རྩོམ་པ་པོ།སྐྱང་སྤྲུལ་དྲི་མེད་འོད་ཟེར།
སྨན་འབུམ་དང་རྒྱུད་བཞི་ལས་ནད་རིགས་འགའ་ལ་གཏོ་བཅོས་དང་སྨན་བཅོས་ཟུང་འབྲེལ་དུ་གསུངས་པའི་སྐོར་ཅུང་ཟད་བཤད་པ།བདུད་རྩིའི་བང་མཛོད་སྨན་འབུམ་བཞི་སོགས་གསོ་བ་རིག་པ་བྱུང་བའི་ཁུངས་དང་
གསུངས་པའི་གཞུང་དང་།བསྟན་པའི་སྣོད་དང་གསུངས་པའི་གནས་སོགས་དང༌།རིག་པའི་གནས་ལྔའི་གྲས་
ཡིན་པ་དང་བཀའ་འཁོར་དང་པོ་ཐེག་རིམ་དགུ་ལས་དང་པོ་ཕྱྭ་གཤེན་ཐེག་པ་ཡིན་པ་དང༌།གསུངས་ཚུལ་དང་དུས་རབས་དང༌།སྨན་འབུམ་བཞི་ཡི་ནང་དོན་མཚམས་སྦྱོར་དང༌།རྐྱེན་གྱི་དབང་ངམ་དགོས་པའི་དབང་གིས་དུས་དང་བསྟུན་པའི་བསྟན་པ་དཔལ་ལྡན་རྒྱུད་བཞི་ཞེས་པར་མཚན་བསྒྱུར་ནས་ལེགས་བསྒྲིགས་གནང་ཚུལ་སོགས་ནི།སྔར་ཁོ་བོས་བྲིས་པའི་གནའ་བོའི་གསོ་རིག་རགས་རིམ་ཞེས་པ་དང༌།རྔ་བ་ཁུལ་ཁོངས་སུ་«བོད་ཀྱི་
གསོ་རིག་དར་ཚུལ་སྐོར»ཞེས་པ་དང༌།མཚོ་སྔོན་བོན་བརྒྱ་དགོན་གྱི་དུས་དེབ«དཔྱོད་ལྡན་མཆོད་པའི་མེ་
ཏོག»དེབ་གྲངས་དག་ན་ཡོད་པས་འདིར་བསྐྱར་ཟློས་ཀྱི་ངལ་བ་མི་བྱའོ།།
འདིར་སྐབས་དོན་གཙོ་བོ་བདུད་རྩིའི་བང་མཛོད་སྨན་འབུམ་བཞི་དང་དཔལ་ལྡན་རྒྱུད་བཞི་ལས་ནད་
རིགས་ཀྱི་བྱེ་བྲག་གདོན་རྐྱེན་ལས་གྱུར་པ་འགའ་ཞིག་སྨན་དཔྱད་དང་གཏོ་བཅོས་ཟུང་འབྲེལ་དུ་བསྟན་ཚུལ་
ཅུང་ཟད་བཤད་པ་ལ།སྤྱི་དང་བྱེ་བྲག་གཉིས་ལས།དང་པོ་ནི་རིག་པའི་གནས་ལྔ་དང་རྒྱུ་ཡི་ཐེག་པ་གསུངས་
དགོས་དོན་ནི།སྣང་སྲིད་ཞི་བདེ་བསྐྱེད་པ་དང༌།སངས་རྒྱས་བསྟན་པའི་གཞི་འདིང་བའི་ཕྱིར་དུ་ཡིན་པ་དང༌།
དེ་ལས་ཀྱང་ཕྱྭ་གཤེན་ཐེག་པ་ཐོག་མར་གསུངས་དགོས་དོན་འཁོར་བའི་སེམས་ཅན་ཉོན་མོངས་ཅན་ལ་སྡུག་
བསྔལ་བར་བྱེད་པའི་རྒྱུ་ནད་ཀྱི་རིགས་དང༌།རྐྱེན་བར་གཅོད་བྱེད་པའི་བགེགས་ཀྱི་རིགས་གཉིས་ཡིན་པས།
དེ་གཉིས་ཀྱི་གནོད་འཚེ་སེལ་ཐབས་ལ་གཏོ་ཡི་སྡེ་དང་དཔྱད་ཀྱི་སྡེ་གཉིས་དང༌།དེ་ཡི་ཆ་རྐྱེན་ནམ་ཡན་ལག་གི་ཚུལ་དུ་མོ་པྲའི་སྡེ་དང༌།གཙུག་ལག་རྩིས་ཀྱི་སྡེ་དང་བཞི་རུ་བསྟན་པ་སྟེ།མདོ་དྲི་མེད་གཟི་བརྗིད་ལས།ཉོན་ཅིག་དཔྱད་བུ་ཁྲི་ཤེས་ལ་སོགས་འཁོར།།ཕྱི་རབས་རྗེས་སུ་འབྲང་བའི་གང་ཟག་རྣམས།།སྙིང་རྗེ་བྱང་ཆུབ་མཆོག་ཏུ་
