བཀྲ་ཤིས་པའི་རྟགས་བརྒྱད་ཇི་ལྟར་བྱུང་ཚུལ་བཤད་པ། །
གཙང་ཚ་དགེ་བཤེས་གཡུང་དྲུང་གཙུག་ཕུད། །
དེ་ཡང་རྟགས་བརྒྱད་ནི་བོད་མི་རིགས་ཀྱིས་ཁ་དགེ་བཀྲ་ཤིས་ཡོང་བའི་མཚོན་
རྟགས་གཙིགས་ཆེ་ཤོས་ཤིག་འཛིན་གྱི་ཡོད་པ་ནི།ཆོས་ལུགས་ཀྱི་ལྟ་བ་ཡོད་མེད་
ལ་མ་ལྟོས་པར་བོད་ཀྱི་སྲོལ་རྒྱུན་རིག་གནས་ལ་དགའ་ཞེན་ཡོད་རིགས་ཚང་མ་གཅིག་གྱུར་ཡིན།
བཀྲ་ཤིས་པའི་རྟགས་བརྒྱད་འདི་ཆེ་ས་དགོན་གྱི་གཙུག་ལག་ཁང་དང་ལྷ་ཁང་ཆེ་ཆུང་
རིགས་ཀུན་དང་བླ་བྲང་གྲྭ་ཤག་མགྲོན་ཁང་བཅས་དང་།རྒྱལ་པོའི་ཕོ་བྲང་།
སྤྱིར་བཏང་གྲོང་པའི་སྡོད་ཁང་།ཁྲིམས་སྲིད་སྡེ་ཚན་གྱི་ཚོགས་ཁང་།སྤྲོད་སྐྱིད་ཁང་།
གཞན་རས་གུར་བཅས་ཚང་མའི་ཕྱི་ནང་གང་སར་རི་མོའི་ལམ་དང་།
རྒྱུ་ཆ་སྣ་ཚོགས་ཀྱིས་གྲུབ་པའི་བཤམས་སྒྲིག་བྱེད་ཀྱིན་ཡོད།
དེ་ཡང་སེར་སྐྱ་ཀུན་གྱིས་བཀྲ་ཤིས་པའི་རྟགས་བརྒྱད་རེ་རེས་ཐུན་མོང་མ་ཡིན་
པའི་མཚོན་དོན་རེ་ཡོད་པ་ཤེས་མིན་ལ་མ་ལྟོས་པར།སྤྱིར་རྟགས་བརྒྱད་དེ་
ཡུལ་དུས་གནས་སྐབས་ཀུན་དང་།བྱ་བ་ཆེ་ཆུང་།སྤྱི་སྒེར།མི་ཆོས་དང་།
ལྷ་ཆོས་གང་ཡིན་ཡང་ཁ་དགེ་བཀྲ་ཤིས་ཡོང་བའི་མཚོན་དོན་ཡིན་པ་ལ་
ཐེ་ཚོམ་མེད་པ་ཕ་ཚ་བུ་རབས་ནས་བཞག་པའི་བག་ཆགས་བརྟན་པོའི་
རྗེས་འགྲོ་བྱེད་ཀྱི་ཡོད་པ་སྨོས་མེད་རེད། དེ་ལྟར་བྱེད་དགོས་དོན་ནི།
ཚད་ལྡན་ལོ་རྒྱུན་དང་མ་འབྲེལ་བར་གནའ་བོའི་མི་རྣམས་ཀྱིས་རྒྱུ་མཚན་
མེད་པར་རྨོངས་པའི་མོས་ཕྱོགས་ཙམ་གྱིས་མི་ཡི་འཚོ་བའི་ནང་རྒྱུན་ཆགས་སུ་
གནས་པ་ཤིག་མ་ཡིན་པར།ཁུངས་ལྡན་གྱི་ལོ་རྒྱུས་དང་འབྲེལ་བའི་བོད་ཀྱི་
སྲོལ་རྒྱུས་རིག་གནས་ཀྱི་སྣ་བརྒྱའི་མེ་ཏོག་བཞད་པའི་སྐྱེད་ཚལ་དུ་མཛེས་སྡུག་
རྣམ་པར་བཀྲ་བའི་མེ་ཏོག་ཨུཏྤལ་ཞིག་དང་གཉིས་སུ་མ་མཆིས། བོད་ཀྱི་ཐུན་མིན་ཆོས་དང་རིག་གནས་སྲོལ་རྒྱུན་བཟང་པོ་ཀུན་གྱི་མེས་པོ་ནི་
བོན་སྟོན་གཤེན་རབ་མཆོག་ཡིན་པས་ད་ལན་རྟགས་བརྒྱད་འདི་ཡང་
