ང་ཡི་དབྱངས་ཅན་མ་ནི་འདིའོ། །

                                           ཁ་བ་རྐང་གླིང་།

སྤང་ལ་གདན་གྱིས་མཛེས་རྒྱན་སྤྲད་པ་དང་ །

དེ་ཡི་གམ་ནས་ཤང་ཤང་ཆུ་ཕྲན་རྒྱུག །

སྤང་དང་ཆུ་ཕྲན་བར་གྱི་སྐྱིད་ས་དེར། །

དེང་དུས་གུར་ཆུང་མེ་ཏོག་བཏབ་པ་ཡིན། །

ཟུར་དུ་ཉི་འོད་ལྡེ་ནས་སྡད་པ་ཡིན། །

ཉི་འོད་ལུས་ལ་གྱོན་ནས་བདེ་བ་སྒོམ། །

བདེ་བའི་ངང་ནས་ཆུང་མའི་པང་དུ་ཉལ། །

ཆུང་མའི་གདོང་ལ་ལྟ་བཞིན་ལྟ་བཞིན་དུ། །

སེམས་དང་སེམས་པའི་བར་ནས་དྲོད་ཅིག་སྐྱེ །

དྲོང་ཀྱི་མིང་ལ་བདེ་དྲོད་ཟེར་བ་ཡིན། །

ཚད་ལ་རན་པའི་ཉི་འོད་གྱོན་པ་ཡིན། །

དེ་ཡི་འོག་ཏུ་དཔེ་ཆ་ལྟས་པ་ཡིན། །

ཡིག་འབྲུ་རེ་ཡི་དོན་ལ་དཔྱད་པ་ཡིས། །

དུས་ཚོད་གང་ལ་སླེབས་པ་མི་ཤེས་བཞིན། །

མགོ་བོ་འཚིག་ནས་རླངས་དུམ་གནམ་ལ་ཕྱུར། །

ཉི་མ་མགོ་ལ་ཚ་བྱུང་མིག་ལ་གཟན། །

གུར་ཆུང་མེ་ཏོག་ནང་ལ་འཛུལ་བ་ཡིན། །

གཏེར་ཆུ་བྲིས་པའི་གཏེར་ཆུ་འཐུང་བ་ཡིན། །

ཚོར་བ་སྨྱུ་གུར་བཅོལ་ནས་སྙན་ངག་བྲིས། །

གཟའ་མཇུག་བདེ་བ་དེ་ལས་ལྷག་ཅི་ཡོད། །