སེམས་བསྐྱེད་ཅིང༌།།བྱམས་སེམས་འགྲོ་བ་ཡོངས་ལ་ཕན་གདགས་ན།།བརྒྱད་ཁྲི་བཞི་སྟོང་ཕྱི་ནང་གསང་གསུམ་ལས།།མ་ནོར་ངེས་པའི་དོན་དམ་བསྟན་པ་ནི།།འཁོར་བའི་སེམས་ཅན་ཉོན་མོངས་མ་རིག་པ།།མི་བདེ་སྡུག་བསྔལ་རྒྱུ་རྐྱེན་གཉིས་ཡིན་ཏེ།།དང་པོ་ནད་ཀྱི་རྒྱུ་ནི་མ་རིག་པ།།རྐྱེན་ནི་བར་དུ་གཅོད་པ་འབྱུང་པོའི་བགེགས།།དེ་
གཉིས་རྒྱུ་རྐྱེན་གཉིས་སུ་འཛོམས་པ་ཡིས།།མ་རིག་འཁྲུལ་འཁོར་མུན་པའི་སྨག་རུམ་ན།།མི་བདེ་སྡུག་བསྔལ་ཉོན་མོངས་སྦྱོང་བར་བྱེད།།དེ་ལ་རིག་པའི་ཡེ་ཤེས་རྩལ་བསྐྱེད་ནས།།ཕན་པའི་ཐབས་ལ་གཏོ་དཔྱད་གཉིས་ཡིན་ཏེ།།ཞེས་དང༌།ཕྱྭ་གཤེན་ཐེག་པའི་མདོ་ལས།ཕྱྭ་གཤེན་ཐེག་པའི་བོན་སྒོ་ལ།།སྤྱི་རུ་གཏོ་དཔྱད་གཉིས་ཡིན་ཏེ།།སྒོས་སུ་རྣམ་པ་བཞི་རུ་བསྟན།།པྲ་ལྟས་མོ་དང་རྣོ་མཐོང་རྩིས།།ན་གསོ་གཏོ་དང་འཆི་བསླུ་དཔྱད།།རྣམ་པར་བཞི་རུ་ཤེས་པར་བྱ།།ཞེས་གསུངས།དེ་ལས།གཏོ་ཡི་ཆོ་ག་སུམ་བརྒྱ་དྲུག་ཅུ་སོགས་ནི་སྐུ་སྲས་གཅེན་པོ་གཡུང་དྲུང་སེམས་
དཔའ་སེམས་དཔའ་ཆེན་པོ་གཏོ་བུ་འབུམ་སངས་ལ་གསུངས།སྨན་དཔྱད་ཀྱི་མདོ་རྒྱུད་ཉིས་ཁྲི་ཆིག་སྟོང་སོགས་ནི།སྐུ་སྲས་དམ་པ་སེམས་དཔའ་སེམས་དཔའ་ཆེན་པོ་དཔྱད་བུ་ཁྲི་ཤེས་ལ་བསྟན་པར་གསུངས་ཡོད་དེ།མདོ་དྲི་མེད་ལས།ཕན་པའི་ཐབས་ལ་གཏོ་དཔྱད་གཉིས་ཡིན་ཏེ།།བགེགས་ལ་གཏོས་ཕན་གཏོ་བུ་དག་ལ་བསྟན།།སུམ་
བརྒྱ་དྲུག་ཅུ་གཏོ་ཡི་སྨྲང་བཀྲོལ་ཞིང༌།།སྟོང་ཕྲག་དྲུག་ཅུའི་བགེགས་རྣམས་ཞི་དགའ་ནས།།འགྲོ་རྣམས་ཕན་བདེ་བསོད་ནམས་འཕེལ་བ་ཡིན།།ཀུན་རྫོབ་མཚན་མ་དངོས་པོར་བསྟན་ནས་ཀྱང༌།།བསྟན་པ་ཆགས་པའི་ཞིང་དང་གཞི་མར་འགྱུར།།འགྲོ་བ་ཐར་བར་ཁ་ལོ་བསྒྱུར་བའོ།།ནད་ལ་དཔྱད་ཕན་དཔྱད་བུ་ཁྱོད་ལ་བསྟན།།བཞི་བརྒྱ་རྩ་བཞི་ནད་ཀྱི་རྒྱུ་བསྐྱེད་ནས།།འགྲོ་བ་མི་བདེ་སྡུག་བསྔལ་སྦྱར་བ་ལ།།ཉི་ཁྲི་ཆིག་སྟོང་དཔྱད་ཀྱིས་ཕན་བདེ་ནས།།
འགྲོ་བ་ཉོན་མོངས་ཟུག་རྔུ་སེལ་བ་ཡིས།།ཐར་བར་ཁ་ལོ་དབྱིངས་སུ་བསྒྱུར་བར་མཛོད།།ཅེས་གསུངས།འབུམ་
བཞི་ལས།ནད་ཀྱི་རིགས་དང་དབྱེ་བ་ལས་གདོན་རྐྱེན་གྱི་ནད་ཡོད་ཚུལ་གསུངས་པ་ནི།ཐུགས་འབུམ་གྱི་གླེང་
