བར་ཆད་འདྲ་བའི་ཁ་བ།
ཁྱོད་རང་གང་དུ་སླེབས་ཀྱང་ང་རང་དེ་རུ་འབྱོར་ངེས་པའི་དཔའ་གདེང་དེ།
ཁ་བ་འབབ་ཐེངས་གཅིག་གིས ཁ་ཆག་མགོ་ཆག་བཟོས་སོང་།
འབབ་འཕྱི་བའི་ཁ་བ་འདིས།
ལམ་ཁ་ཡོད་ཚད་བཀག་སྟེ་དཀར་ལམ་ལམ་དུ་སྡོད་དུས།
རུས་དཀར་བདུད་མོས མི་ཚོགས་ཀྱི་འདོད་པ་ལ་རུས་པས་ཆུ་རགས་བརྒྱབ་པ་འདྲ་སྟེ།
ཏག་ཏག་སྐབས་འདི་ལ།
གདུང་བས་གཟིར་བའི་སེམས་པ་ག་ཙམ་གྱི་ཁོག་ན་མེ་འབར་གྱི་ཡོད་དམ།
རེ་བས་དེད་པའི་རྐང་བ་ཅི་ཙམ་གྱི་མཐིལ་ན་དོ་ལང་གིན་ཡོད་དམ།
ཏག་ཏག་སྐབས་འདི་ལ།
ངས་སྤྲུལ་སྒྱུར་དོན་གཅིག་གི་ཨུ་ཁུང་དྲན་ཡོང་སྟེ།
ཕུ་འདེབས་ཐེངས་གཅིག་གིས འོད་ཆ་ལེར སྐྱ་ཤ་ལེར།
ལམ་གྱི་སྣེ་མོ་ཁྱེད་ཀྱི་སྙིང་ག་རུ་འཐེན་ན་བསམ་ཞིང་།
དྲན་པའི་ཁུ་བ་ཁྱོད་ཀྱི་ཨ་ཡིག་ལ་བསྟིམ་ན་བསམ་ཡོང་།
ཡིན་ཡང་ཁ་བ་ལ་སྙིང་རྗེ་མི་འདུག
བར་ཆད་འདྲ་བའི་གཏོར་བཤིག་འདྲ་བའི་ཁ་བ་འདིས།
རླངས་འཁོར་གྱི་ཐོད་པ་ཐོད་པར་གཏུག་གིན་འདུག
ཚེ་སྲོག་གི་མདུད་པ་བཤིག་བཤིག་གཏོང་གིན་འདུག
པད་ཤག་ལ་ཅེར་བའི་ཨེམ་ཆི་དག་ལ
དངུལ་ལོར་གྱི་ཆར་བ་འབེབ་ཀྱིན་འདུག
ཁྱོད་རང་གང་དུ་སླེབས་ཀྱང་ང་རང་དེ་རུ་འབྱོར་ངེས་པའི་དཔའ་གདེང་དེ།
ཀྱེ ཁ་བ་འབབ་ཐེངས་གཅིག་གིས་འདི་ལྟར་ཁ་ཆག་མགོ་ཆག་བཟོས་སོང་།
ཅི་ཞིག་མ་གྲུབ་པའི་བྲེལ་ཤས་རྡུལ་འཚུབ་སློང་དུས།
གང་ཞིག་མཐོང་འདོད་ཀྱི་ཞེན་པས་བྲང་ཁོག་རྡུང་དུས།
བརྡ་རྟགས་ཀྱིས་རྔུལ་ཆུ་ཤམ་ཤམ་དུ་འཁུར་ཡོང་བའི་འཕྲིན་གྱི་ཐིགས་པ་དེས།
མི་ལ་སེམས་དང་སེམས་ན་འདང་ཡོད་ན།
ཀྱོག་མོའི་ལམ་ལ་རྡོག་པ་མ་བཀོད་ཀྱང་།
རྡོག་པའི་སྣེ་མོ་འདམ་གྱིས་མ་སྦགས་ཀྱང་།
བར་ཐག་གིས་སྟོང་བའི་སེམས་ཀྱི་འོད་ཟེར།
གནས་དུས་ཀྱི་རིམ་པ་བརྟོལ་ཏེ་ཞི་བའི་ཁམས་ནས་འདྲེས་ཆོག་ཟེར།
ཁྱོད་ཀྱི་རྣམ་འགྱུར་དྲོན་མོ་དེས།
ད་ནི་ང་རང་ཁ་བ་ལ་སྡང་དགོས་མིན་ཡང་ཤེས་མ་སོང་ཨང་།
༢༠༡༢ ༢ ༡༣ ཉིན།
