབ་སིབ།།

དབྱར་རྩྭ་དགུན་འབུ་སྐྱེས་རྩལ་རྒོད་པའི།།

སྤང་ལྗོངས་ནི་སྨུག་ཐིབ་ཐིབ།།

བཞད་འཛུམ་དང་མགོ་ལྕོག་ལྡེམ་བཞིན་མཛེས་སྡུག་གིས་བུང་བ་འགུག་པའི།།

རྩི་ཏོག་ནི་སྣ་མང་མང་།།

སྨན་སྤོས་གི དྲི་བཟང་དང་།།

ལྷ་ཤུག་གི་ངད་པ།།

བ་ལུའི་བསུང་ཞིམ་རྣམས།།

དཔག་ཚད་དང་རྒྱང་ནས་བྲོ་ཚུབ་ཚུབ།།

གཡུ་འབྲུག་དང་གཞའ་ཚོན་གསེང་ནས།།

སྦྲང་ཆར་ནི་དལ་ཟིམ་ཟིམ།།

ཉིན་དང་གསེབ་ན

དྭངས་བསིལ་གྱི་ཟིལ་པ་ཁྲོམ་ཁྲོམ་འཐོར་བའི།།

ཤིང་ལོ་ནི་སྔོ་ཁྱུག་ཁྱུག།

ལྗང་མདོག་གི་རྩྭ་ཐང་ཐོག་ཏུ།།

སྦྲ་གུར་ནི་གྲངས་མང་མང་།།

དེ་བས་ག་ལ་ཚད།

རི་ལུང་ནས་རི་ལུང་ཐམས་ཅད་ནོར་ལུག་གིས་གང་ཞིང་།།

བེའུ་ཆུང་ཚོ་རྩེད་གར་ཤིག་ཤིག 

 མ་འབྲི་ཡི་ངུར་ཤང་འུར་འུར།   གཡང་དཀར་གྱི་འབའ་སྒྲ་དིར་དིར།

 ཅང་ཤེས་ཀྱི་འཚེར་སྐད་ལྷང་ལྷང་།

ཅི་འདྲའི་ཉམས་སྐྱིད་པའི་ཡུལ་དང་འབྲོག་སྡེ་ཞིག།།

།༢༠༡༢།༧།༢༨།