བཞི་ལས།འབྱུང་པོ་སྨྱོ་བརྗོད་གཟའ་དང་ཀླུ་གདོན་ལྔ།།ཞེས་དང༌།བྱིས་པ་ཉེར་སྤྱོད་ན་དང་དེའི་གདོན་གསུམ།།
དཔྱད་འབུམ་ལས།བརྒྱ་དང་རྩ་གཅིག་ཀུན་བརྟགས་གདོན་གྱི་ནད།།ཅེས་གསུངས།གསོ་བྱ་ཡན་ལག་བརྒྱད་ཀྱི་
གྲས་སུ་གདོན་ནད་ཡོད་པ་ཡང༌།དེ་ལས།ཡན་ལག་ལུས་དང་བྱིས་པ་མོ་ནད་གདོན།།མཚོན་དུག་རྒས་དང་རོ་ཙ་བརྒྱད་དུ་བསྟན།།ཞེས་གསུངས།དེ་བཞིན་དུ།ནད་ཀྱི་རྐྱེན་གྱི་གྲས་སུ་གདོན་གྱི་རྐྱེན་ཡོད་ཚུལ་ནི།དེ་ལས།དེ་ལ་དུས་གདོན་ཟས་དང་སྤྱོད་ལམ་བཞི།།དེ་དག་འཕེལ་ཞིང་ཟད་པར་གྱུར་ནས་ནི།།ཞེས་དང༌།དཔྱད་འབུམ་ཁྲ་བོ་ལས།འབྱུང་བའི་དུས་དང་གདོན་དུག་མི་འཕྲོད་ཟས།།གསོ་བ་ལོག་དང་ལས་ངན་སར་ལས་འབྱུང༌།།ཞེས་སོགས་
གསུངས།གདོན་རྐྱེན་ཅན་གྱི་ནད་དེ་གཏོ་མདོས་གཏོང་བ་སོགས་རིམ་གྲོའི་ཆོ་གས་བཅོས་དགོས་པ་ནི།དེ་ལས།
ཀུན་བརྟགས་གདོན་ནད་རིམ་གྲོས་གྲོལ་བ་དང༌།།ཞེས་དང༌།སྨན་འབུམ་དཀར་པོ་ལས།བརྒྱ་དང་རྩ་གཅིག་ཀུན་བརྟགས་གདོན་ཡིན་པས།།གདོན་བཅོས་རིམ་གྲོས་སྨན་མེད་ཕལ་ཆེར་འཚོ།།གདོན་བཅོས་མེད་ན་སྨན་དཔྱད་མི་ལེན་བྱེད།།དཔེར་ན་མདའ་ཚབ་གཞུ་ལ་བཙལ་བ་འདྲ།།ཞེས་དང་མན་ངག་རྒྱུད་ཆེན་ལས།བརྒྱ་དང་རྩ་གཅིག་
ཀུན་བརྟགས་གདོན་གྱི་ནད།།གདོན་མ་བཅོས་པར་སྨན་དཔྱད་ལེན་མི་འདོད།།གདོན་བཅོས་སྨན་མེད་གྱུར་ཀྱང་འཚོ་བ་ཡོད།།ཅེས་གསུངས།ཕྱྭ་གཤེན་ཐེག་པའི་མོ་རྩིས་གཏོ་དང་སྨན་དཔྱད་རྣམས་སྦྲགས་མར་སྤྱད་དགོས་ཚུལ་ཡང་ཕྱྭ་གཤེནཐེག་པའི་མདོ་ལས།འགྲོ་དྲུག་སེམས་ཅན་མ་རིག་པ།།འཁྲུལ་འཁོར་མུན་པའི་སྨག་རུམ་དུ།།མ་རིག་ནད་ཀྱིས་གདུངས་པ་ལ།།བཟང་ངན་པྲ་ལྟས་མོ་ཡིས་བརྟག།ལེགས་ཉེས་རྣོ་མཐོང་རྩིས་ཀྱིས་གཞལ།།ན་བར་གྱུར་ན་གཏོ་ཡིས་གསོ།།འཆི་བར་འགྱུར་ན་དཔྱད་ཀྱིས་འཚོ།།ཞེས་སོགས་དང་།མོ་རྩིས་གཏོ་དཔྱད་བཞི་བོ་ལ།།ཀུན་གྱི་ཐོག་མ་མོ་ཡི་པྲ།།ཞེས་པ་ནས།བར་དུ་གསོ་རྐྱེན་གཏོ་ཡིས་བྱེད།།ཞེས་སོགས་དང༌།ཐ་མར་ལས་མཐའ་དཔྱད་ཀྱིས་སྡུད།།མི་བདེའི་ཐ་མ་བདེ་བར་སྡུད།།ན་བའི་ཐ་མ་སོས་པར་སྡུད།།གནོད་པའི་ཐ་མ་ཕན་པར་སྡུད།།ཅེས་པ་སོགས་དང༌།བཞི་བ་དཔྱད་ཀྱིས་འཚོ་བ་ལ།།འགྲོ་དྲུག་སེམས་ཅན་མ་རིག་པ།།ཉོན་མོངས་ནད་ཀྱིས་གདུངས་པ་ལ།།ནད་ལ་དཔྱད་ཀྱིས་ཕན་པའི་ཕྱིར།།ནས།མཁས་ཁྱད་ལག་ལེན་ལྡན་པ་ཡིས།།རྒྱུ་རྐྱེན་ཐམས་ཅད་མཐོང་ལ་དཔྱད།།ངོས་འཛིན་ཐམས་ཅད་རྩ་ལ་དཔྱད།།ཕན་གནོད་ཐམས་ཅད་ཆུ་ལ་དཔྱད།།འཆི་སོས་ཐམས་ཅད་ཁམས་ལ་དཔྱད།།
དེ་ལྟར་ནད་ངོས་ཟིན་པ་དང༌།།ཚ་གྲང་བད་མཁྲིས་འདུས་པ་ལ།།བསིལ་དྲོད་འཛོམས་པའི་སྨན་སྦྱར་ནས།།
ཞེས་པ་ནས།འདུ་བ་ཉི་ཁྲི་ཆིག་སྟོང་ལ།།ཉི་ཁྲི་ཆིག་སྟོང་སྨན་སྦྱར་ནས།།མ་རིག་ཉོན་མོངས་དྲུངས་ནས་འབྱིན།།
ཞེས་སོགས་དང༌།དེ་ལྟར་མོ་རྩིས་གཏོ་དཔྱད་བཞི།།སྤྱོད་དང་འཇུག་དང་བརྟག་པ་ཡིས།།སེམས་ཅན་འགྲོ་ལ་སྨན་པར་མཛོད།།ཅེས་གསུངས།
གཉིས་པ་བྱེ་བྲག་ཏུ་བཤད་པ་ལ་ལྔ་ལས།དང་པོ་གདོན་ནད་ཀྱི་རྒྱུ་རྐྱེན་གཞི་མཐུན་ནི།ནད་འབུམ་གྱི་གདོན་ནད་གསོ་བ་ལས།རྒྱུ་རྐྱེན་མཚན་ཉིད་དང༌།དབྱེ་བ་རྟགས་དང་བཅོས་ཐབས་ལྔ་ཡིས་བསྟན།རྒྱུ་རྐྱེན་མི་དགེ་བཅུ་དང་ལས་ངན་སྣ་ཚོགས་སྤྱད།གྲོང་རྒན་ཞིག་རྒོག་གནས་སུ་གྲོགས་མེད་བལྟ།ཕུག་འདྲེ་ཡོད་ན་འགགས་བརྩེག་ཀ་ཆ་ཁྱེར།ལྷ་སྲུང་མཆོད་འོས་ཆག་དང་མྱ་ངན་གདུང༌།ལུས་ངག་མི་གཙང་འབག་ཆོལ་ལས་ལ་ཞུགས།ཞེས་
གསུངས།མཚན་ཉིད་ནི།དེ་ལས།གཉིས་པ་མཚན་ཉིད་འབྱུང་པོ་མི་མིན་རྣམས།།ལུས་ངག་ཡིད་ལ་ཞུགས་ནས་སྣང་བར་བསྒྱུར།།ཞེས་གསུངས།དབྱེ་བ་ནི།དེ་ལས།
གསུམ་པ་དབྱེ་བ་ལྷ་དང་ལྷ་མིན་དང༌།དྲི་ཟ་ཀླུ་དང་གནོད་སྦྱིན་ཚངས་པ་དང༌།སྲིན་པོ་ཡི་དྭགས་གྲུལ་བུམ་བྱད་སྟེམས་དང༌།གཡེང་བྱེད་རོ་ལངས་ཕ་མྱེས་དུར་སྲི་དང༌།དམ་སྲི་རྒྱལ་འགོང་གཤིན་རྗེ་མོ་འདྲེ་དང༌།ཐེའུ་
རང་ཕ་རོལ་སྦོད་འདྲེ་དང༌།སྤྱིར་ན་གདོན་ཆེན་བཅོ་བརྒྱད་དེས་བཏབ་འོང༌།ཞེས་དང་གདོན་ལ་འབྱུང་པོའི་
གདོན་དང་སྨྱོ་བྱེད་གདོན།བརྗེད་བྱེད་གཟའ་དང་ཀླུ་གདོན་ལྔ་ཡིན་ཏེ།ཞེས་སོ།།དེ་ལྟར་འབྱུང་པོའི་གདོན་རིགས་ལ་བཅོ་བརྒྱད་ལྷག་ཡོད་དེ།སྨྱོ་བྱེད་དང་བརྗོད་བྱེད་གདོན་ནི།དེ་དག་གང་རུང་ཞིག་ཡིན་པར་བཤད།གཟའ་
