གསར་སྐྱེས་མི་བུའི་འགན་འཁྲི།

ཆ་ལུགས་ལུས་ཀྱི་ཁྲག་དྲོད་དང་།།

སྐད་དང་ཡིག་གེ་བླ་སྲོག་འདི།།

བྲལ་ལ་ཁད་ཀྱི་བོད་པ་ཚོ།།

ཤི་མ་གསོན་གྱི་འཇིག་རྟེན་ཞིག།

ཡབ་མེས་མཁའ་ལ་གཤེགས་པའི་ཤུལ།།

སྡོད་ལུས་བོད་ཕྲུག་ཚོམ་བུ་འདིས།།

བཙན་པོའི་གཞིས་ས་མ་ཟིན་ཐོག།

ཡངས་པའི་རྐང་ལམ་འཕྲང་ལ་གྱུར།།

ང་ཚོ་བོད་ཀྱི་སྐད་ཡིག་འདི།།

གཅེས་སྐྱོངས་རང་གིས་མ་བྱས་ན།།

ལོ་ན་བརྒྱད་བཅུའི་རྒས་པོ་བཞིན།།

འཚོ་བའི་སྲོག་ཐག་འཆད་ལ་ཉེ།།

དབྱར་རྩྭ་དགུན་འབུའི་ཡོང་འབབ་ལས།།

དུས་རབས་ལམ་བུ་མ་མཐོང་པའི།།

བླུན་རྨོངས་ཞིག་གི་འཁོར་ཡུག་ལ།།

སྐད་ཡིག་སློབ་གསོའི་རོགས་རམ་རན།།

རྙིང་ཞེན་སྟོང་གི་བར་གསེང་ན།།

གཉིད་དང་རེ་བ་རྨོངས་གསུམ་ངང་།།

རུལ་དྲི་ཕལ་ལེ་མ་ཉལ་བར།།

དུས་རབ་གསར་པའི་ལམ་ལ་ཆོས།།

སེམས་ཁམས་བདེ་བར་འགོད་པའི་ཐབས།།

ནང་ཆོས་གཞུང་ལས་རྙེད་ཟིན་ཡང་།།

རྗེས་ལུས་མལ་ནས་བསླང་འདོད་ན།།

སྔོན་ཐོན་རིག་པའི་རྩལ་ལ་སློབ།།

མེས་པོའི་སྲོལ་བཟང་ཐབས་ཀྱིས་སྐྱོང་།།

དུས་རབས་གསར་པའི་འགྲོས་དང་བསྟུན།།

གནའ་དེང་ཤེས་རིག་ཟུང་འབྲེལ་གྱིས།།

སྔོན་ཐོན་མདུན་གྱི་ལམ་སྣེ་འཚོལ།།

དྲང་བདེན་ལས་ལ་ཁ་ཕྱོགས་ཏེ།།

རྫུན་མའི་རིགས་ལ་ངོ་རྒོལ་དང་།།

རང་རིགས་སྔོན་ལ་བསུ་རྒྱུ་དེ།།

གསར་སྐྱེས་མི་བུའི་འགན་འཁྲི་ཞིག།

༢༠༡༢། ༩། ༡༢།ཉིན་བྲིས།