ཆེས་ཁོམ་པའི་མི་དེ་ཚོ།

                        འབྲོག་ཁ་མང་།
        ༡
ཁྱུ་ཚོགས་བོར་བའི་ཁེར་རྒྱུག་ཀྱི་སེམས་འཚུབ་ལྟ་བུའི
ནམ་ཞར་འདུར་རྒྱུགས་ཀྱི་བར་གསེང་ནས་འཚོ

སྐད་ཅིག་སྡོད་མེད་ཀྱི་རླུང་བུ་དང་འདྲ་བའི
ཁོམ་མེད་བྲལ་འཚུབ་ཀྱིས་རང་མགོ་བསྐོར
         ༢

མི་དེ་ཚོ

ཐོབ་པ་དབེན་པའི་མི་དེ་ཚོ
རྟོགས་པར་དཀའ་བའི་མི་དེ་ཚོ
        ༣

བྲལ་བྲལ་བྲལ

རྒྱུག་རྒྱུག་རྒྱུག་

ལོ་ངོ་ཇི་སྙེད་སོང་བའི་ཉིན་མོ་ཞིག་ལ
འཛུབ་མགོ་ཁ་རུ་བཅུག་ནས་ངུ་ཤུམ་རྒྱག་པར་བྱེད

༢༠༡༣.༠༧.༠༡

རེ་ཆད་དང་རེ་སྒུག།

    
ཉི་མ་མི་འདོད་ཀྱི་ནུབ་རི་བརྒལ་རྗེས་དང

ཟླ་བ་གློ་བུར་གྱི་སྤྲིན་པས་བསྒྲིབས་བཤུལ

སུ་ཞིག་གི་སེམས་པ་རྡོ་བར་བརླན

སྐར་ཚོགས་གྲངས་མེད་ཞིག་རེ་ཐག་ཆད་ཞོར

སྤྱང་ཀི་ག་ཚོད་ཀྱིས་ལྐོག་ནས་འཇབས
སང་ཉིན
ནངས་སྔ་མོའི་སྐྱ་རིང་གིས་དུང་ཟླ་བསུ་དུས
སུ་ཞིག་གི་རྨི་ལམ་དཀྲོག་སྲིད

༢༠༡༣.༠༦.༢༨