གདོན་ལ་ནང་གསེས་མེ་གཟའ་ཆུ་གཟའ་དང་ར་ཧུ་ལ་སོགས་གཟའ་བརྒྱད་ཡོད་ལ།ཀླུ་གདོན་ལ་རྒྱལ་རིགས་སོགས་ལྔ་དང་གཞན་ཡང་གཉན་ས་བདག་དམ་སྲི་ཐེའུ་རང་སོགས་ཡོད་པ་དང༌།བྱིས་པའི་གདོན་ལ་སྐེམ་པོ་སོགས་བཅོ་ལྔ་ཡོད་པར་གསུངས།སྤྱིར་ཕོ་གདོན་མོ་གདོན་ཀླུ་གདོན་སོགས་གཙོར་བྱས་པའི་གདོན་རིགས་སྟོང་ཕྲག་
བརྒྱད་ཅུ་དང༌།ཕྱོགས་བཅུའི་གདོན་རིགས་དང་ལྷ་མ་སྲིན་སྡེ་བརྒྱད་དང་ལན་ཆགས་བདག་པོ་བདག་མོ་སོགས་སྣ་ཚོགས་ཡོད་པར་གསུངས།
བཞི་བ་བརྟག་ཐབས་སམ་ངོས་འཛིན་བྱེད་ཐབས་ལ།སྤྱིར་ཕྱྭ་གཤེན་ཐེག་པའི་བོན་བཞི་ལས།མོ་པྲ་དང་
རྩིས་རིག་ནི་ལེགས་ཉེས་དང་ཕན་གནོད་སོགས་ལྐོག་གྱུར་དང་མ་འོངས་པ་རྣམས་སྔོན་དཔག་གི་ཚུལ་དུ་བརྟག་ཐབས་དང༌།གཏོ་ཆོག་དང་སྨན་དཔྱད་ནི་ནད་དང་གནོད་འཚེ་སེལ་བའི་བཅོས་ཐབས་ཡིན་འདུགཡང་གསོ་
དཔྱད་རང་གཞུང་ལའང་ནད་རིགས་གང་ཡང་ལྟ་རེག་དྲི་བའི་སྒོ་ནས་བརྟགས་ནས་ངོས་འཛིན་ཐབས་ཡོད་
པར་མ་ཟད།གདོན་ནད་ཡིན་མིན་དང༌།ཡིན་ན་གདོན་གང་ཡིན་མིག་གིས་བལྟ་བ་ནད་པའི་དྲི་ཆུའི་མདོག་དང་འདྲ་གཟུགས་དང་ཕྱོགས་མཚམས་གང་ན་གདོན་རྟགས་ཡོད་མིན་ལ་བརྟག་པ་དང༌།སོར་མོས་རེག་པ་རྩ་ལ།
ངོ་མཚར་རྩ་བདུན་གྲས་ཀྱི་གདོན་རྩ་བརྟག་ཐབས་ལྟར།ནད་པའི་དོན་སྣོད་ཀྱི་རྩའི་འཕར་ཚུལ་ཁྱད་པར་བ་
གང་ཡིན་དང༌།མ་བུ་དགྲ་གྲོགས་སོགས་ཀྱི་སྒོ་ནས་བརྟག་པ་དང༌།བླ་རྩའི་འགྱུར་ལྡོག་སོགས་ལ་བརྟགས་ནས་
གདོན་ངོ་ཡོད་མེད་དང༌།ཡོད་ཚེ་གདོན་གང་ཡིན་ངོས་བཟུང་བ་དང༌།སྨན་པའི་ངག་གིས་ནད་པའི་ན་ལུགས་སམ་ནད་རྟགས་དང་སྔར་དང་མི་འདྲ་བར་ལུས་ངག་ཡིད་ལ་རྒྱུན་ལྡན་མིན་པའི་མངོན་ཚུལ་ཅི་བྱུང་རྣམས།
འབྱུང་གདོན་དང་གཟའ་གདོན་སོགས་གང་གི་ནད་རྟགས་ཡིན་མིན་ལ་གཞུང་ནས་གསུངས་པ་ལྟར་ཞིབ་པར་
བརྟག་པ་བཅས།ཕྱོགས་སོ་སོ་ནས་རྟོག་ཞིབ་ལེགས་པར་བགྱིས་པས་ནད་ངོས་ཕལ་ཆེར་ཟིན་ཐུབ།གལ་ཏེ་ངོས་
ལེགས་པར་མ་ཟིན་པའམ་དོགས་པ་ཤར་ན།ཕྱྭ་མོ་འདེབས་པའམ་པྲ་ལྟས་ལ་བརྟེན་ནས།ནད་ཕྱྭ་དང་གདོན་ཕྱྭ་སོགས་ལ་བརྟགཡང་ན་འབྱུང་རྩིས་ལྟར་ནད་རྩིས་ཐང་ཤིང་དང་རྒྱ་ནག་རྡེལ་སྐོར་ལྟར་ལྷ་ས་མི་ས་གདོན་ས་ལ་གང་བབ་སོགས་ལ་ཞིབ་པར་བརྟགས་པས་ངོས་ཟིན་པར་འགྱུར་རོ།།
