ཁ་གཡང་གསོན་པོ་ཞིག
རིགས་ཞེན་སྤོབས་པ་རུམ་པའི་རིགས་མཐུན་དེར།།
གནའ་དེང་རིག་པའི་རྒྱན་པའི་ཕོ་གསར་དེར།།
དུས་ཀྱི་འགྲོས་དང་བསྟུན་པའི་མི་བུ་དེར།།
མདུན་བསྐྱོད་ལམ་དུ་བཀག་རྡོ་ཉུང་གྱུར་ཅིག།།
༢
བྱམས་སེམས་སྙིང་ནས་བསྒོམས་པའི་རྒན་པོ་ཁོང།།
སེམས་ཁུར་ཁོག་ནས་བསྲིངས་པའི་ཡབ་ཡུམ་ཁོང།།
རེ་བའི་འོ་མཚོ་བསྐྱིལ་ས་སྙིང་གྲོགས་ཁོང།།
མི་འདོད་ལས་ཀྱི་གློ་བུར་མི་ཁྲིད་ཤོག།།
༣
གཞན་ཕན་གྲོགས་སུ་རྟེན་པའི་ངུར་སྨྲིག་ཅན།།
བཀའ་དྲིན་གཞལ་ཟླ་བྲལ་བའི་དགེ་བའི་བཤེས།།
དགའ་སྐྱོའི་རོལ་དབྱངས་དཀྲོལ་རོགས་སློབ་རྭའི་གྲོགས།།
བདེན་པའི་རྒྱལ་པོ་ཁྱེད་རྣམས་རྒྱལ་གྱུར་ཅིག།
༤
བོད་རིགས་མིང་བྱང་ཁྱེར་བའི་རྐང་འདྲེན་ཁྱོད།།
བོད་ཡིག་མི་མཁོ་ཟེར་བའི་ཉམ་ཆུང་ཁྱོད།།
བོད་སྐད་བསྲེས་སྐད་བསྒྱུར་བའི་ཉེས་ཅན་ཁྱོད།།
ལས་འབྲས་མཛུབ་མོའི་རྩེ་རུ་འཁོར་གྱུར་ཅིག།
སྤྱི་ཡི་བདེ་སྡུག་མི་སེམས་སྒེར་གཅོད་མཁན།།
རང་སྐྱོན་དང་དུ་མི་ལེན་རང་རློམ་ཅན།།
གནའ་དེང་གང་ལའང་རྨོངས་པའི་ཁ་ཕོ་ཅན།།
མི་འགྱངས་གོ་རྟོགས་སྒོ་མོ་ཕྱེས་གྱུར་ཅིག
བོད་ཡིག་ཏོག་ཙམ་མཁྱེན་པའི་སློབ་ཆེན་ཁྱོད།།
རྒྱ་ཡིག་ཅུང་ཙམ་ཤེས་པའི་སློབ་ཆེན་ཁྱོད།།
དབྱིན་ཡིག་ཨེན་ཙམ་རྟོགས་པའི་སློབ་ཆེན་ཁྱོད།།
ཨ་ལ་པ་ལའི་གནས་ལས་ཐར་གྱུར་ཅིག
༧
ལས་དབང་དམར་པོའི་མཁའ་དབུགས་འདི་རྔུབ་ཀྱིན།།
གནའ་དེང་ཟུང་གི་ལོ་རྒྱུས་འདི་ཀློག་གིན།།
དྲང་བདེན་དབུས་ཀྱི་ལམ་ཆེན་འདི་བགྲོད་ཀྱིན།།
ཆུ་བཞི་སྒང་དྲུག་འདི་ཚང་རྒྱལ་གྱུར་ཅིག།།
༢༠༡༣.༩.༢༤
- ཟིན་ཐོ་གོང་མ།ལྷ་ཁང་དབུས་ཀྱི་སྙན་ངག༼ཞར་བཀོད་གཅིག༽
- ཟིན་ཐོ་འོག་མ།སྙན་ཚོམ་ཚན་པ་གཉིས།
གྲོགས་པོ་བཀྲ་ཤིས་བདེ་ལེགས། མ་མཇལ་ཡུན་རིང་སྐབས་སྐུ་ཉིད་བདེ་ཐང་ཡིན་ནམ། ང་ཡུལ་གཞན་དུ་སྐྱོད་དགོས་བྱུང་བར་བརྟེན། དོ་དགོང་བར་དྲ་ཉུལ་མ་ཁོམ་པས་དགོང་དག་དང་རྗེས་སུ་རིམ་བཞིན་མཇལ་ཡོང་།
གྲོགས་བོན་སྨྱུག་ལགས་ཕེབས་བསུ། བདེ་མོ་ཡིན། སྐུ་ཉིད་ཉེ་ལམ་བདེ་འམ། རྒྱུན་དུ་ཁོམ་ཞོར་རེ་བཙལ་ནས་ཁོ་བོའི་གཞིས་ཀར་རུ་ཕེབས་པར་སེམས་བསམ་པའི་གཏིང་ནས་དགའ་གིན་ཡོད། བདག་པོས་ཕུལ། 
ཁ་གཡང་ཡག་པོ་གྱེར་འདུག བདེན་གྱིན་འདུག འཐད་ཀྱིན་འདུག སེམས་དཀར་བོས།