ཡིད་འཕྲོག་མ།
སེམས་བསམ་པ་གངས་རི་ལས་ཀྱང་དཀར།།
ཤེས་ཡོན་ཏན་རྒྱ་མཚོའི་གཏིང་ལྟར་ཟབ།།
གཟུགས་ངོ་གདོང་པིར་ཀྱི་བྲིས་འདྲ་རེད།།
ང་དགའ་སའི་བུ་མོ་ཡིད་འཕྲོག་མ།།
མཐོང་འདོད་པའི་བུ་མོ་ཡིད་འཕྲོག་མ།།
ཁྱོའི་གདོང་ལ་བཅོས་མིན་འཛུམ་མདངས་རྒྱས།།
བུ་ང་ཡི་ལྷད་མེད་དུང་སེམས་དེ།།
ཚེ་གཅིག་ལ་སྦྱིན་པའི་སྤོབས་པ་ལྡན།།
ཚེ་སྔོན་མའི་ལས་ཀྱི་བསྐོས་པ་འདྲ།།
ཁྱོས་ང་ལ་བཞག་པའི་བག་ཆགས་དང་།།
བཤད་ཟིན་པའི་སྙིང་གཏམ་མངར་མོ་དེ།།
ནམ་ཡིན་ཡང་སེམས་ལ་ལྷང་ངེར་གནས།།
ཁྱོད་ལྷན་དུ་མེད་པའི་ཉིན་མོ་དེར།།
ངའི་ཡ་ཆུང་སེམས་འདི་གྲང་ཤུར་ཤུར།།
ཟས་གང་ཞིམ་བྲོ་མེད་རྙིང་རུལ་རེད།།
གཏམ་གང་བཤད་ཆོ་མེད་སྨྱོ་ལབ་རེད།།
མཐོ་རི་བོའི་རྩེ་ལ་རླུང་རྟ་སྒྲོན།།
ངེད་གཉིས་པོའི་ལས་དབང་དར་བར་ཤོག །
དམའ་རྒྱ་གྲོང་དཀྱིལ་ནས་བོན་ཞིག་སྒྲུབས།།
སྡེས་མི་ཁའི་འོག་ནས་ཐར་བར་ཤོག །
ངེད་གཉིས་པོ་ཕན་ཚུན་མཐུན་སོང་ན།།
དགའ་འོས་པའི་བྱ་བ་མཉམ་དུ་སྒྲུབ།།
སྡུག་བྱུང་ན་མིག་ཆུ་མཉམ་དུ་འདོན།།
ཚེ་འདི་ལ་གཏན་འགྲོག་འགྱུར་བར་སྨོན།།
སྔོན་ལས་བཟང་ཞིག་གིས་རྐྱེན་བྱས་པས།།
ཁྱོད་ངེད་གཉིས་གནས་འདིར་མཉམ་འཛོམས་བྱུང་།།
ནང་ཁྱིམ་ཚང་དགོད་སྒྲས་ཁེངས་བཞིན་དུ།།
རྒྱུ་འབྱོར་བ་ཀླུ་དང་མཉམ་པར་ཤོག །
གྲོགས་པོ་ཞིག་གིས་རེ་བ་ལྟར་དུང་བརྗོད་གཞས་ཚིག་ཞིག་འབྲི་ཁུལ་བྱས།
2013.10.26