ལྔ་བ་ན་ལུགས་སམ་ནད་རྟགས་ལ་བརྟག་པ་དངོས་ནི།གདོན་ནད་ཡིད་སེམས་ལ་ཞུགས་པ་སྨྱོ་བྱེད་དང་
བརྗེད་བྱེད་གཉིས་ཏེ་ཡིད་སེམས་འདྲེ་གདོན་གྱིས་ཁ་ལོ་བསྒྱུར་བའི་རྟགས་སུ་དོན་མེད་དུ་ངུ་བའམ་དགོད་པ་དང༌།འཚིག་པ་ཟ་བ་འདུག་མི་ཚུགས་པ་བླ་བརྡོལ་སྨྲ་བ་སོགས་འབྱུང་བ་སྟེ།ཞིབ་པར་ནད་འབུམ་དང་རྒྱུད་ཆེན་ན་གསལ་བ་ལྟར་བརྟག་པར་བྱ།ལུས་སེམས་ཡོངས་ལ་གདོན་ནད་ཞུགས་པ་འབྱུང་པོའི་གདོན་དང་གཟའ་
གདོན་དང་ཀླུ་གདོན་དང་བྱིས་པའི་གདོན་དང༌།གཞན་ཡང་སྐྱེས་པའི་ཁུ་བ་འཛག་པ་དང༌།མོ་ནད་ཕལ་བའི་
ནང་གསེས་རེ་བཅས་ཡིན་པར་གསུངས་ཤིང༌།དེ་དག་གི་ནད་རྟགས་གདོན་ནད་སོ་སོའི་ལེའུ་ན་གསུངས་པ་ལྟར་ལེགས་པར་འདྲི་རྟོག་བྱས་པས་ལུས་ཀྱི་ན་ཟུག་ཁོ་ན་མ་ཡིན་པར་ལུས་ངག་ཡིད་ལ་མངོན་ཚུལ་མི་འདྲ་བ་
དང་རྨི་ལམ་ཡ་མཚན་རྨི་བ་དང་གཉིད་མི་འོང་བ་ལ་སོགས་ཀྱིས་གདོན་རྐྱེན་གྱི་ནད་ཡིན་པ་ངོས་ཟིན་པར་
འགྱུར་རོ།།འབྱུང་གདོན་ནད་དང་སྨྱོ་བྱེད་གདོན་ནད་སོགས་ལ།དེང་དུས་གློག་འཕྲུལ་བཀོལ་ཏེ་ལྟ་ཞིབ་བྱས་ཚེ་མིག་ལམ་དུ་མཐོང་རྒྱུ་མེད་སྟབས་ནད་མི་འདུག་ཅེས་ཟེར་འདུག་ཀྱང༌།དོན་དུ་ནད་མེད་པ་མིན་ཏེ་ནད་པ་ལ་གདོན་ནད་ཀྱི་མངོན་ཚུལ་སྔར་མུས་ལྟར་ཡོད་པ་ནི་ཀུན་གྱིས་ཤེས་གསལ་ལྟར་རོ།།
དྲུག་པ་བཅོས་ཐབས་ལ།ནད་འབུམ་གྱི་འབྱུང་གདོན་བཅོས་ཐབས་ལས།བཅོས་ཐབས་སྔགས་བཟླས་གཏོར་མ་སྦྱིན་བསྲེག་དང༌།།ཀློག་འདོན་མཉམ་འཇོགས་བསྙེན་སྒྲུབ་ཚོགས་བསགས་པས།།འབྱུང་པོའི་གདོན་ཉིད་ཞི་
བར་བྱེད་པ་ཡིན།།བྱ་ཀྲི་རྐན་དྷ་ཀ་རི་སྤང་སྤོས་ཤུ་དག་རྨ་བྱའི་སྒྲོ།།ཤིང་ཀུན་སྦྲུལ་སྤགས་སྲན་ཕུག་བྱི་པའི་སྦྲུན།།ཆ་མཉམ་དུ་བས་བདུག་པས་འབྱུང་པོའི་ཁྱེར།།ཙན་དན་གུར་གུམ་སུག་སྨེལ་འབྲས་བུ་གསུམ།།བྱ་ཀྲི་སྐྱེར་པ་སྒྲོན་ཤིང་ཚ་བ་གསུམ།།གན་དྷ་པ་ཏྲ་དུག་ཉུང་པུ་ཤེལ་རྩེ།།ཡུང་དཀར་རྒྱ་སྤོས་ཤུག་པ་སྤྲི་ཡང་ཀུ།།དབྱེ་མོང་རུ་རྟ་
ཧོང་ལེན་བོང་ང་དཀར།།སྤང་མ་།བཅང་བ་བོང་བུ་ར་ལུག་སྡོས་རོས་གཅིན་དྲུག་མར་བསྙིང་ལ།།སྦྱར་བས་སྨན་དམར་ཞེས་བྱ་སྟེ།།བཟའ་བྱུག་སྣར་བླུག་གདོན་ལས་མྱུར་དུ་བསྒྲལ།།རིགས་སྔགས་གྲྭ་ལྔ་མཆོད་འབུལ་བགྲགས་ན་ཕན།།གཏོར་མ་རིན་ཆེན་དྲི་སྣ་འབྲུ་སྣ་དང༌།།མེ་ཏོག་འབྲས་ཆེན་ཁུར་བ་དཀར་མངར་བསྣན།།ལྷ་དང་བླ་མ་