བཀྲ་ཤིས་པའི་མཚོན་རྟགས་སུ་ཇི་ལྟར་གྱུར་ཚུལ་ཡང་བོན་སྟོན་གཤེན་རབ་
མཆོག་གི་མཛད་རྣམ་ལས་བཀྲ་ཤིས་པའི་ལྷ་མོ་བརྒྱད་ཀྱིས་སྟོན་པ་ལ་བཀྲ་ཤིས་
གསོལ་བའི་རིམ་པ་ལྟར་དང་མཁན་ཆེན་ཉི་མ་རིན་པོ་ཆེས་མཛད་པའི་
བྱམས་མའི་རྒྱན་མཆོད་ཨུཏྤལ་དཀར་པོའི་ཕྲེང་བའི་ནང་གི་རིམ་པ་ཡང་དེ་དང་
མཐུན་པར་བཀོད་འདུག་པས་དེ་གཉིས་ལྟར་འགོད་པར་བྱ།
དེ་ཡང་བཀྲ་ཤིས་པའི་རྟགས་བརྒྱད་འདི་དུས་རབས་ཀྱི་དབང་དུ་བྱས་ན་
སྤྱི་ལོའི་སྔོན་གྱི་དུས་རབས་བོན་སྟོན་གཤེན་རབ་ཀྱི་སྐུ་དུས་ནས་དར་ཡོད།
བོན་སྟོན་གཤེན་རབ་མཆོག་སྤྱི་ལོའི་སྔོན་དུས་རབས་གང་ཞིག་ལ་བྱོན་ཡོད་པ་
དེང་དུས་ཚན་རིག་ཞིབ་འཇུག་པ་རྣམས་ཀྱིས་ཁས་ལེན་ལ་གཞིག་ནའང་
མ་མཐའ་སྟོན་པ་བཅོམ་ལྡན་འདས་མ་འཁྲུངས་བའི་སྔོན་དུ་བྱོན་ཡོད་པ་ཡིན།
བོན་གཞུང་རྣལ་མའི་དགོངས་དོན་ལྟར་ལོ་ངོ་ཁྲི་ཕྲག་སྔོན་ནས་བྱོན་ཡོད་པ་
གསལ་པོ་གསུང་ཡོད། སྐབས་འདིར་མདོ་དྲི་མེད་དང་མཁན་ཆེན་ཉི་མས་
མཛད་པའི་བྱམས་མའི་རྒྱན་མཆོད་ཨུཏྤལ་དཀར་པོའི་རྒྱན་ཕྲེང་ལྟར་འགོད་པར་བྱ།
༡ ༽ སྐྱོན་བྲལ་གྱི་པདྨ་ནི།
གཤེན་རབ་དགུང་ལོ་ཉེར་ལྔའི་ཐོག་ནམ་མཁར་འཕུར་ནས་ལྷ་གནས་
གཡུང་དྲུང་གསལ་བྱེད་གླིང་དུ་གཡུང་དྲུང་གསལ་སྨྲ་ཡོད་ཁམས་ཀྱི་
རྒྱུད་གསུངས་ཏེ་ལྷ་ལ་བོན་འཁོར་སྐོར་སྐབས།ལྷ་མོ་པདྨའི་མདངས་ཕུལ་ཏེ་
གདན་ལ་པདྨ་ལྟ་བུའི་འཁོར་བའི་ཉེས་སྐྱོན་དང་བྲལ་བའི་བཀྲ་ཤིས་གསོལ།
དེ་ནས་པདྨ་འདི་ཉིད་གདན་ལ་ཉེས་སྐྱོན་བྲལ་ཞིང་སྐུ་ཚེ་འཇིག་བྲལ་
ཞབས་པད་འདི་ཉིད་གདན་ལ་ཉེས་སྐྱོན་བྲལ་ཞིང་སྐུ་ཚེ་འཇིག་བྲལ་
ཞབས་པད་བསྐལ་བརྒྱར་བརྟན་པའི་མཚོན་རྟགས་ཞིག་ཏུ་གྱུར་བ་ཡིན།
༢ ༽ བཅུད་ལྡན་གྱི་བུམ་པ་ནི།
གཤེན་རབ་དགུང་ལོ་སོ་དྲུག་ཐོག་ལྷ་གནས་མར་བབས་ཏེ་རི་རབ་ཀྱི་
རྩེ་མོར་བྱོན་ཏེ་ཕྱག་ས་ལ་བརྡབས་པས་ས་ཡི་དབུས་ནས་བཀྲ་ཤིས་ཀྱི་
ལྷ་མོ་བུམ་པ་མས་གསེར་གྱི་བུམ་པ་བཅུད་ལྡན་ཞིག་ཕུལ་ཏེ་སྟོན་པའི་
