མི་རྟག་པ།
རླུང་བུ་ལྡང་ཞིང་འདུག ཆར་བ་ཤུགས་ཀྱིས་བབ་བཞིན་འདུག གྲང་
ལྷག་གིས་བརྩེས་པའི་ནམ་ཟླ་འདི་ཅི་འདྲའི་མི་འཁྱག་གམ། སྙན་ངག་པ་ཞིག་མགོ་བོ་
རས་གཟན་གྱིས་བཏུམས་ཏེ་ཕྱིར་དྲན་གྱི་ལམ་ན་བཞུགས་ནས་འདུག།
ཁ་སང་གི་བུ་མོ་མཛེས་མ་དེ། དེ་རིང་ངའི་གམ་ནས་བུད་སོང་། དེ་རིང་
གྲོགས་པོ་བློས་ཐུབ་ཡིན་ཟེར་མཁན་དེ་ཡང་། ད་ལྟ་རྒྱང་ལ་ཆས་སོང་། ད་ལྟ་ངའི་ཉེ་
འགྲམ་ན་ཅི་ཞིག་ལྷག་ཡོད་དམ། ངའི་གྲིབ་གཟུགས་གཅིག་པོ་ཁོ་ན་རེད།།
མག་མོག་གི་མཚན་མོ་འདིར། ང་རང་ཅི་ཞིག་དྲན་བཞིན་ཡོད་དམ།
ཆུང་མ། ཡང་ན། གྲོགས་པོ། དེ་དག་མ་རེད། ཕྱིན་ཚར་བའི་ལོ་ཟླ་ཡིད་ལ་དྲན་བཞིན་ཡོད།
རྒྱ་བྱིན་གྱིས་ང་ཚོར་སྦྱིན་པའི་རྩེད་རྭ་དེ་དྲན་བཞིན། དབྱངས་ཅན་མས་འཁྲབ་
པའི་བྲོ་གར་དང་གླུ་དབྱངས་དྲན་བཞིན་ཡོད། ད་དུང་ངའི་རྩེད་གྲོགས་བུ་མོ་དེའི་
ངོ་གདོང་སྙིང་རྗེ་བོ་དེ་བཞིན་ཡོད།།
བདག་ལ་ཆུང་མ་ཡོད། བུ་ཕྲུག་ཡོད། གྲོགས་པོ་ཡོད། ང་ཚོ་ཚང་མ་
ཧ་ཅང་འཆམ། ཡིན་ནའང་ཆུང་དུས་ཀྱི་རྩེད་རྭ་ནས་རྙེད་པའི་བདེ་བ་དེ་གང་ན་
ཡོད་དམ། དུས་ནམ་ནམ་ཡང་རྙེད་པར་དཀའ་ཙང་གདའ།།
དེ་རིང་མཚན་མོའི་རྨི་ལམ་དུ་ངའི་རྩེད་གྲོགས་དག་མཇལ་བྱུང་། རྒྱང་ལ་བུད་
ནས་ལོ་ག་ཙམ་ཕྱིན་པ་མི་ཤེས་པའི་གྲོགས་པོ་གྲོགས་མོ་ཚོ་མཇལ་བྱུང་། ང་ཚོས་ཆུང་
དུས་གྱེར་མྱོང་བའི་གླུ་ཆུང་གྱེར་བཞིན། ང་ཚོས་ཆུང་དུས་ཆུང་མ་ཡིན་ཟེར་བའི་བུ་
མོ་དེ་ཡང་ཕྲད་བྱུང་། ད་དུང་བཤད་མི་ཐུབ་ཞིང་གླེང་མི་ཚར་བའི་ཆུང་དུས་ཀྱི་
གཏམ་རྒྱུད་མང་པོ་ཞིག་དང་། ངོ་ཚ་ཞིང་དགོད་དགོས་པའི་བྱ་བ་མང་པོ་ཞིག་ཡིད་
ལ་ཝ་ལེ་ཝ་ལེར་འཁོར་འོང་། བྱིས་དུས་ནི་ཅི་འདྲའི་བདེ་སྐྱིད་ལྡན་བཞིན་རང་དབང་
གིས་མཛེས་པའི་དུས་ཚིག་ཅིག་མིན་ནམ། བྱི་དུས་ནི་མི་ཚེའི་ཁྲོད་ཀྱི་བདེ་སྐྱིད་
ཆེ་ཤོས་དེ་རེད། ང་རང་སླར་ཡང་བྱིས་དུས་སུ་ལོག་པ་མི་ནུས།།
རེད་ཡ། ད་ལྟ་ངའི་ཉེ་འགྲམ་ན་བྱིས་དུས་ཀྱི་རྩེད་གྲོགས་ཅིག་ཀྱང་མིན་འདུག
ཁོ་ཚོ་ནི་རང་གི་དག་ཞིང་ཞིག་གིས་ཆེད་དུ་ལམ་ལ་ཆས་ཟིན། འགའ་རེ་ཞིང་གྲོང་གི་
ས་རྡུལ་མཉམ་དུ་འཐབ་སྟེ། རང་ནུས་ཀྱི་སྲིད་ཞུ་སྒྲུབ་བཞིན་འདུག ངས་ད་
དུང་ཡང་གྱེས་བྲལ་ལ་ངེས་ཤེས་མ་རྙེད་པས་ཡིན་ནམ། ཡང་ན། ཅི་ཞིག་གིས་
ཡིན། ངས་ཤེས་པར་དཀའ། ཡིན་ནའང་རྩེད་གྲོགས་ཚོ་མིག་མདུན་ན་རྒྱུག་བཞིན་
འདུག།