དྲང་སྲོང་གྲུབ་པ་དང༌།།རྒན་པོ་ལྔ་ལ་ལྷའི་ཁོང་པར་བཏང༌།།ལྷ་ལ་བྱང་ཕྱོགས་ལྷ་མེན་ནུབ་ཏུ་སྦྱིན།།དྲི་ཟའི་
གདོན་ལ་བ་ལང་ལམ་མདོ་དང༌།།ཀླུ་དང་མཚུན་ལྷ་འབབ་ཆུའི་འབྲུམ་བུ་ཕྱིན།།གནོད་སྦྱིན་ཆུ་གཉིས་འདུས་པའི་གནས་སུ་བཏང༌།།སྲིན་པོ་ལམ་མདོས་ཚངས་པ་ཤར་དུ་མཆོད།།ཤ་ཟ་ལ་ནི་ནུབ་ཀྱི་ཁང་སྟོང་བཏང༌།།གཏོར་མ་སྦྱིན་བསྲེག་སྨན་དུད་ལས་སོགས་པ།།ཁྱད་པར་རང་རང་འཛིན་པའི་དུས་སུ་བསྟེན།།ཞེས་གསུངས་སོ།།བྱིས་པའི་གདོན་གྱི་བཅོས་ཐབས་ནི།ནད་འབུམ་དང་རྒྱུད་ཆེན་དུ།ཐོག་མར་མཆོད་སྦྱིན་བྱ་བ་དང་བྱིས་གདོན་ལ་གླུད་
ཡས་གཏོང་བ་སོགས་ཞི་བའི་བཅོས་བྱ་ལ།དེས་མ་ཐུལ་ན་དྲག་པོའི་བཅོས་བྱ་དགོས་ཚུལ་མདོར་བསྟན་ཙམ་ལས་མ་གསུངས།བྱིས་པའི་གདོན་ཆེན་བཅོ་ལྔའི་མདོས་ཆོག་ནི།འགྲེལ་བ་མེས་པོའི་ཞལ་ལུང་སོགས་དང༌།མན་ངག་
བཀའ་རྒྱ་མ་ན་བཀོད་ཡོད་པས་དེ་ལྟར་བྱ་བའམ།ཡང་ན་མདོས་ཆོག་གཞན་ན་བཞུགས་པ་ལྟར་ལག་ལེན་བྱའོ།།
གོང་གསལ་གྱི་གཟའ་བཅོས་ཀྱི་སྔགས་དང་འདྲ་གཟུགས་བཅའ་བ་སོགས་སྒེར་བཅོས་རེ་དེ་ལྟར་བྱ་ལ།དེ་དག་ལ་སྔོན་འགྲོ་དངོས་གཞི་རྗེས་བྱའི་ཆོ་ག་སོགས་གཞན་སྤྱི་རྒྱུགས་ལྟར་བྱ་བའི་ཕྱག་ལེན་བསྟར་སྲོལ་ཡོད།དེ་ཡང་
སྟོན་པ་གཤེན་རབ་ཀྱི་བཀའ་ལ་རྒྱུ་ཡི་ཐེག་པ་བཞི་བཞུགས་པ་ལས།ཕྱྭ་གཤེན་ཐེག་པ་ན་གཏོ་ཡི་ཆོ་ག་མང་པོ་བཞུགས་ནའང༌།དེ་ཙམ་གྱིས་ཕན་སྐྱེད་ཆེན་པོ་མ་བྱུང་ན་སྣང་གཤེན་གྱི་ཆོ་ག་སྡོངས་སུ་བཙལ་བ་སྟེ།སྣང་གཤེན་
ཐེག་པ་ནི་ཕྱྭ་གཤེན་ལས་རྒྱ་ཆེ་གཏིང་ཟབ་ཡིན་པས།ཡར་ལ་མཆོད་ཚོགས་འབུལ་བ་དང་མར་ལ་གླུད་ཡས་སོགས་སྦྱིན་པ་གཏོང་བ་རྣམས་གྱེར་སྒོ་བཞི་དང་སྐད་གཅོང་དགུ་སོགས་ཀྱིས་བདེན་པའི་སྨྲང་བཀྲོལ་ཏེ་མཆོད་སྦྱིན་བཏང་བས་སྣང་སྲིད་ཞི་བདེ་འབྱུང་བ་སོགས་ཕན་འབྲས་ཧ་ཅང་ཆེ་བ་སྟེ།སྤྱི་སྤུངས་སེམས་ལུང་གི་སྣང་གཤེན་སྐོར་ལས།ལྷ་ལ་ཡོན་ཕུལ་བས་སྐྱོབས།བགེགས་ལ་གླུད་བཏང་བས་ཞི།ཞེས་དང༌།ནད་འབུམ་ལས།སྨྲང་གིས་བཀྲོལ་བ་སྣང་གཤེན་དཔུང་ལ་སྦྲོན།།ཞེས་དང༌།སྨན་འབུམ་ལས།གདོན་ཅན་ནད་ལ་སྣང་གཤེན་སྡོངས་འཚོལ་བ།།