མགུལ་ལ་བུམ་པའི་བཀྲ་ཤིས་གསོལ་བས།སྟོན་པའི་སྐུས་ལུས་གསེར་
མདངས་སུ་གྱུར་ཏེ་གཡུང་དྲུང་དག་པ་ལྷའི་རྒྱུད་བཤད།དེ་ནས་བུམ་པ་
འདི་ཉིད་མགུལ་ལ་འདོད་དགུ་འབྱུང་བའི་བང་མཛོད་ལྟར་བཀྲ་ཤིས་པའི་
མཚོན་རྟགས་ཤིག་ཏུ་གྱུར་བ་ཡིན་ནོ།།
༣ ༽ བཀྲ་ཤིས་པའི་གསེར་ཉ།
གཤེན་རབ་དགུང་ལོ་སོ་བདུན་ཐོག་རི་བདུན་ཁ་རུ་བྱོན་ཏེ་གཡུང་དྲུང་ཁྱིམ་
བདུན་མི་ཡི་ནང་དུ་གཡུང་དྲུང་རྨད་དུ་བྱུང་བའི་རྒྱུད་གསུངས།ཉ་ཅན་ལྷ་མོས་
དེ་དུས་གསེར་ཉ་ཟུང་གཅིག་ཕུལ་ནས་ཕྱག་ལ་གསེར་ཉ་ལྟ་བུ་མཉེན་ཞིང་
བདེ་བའི་བཀྲ་ཤིས་གསོལ་བས་གསེར་ཉ་འདི་ཉིད་ཕྱག་མཉེན་ཞིང་བདེ་བར་ཡོང་བའི་
བཀྲ་ཤིས་གསོལ་བའི་མཚོན་རྟགས་ཞིག་ཏུ་ཆགས་པ་ཡིན་ནོ།།
༤ ༽ མི་ནུབ་པའི་རྒྱལ་མཚན་ནི།
གཤེན་གྱི་དགུང་ལོ་སོ་བརྒྱད་ཐོག་ཟད་མཚམས་མ་ཏོག་གླིང་དུ་བདུད་རྗེ་
ཁྱབ་པ་སོགས་རབ་ཏུ་བྱུང་སྟེ་གཡུང་དྲུང་ཕལ་ཆེན་འདུལ་བའི་རྒྱུད་བཤད་ཚེ།
ལྷ་མོ་རྒྱལ་མཚན་མས་བདུད་ལས་རྣམ་པར་རྒྱལ་བའི་རྒྱལ་མཚན་བཙུགས་ཏེ་
སྐུ་མི་མཐུན་ཕྱོགས་མཐའ་དག་གི་གཡུལ་ལས་རྒྱལ་བའི་བཀྲ་ཤིས་གསོལ་བས།
དེ་ནས་རྒྱལ་མཚན་འདི་ཉིད་མི་མཐུན་ཕྱོགས་ལས་རྒྱལ་བའི་
བཀྲ་ཤིས་པའི་མཚོན་རྟགས་ཞིག་ཏུ་ཆགས་པ་རེད།།
༥ ༽འགག་མེད་ཀྱི་དུང་ནི།
བོན་སྟོན་གཤེན་རབ་མཆོག་དགུང་ལོ་ཞེ་གཅིག་ཐོག་གསས་མཁར་
ཁྲི་སྨོན་རྒྱལ་བཞད་ཀྱི་ནང་དུ་གཡུང་དྲུང་ཁྲི་སྨོན་རྒྱལ་བའི་རྒྱུད་བཤད་
ནས་བོན་སྒྲས་འཇིག་རྟེན་ཁྱབ་པར་གྱུར་སྐབས།ལྷ་མོ་དུང་ཅན་མས་གསུང་ལ་
འགག་པ་མེད་པར་བཀྲ་ཤིས་པའི་ཆེད་དུ་དུང་དཀར་གཡས་འཁྱིལ་ཞིག་ཕུལ་ཏེ་
གསུང་ལ་འགག་མེད་ཚངས་དབྱངས་དྲུག་བཅུའི་བཀྲ་ཤིས་གསོལ་བ་ནས་
བཟུང་དུང་དཀར་འདི་ཉིད་གསུང་ལ་འགག་པ་མེད་པའི་བཀྲ་ཤིས་པའི་མཚོན་རྟགས་ཞིག་ཏུ་གྱུར་པ་ཡིན།།
༦ ༽ ཕུན་ཚོགས་ཀྱི་དཔལ་བེའུ་ནི།
བོན་སྟོན་གཤེན་རབ་མཆོག་དགུང་ལོ་ཞེ་གཉིས་ཐོག་གསས་ཁང་ཁོལ་མ་
