བྱང་ཐང་གི་བརྩེ་གྲོགས་ཡ།།

བརྩེ་ལྡན་གྲོགས་ཀྱི་དྭངས་མ་ཡི།།

ཡིད་འོང་མཚན་དཔེའི་འཛུམ་ཞལ་དངོས།།

མ་མཇལ་ལོ་ཟླ་སོང་ཡུན་རིང་།།

ཁྱེད་སྐུ་དྲི་མེད་གེ་སར་ལ །།

ཉེར་འཚེའི་འདམ་གྱིས་མ་གོས་ཞེས།།

གནས་ཚུལ་ལོ་རྒྱུས་གཏམ་བཟང་ཞིག།

ཁོ་བོའི་སྒྲ་འཛིན་རྣ་བ་རུ །།

ཞལ་པར་སྲུབས་ནས་ལྷུང་བའི་ཚེ།།

ཡ་ཆུང་སེམས་པ་དམར་པོ་དེ།།

དགའ་བས་གཏམ་པའི་གོང་བུར་གྱུར།།

གུས་པ་ཉིད་ནི་བདེ་འཚམས་ངོར།།

ཁྱུང་ཡུལ་ལྔ་རིག་སློབ་གླིང་དུ།།

བློ་གསལ་ཁྱུ་ཚོགས་འཁྱིལ་བའི་ཁྲོད།།

ཧ་ཅང་བརྩོན་ལེན་མ་མྱུར་ཡང་།།

སྐབས་འགར་རྩོད་པའི་ཐོག་དམར་འཕེན།།

སྐབས་འགར་བྲིས་གྱི་སྒྱུ་རྩལ་བསླབ།།

སྐབས་འགར་སྙན་པའི་ངག་རིག་དཀྲོལ།།

རྒྱུན་ལྡན་རང་སེམས་སྐྱིད་ལ་བསྐུལ།།

གོང་མས་ཅི་གསུང་སྒྲུབ་བཞིན་ཡོད།།

སྔོན་སོང་ལོ་ཟླ་དུ་མའི་རིང་།།

མདོ་སྨད་ཁྱུང་ཡུལ་བསྟན་གླིང་དུ།།

འགྲན་གྲལ་སློབ་དཔོན་དམ་པ་ཡི།།

དགོངས་བཅུད་ཟབ་གདམས་བདུད་རྩིའི་རོ།།

མ་ཕྱེས་ཅི་དགར་ལྷན་གཅིག་རོལ།།

བརྩེ་བའི་ལག་ཟུང་དམ་དུ་སྦྲེལ།།

མཐུན་པའི་གོམ་ཁ་མཉམ་དུ་བསྒྱུར།།

དུང་བའི་གཅིག་སེམས་གཅིག་ལ་འཁོར།།

ཡུན་རིང་འགྲོགས་པ་ཡང་ཡང་དུ།།

གངས་དཀར་སེམས་ལ་འཁོར་ཐེངས་རེར།།

ལྷད་མེད་སྙིང་གི་གྲོགས་པོ་ཁྱེད།།

དྲན་པའི་གདུང་བ་ཤིན་ཏུ་རྒོད།།

བརྩེ་ལྡན་གྲོགས་ལོའི་སྙིང་ཁོང་ན།།

དུང་གསར་འོ་ཆུ་འདྲེས་པའི་རླབས།།

འགོག་མེད་ཡིད་ལ་འཕྱུར་བའི་རྒྱུན།།

ནམ་ཡང་མ་ཉམས་བྱང་ཐང་གྲོགས།།

ཡ་ཆུང་ཁོག་པའི་གཏིང་རུམ་ནས།།

མཇལ་འདོད་ཟུང་ཁྲག་འཕྱོ་བཞིན་ཡོད།།

སྐྱིད་ཉམས་ལྡན་པའི་མི་ཚེ་དེ།།

རིན་ཐང་ཅན་དུ་བསྒྱུར་བའི་ཆེད།།

ཡིད་འོང་སློབ་གྲྭའི་སྐྱེད་ཚལ་དུ།།

མདུན་བསྐྱོད་གོམ་ཁ་གྱེན་བསྒྱུར་ཏེ།།

དཔྱད་གསུམ་དག་པའི་གཞུང་ལུགས་དང་།།

སྲོལ་བཟང་མེས་པོའི་རིག་གནས་ལ།།

ཡང་ཡང་བརྩོན་རོགས་སྙིང་ནས་ཞུ།།

མ་འོང་གནམ་ལོ་གསར་པའི་ནང་།།

བྱ་བ་ལམ་འགྲོ་ཅི་བསམ་འགྲུབ།།

ནད་མེད་ཚེ་རིང་བདེ་ཞིང་སྐྱིད།།

ལས་དང་རླུང་རྟ་དར་བར་སྨོན།།

གཡུང་གླིང་གྲོགས་མཆོག་དམ་པ་ཡི།།

དྲུང་དུ་མཛའ་རྩེའི་སྙིང་གི་གཏམ།།

རྒྱལ་ཁམས་གོ་ལའི་ཡང་རྩེ་རུ།།

མཚན་མོའི་དུང་ཟླ་འོག་ནས་ཕུལ།།

འབྲིང་རྒྱུད་པས།།  ༢༠༡༢  ༦  ༧    ཁྱུང་དཀར་བསྟན་གླིང་ནས་ཕུལ།།