དཔུང་རོགས་གཞན་ནས་གཡར་ཏེ་དགྲ་འདུལ་འདྲ།།ཞེས་གསུངས་པའི་དོན་ནི།སྨན་དཔྱད་དང་གཏོ་བཅོས་
འགའ་ནི་ཕྱྭ་གཤེན་ཐེག་པ་ཡིན་ཞིང་དེས་ཆེར་མ་ཕན་ན།དེ་ལ་སྡོངས་ཟླ་དཔུང་ཆེན་ལྟ་བུའི་སྣང་གཤེན་ཐེག་
པའི་ཆོ་ག་ཅི་རིགས་ལག་ལེན་བྱ་ཞེས་གསུངས་པའོ།།ཡང་གོང་དུ།ཞི་བའི་འཇམ་བཅོས་མ་ཐུལ་དྲག་ལ་བསྣུན་
ཅེས་དང༌།དེས་ཀྱང་མ་ཐུབ་ཐ་མ་མནན་དང་བསྲེགཅེས་གསུངས་པའི་དྲག་པོའི་ལས་མཐའ་མནན་གཟིར་དང་སྦྱིན་སྲེགཟོར་འཕེན་པ།འགུག་སྒྲོལ་བྱ་བ་སོགས་ཕྱྭ་གཤེན་ལ་མེད་པས།འཕྲུལ་གཤེན་ཐེག་པ་དང་སྲིད་གཤེན་
ཐེག་པ་ལྟར་རམ།ཡང་ན་གསང་སྔགས་ཀྱི་བསྙེན་སྒྲུབ་ཟབ་མོ་ལ་བརྟེན་ནས་དྲག་པོའི་ལས་མཐའ་སྤྱད་པའི་
ཕྱག་ལེན་བཞུགས་པ་ལྟར་བྱའོ།།
བདུན་པ་གཏོ་བཅོས་དང་སྨན་བཅོས་ཟུང་འབྲེལ་གྱི་ཕན་ནུས།སྔོན་གཤེན་རྒྱལ་སྟོན་པ་མཆོག་དང་སེམས་དཔའ་ཆེན་པོ་རྣམས་དང་རིག་འཛིན་གྲུབ་ཆེན་རྣམས་ཀྱིས་གཏོ་བཅོས་དང་སྨན་དཔྱད་ཀྱིས་སྟོང་གསུམ་གྱི་
འཇིག་རྟེན་དང་ལྷ་ཀླུ་མི་ཡུལ་དུ་འགྲོ་ཕན་དཔག་མེད་བྱུང་བ་ནི་མཛད་པ་རྣམ་ཐར་དག་ན་གསལ་བ་ལྟར་ལ།དེང་དུས་སུའང་སྐྱེས་ཆེན་དམ་པ་དང༌།བཙུན་པ་ཁྲིམས་ལྡན་དང་སྔགས་པ་ནུས་ལྡན་དང་འཚོ་བྱེད་མཁས་པ་རྣམས་ལྟ་ཅི་སྨོས།ཐ་ན་བཙུན་པ་འདོན་ཆོག་ཤེས་ཙམ་དག་གིས་རིམ་གྲོ་བཏོན་པ་དང་སྨན་པས་སྨན་བཅོས་
བྱས་པས་གདོན་རྐྱེན་ཅན་གྱི་ནད་པ་མང་པོ་ལ་ཕན་ཐོགས་པ་ནི་མངོན་སུམ་པ་ཉིད་དེ་སོམ་ཉི་བྲལ་བ་ནི་བོད་ཀྱི་མང་ཚོགས་ཡོངས་ཀྱིས་ཤེས་གསལ་ལྟར་ལགས་སོ།།
ཞེས་པའང་སྐབས་བཅུ་གཉིས་པའི་རྒྱལ་སྤྱིའི་བོད་རིག་པའི་ཞིབ་འཇུག་ཚོགས་ཆེན་ལ་དབུལ་བའི་སྨན་
འབུམ་བཞི་དང་དཔལ་ལྡན་རྒྱུད་བཞིའི་མཚམས་སྦྱོར་སོགས་ཀྱི་དཔྱད་རྩོམ་ཞིག་སྨན་མིང་འཛིན་པ་དྲི་མེད་
འོད་ཟེར་རང་གིས་བྲིས་པ་ལས།རབ་གནས་༡༧ལྕགས་སྟག་ལོའི་སྟོན་ཟླ་འབྲིང་པོའི་ཡར་ཚེས་ལ།གཏོ་བཅོས་
དང་སྨན་བཅོས་ཟུང་འབྲེལ་བྱ་བ་དང་དེའི་ཕན་ནུས་བཅས་ཟུར་དུ་བཀོལ་བའོ།།དགེ་ལེགས་འཕེལ་གྱུར་ཅིག།
གཉེན་པོ་གཡུ་རྩེའི་ཤེས་རིག་ལྟེ་གནས་ལས་དྲངས།
