སུན་སྣང་འོག་གི་ལོ་ཟླ།།

                         ཡ་ཀི་གསེར་མདོག་འཚེར་བའི་རང་མདངས།།

                           དམར་གསར་སྐར་མའི་འོད་ཀྱིས་འཁྱུད་དེ།།

                           སྣང་བ་རབ་རིབ་ལས་དབང་ཁྲོད་ན།།

                           གྲྭ་རྐྱང་སྙིང་ཁམས་བཙན་གྱིས་སུན་ཐལ།།

མ་ཀི་ལྕང་གླིང་ཡངས་པའི་ར་བ།།

བྱམས་མེད་བྱི་ལའི་མཆེ་སྡེར་རྣོན་པོས།།

རང་མོས་ཆོས་ཀྱི་སྒོ་འཕར་བཟུང་དུས།།

མགོ་རིལ་བྱིའུ་ཆུང་སྡུག་གིས་སུན་ཐལ།།

གཟན་ཤམ་དམར་པོ་ལུས་ལ་གྱོན་ན།།

ཐོབ་ཐང་ལག་འཁྱེར་ཡོད་ཀྱང་མི་ཕན།།

སྤྱི་ཚོགས་ཐོག་ཏུ་འགྲོ་ལམ་ཇེ་དོག །

རེ་སྒུག་ལོ་ཟླ་དེ་ལ་སུན་ཐལ །།

བོད་ཀྱི་ནང་ཆོས་རིག་གཞུང་འདི་ཉིད།།

མཉམ་འབྲེལ་ངང་ནས་འཛིན་སྐྱོང་མི་སྤེལ།།

ང་དང་ང་ཆེའི་ཚིག་མཚོན་གཡུག་པའི།།

གྲུབ་མཐའི་ཆགས་སྡང་དེ་ལ་སུན་ཐལ།།

རྩྭ་ལོ་རྩི་ཤིང་བརྫིས་ཕྱག་བཏང་ཐོག།

རང་འབྱུང་རི་བོ་འཕྲུལ་གྱིས་སློག་སྟེ།།

རིག་དངོས་གཏེར་ཁས་ཁྱབ་པའི་ཁོར་ཡུག།

ཚོད་མེད་གཏོར་བཤིགས་བཏང་ལ་སུན་ཐལ།།

མགོ་རྣ་རུལ་བའི་འབྲོག་སྡེ་ཞིག་གིས།།

ཕ་ཁྱིམ་སྦྲ་ནག་མགོ་ནས་ཕུད་དེ།།

ནོར་ལུག་འཁོར་སའི་མཚེར་ར་གྲུ་བཞི།།

དབྱར་གསུམ་རྡོ་རར་བསྒྱུར་ལ་སུན་ཐལ།།

ཡུལ་དང་འབྲོག་པའི་སྡེ་བ་ཕལ་གྱིས།།

དངུལ་ལོ་ཁུག་ལ་རིན་ཐང་ཞན་པའི།།

བསམ་མེད་སྒོ་ཁྱི་གྲོང་ཁྱེར་བསྐྱལ་ཏེ།།

བཟོད་མེད་སྡུག་གསོད་བཅུག་ལ་སུན་ཐལ།།

   འདི་ནི་ང་ཡི་བསམ་བློ་ལ་ཐིམ་པའི་ན་ཟུག་ཅིག་རེད།།   འབྲིང་རྒྱུད་པས།།            ༢༠༡༢    ༦     ༡༩