ནེའུ་ཆུང་དུ་གཡུང་དྲུང་ཁོང་མ་དག་པའི་རྒྱུན་འཆད་སྐབས་ཐུགས་ཉིད་
གཡོ་བ་མེད་པའི་ཡེ་ཤེས་ལྔ་ཡི་རྣམ་པ་རབ་ཏུ་བཀྲ་བའི་ཚེ།ལྷ་མོ་དཔལ་བེའུ་མས་དཔལ་བེའུ་མས་
དཔལ་བེའུ་ཞིག་ཕུལ་ནས་ཐུགས་ལ་གཡོ་བ་མེད་པའི་བཀྲ་ཤིས་གསོལ་བས།
དེ་ནས་བཟུང་དཔལ་བེའུ་འདི་ཉིད་ཐུགས་ལ་སྡུག་བསྔལ་དང་གཡོ་འཁྲུལ་མེད་པར་
བཀྲ་ཤིས་པའི་མཚོན་རྟགས་ཞིག་ཏུ་གྱུར་པ་ཡིན།།
༧ ༽དབང་སྒྱུར་གྱི་འཁོར་ལོ་ནི། །
བོན་སྟོན་གཤེན་རབ་མཆོག་དགུང་ལོ་ཞེ་གསུམ་ཐོག་ཕོ་གླིང་མོ་གླིང་གཉིས་ཀྱི་
བར་མཚམས་མཆོད་རྟེན་ཆེན་པོའི་དྲུང་དུ་ལས་འབྲས་མངོན་སྟོན་སྲིད་པའི་
འཁོར་ལོ་སོགས་མངོན་པའི་བོན་འཁོར་སྐོར་སྐབས།ལྷ་མོ་འཁོར་ལོ་མས་
འཁོར་ལོ་ཞིག་ཕུལ་ནས་ཞབས་ལ་ཐོག་པ་མེད་པར་གསེར་གྱི་འཁོར་ལོས་བཀྲ་ཤིས་གསོལ་བས་
དེ་ནས་བཟུང་འཁོར་ལོ་འདི་ཉིད་ཞབས་ལ་ཐོག་ཆགས་མེད་པའི་བཀྲ་ཤིས་པའི་མཚོན་བྱེད་ཞིག་ཏུ་གྱུར་པ་ཡིན།།
༨ ༽ སྐྱོབ་པའི་གདུགས་ནི།
བོན་སྟོན་གཤེན་རབ་མཆོག་དགུང་ལོ་ཞེ་དགུའི་ཐོག་མི་གཡོ་བསམ་གཏན་
གླིང་དུ་གཡེང་བའི་ཚོགས་སྤང་དབེན་པའི་གནས་བརྟེན་ཏེ།ཚིག་བོར་དོན་ལ་
བསྒོམ་ཏེ་གཞི་ལམ་འབྲས་བུའི་བོན་རྣམས་གཏན་ལ་ཕབས་ནས་སྒོམ་པའི་ཐོག་བར། ལྷ་མོ་གདུགས་ཅན་མས་དབུ་ཡི་མཁའ་ལ་གདུགས་ཕུབ་ཏེ་གདུགས་ལྟར་ལྟར་
ཀུན་གྱི་བླ་ན་མཐོ་བའི་བཀྲ་ཤིས་གསོ་བ་ནས་གདུགས་འདི་ཉིད་དབུ་འཕང་
དགུང་དང་མཉམ་པར་བཀྲ་ཤིས་པའི་མཚོན་བྱེད་ཞིག་ཏུ་གྱུར་པ་ཡིན།།
དེ་ཡང་གོ་རིམ་སྒྲིག་ཚུལ་མི་འདྲ་བ་འགའ་ཞིག་སྣང་བ་ནི།
དཔེར་ན།
བོན་དཔེ་རྒྱས་པ་ཀུན་སྣང་ལྟར་ན།
དང་པོ་མི་ནུབ་པའི་རྒྱལ་མཚན།
གཉིས་པ་སྐྱོབ་པའི་གདུགས་ཆེན།
གསུམ་པ་བཅུད་ལྡན་བུམ་པ།
བཞི་པ་ཕུན་ཚོགས་དཔལ་བེའུ།
ལྔ་པ་བཀྲ་ཤིས་གསེར་ཉ།
དྲུག་པ་སྒྲ་རྒྱལ་དུང་ཆེན།
བདུན་པ་དབང་སྒྱུར་འཁོར་ལོ།
བརྒྱད་པ་སྐྱོན་བྲལ་པདྨ་ཞེས།
མཚོན་བྱ་རྒྱལ་མཚན་
དེ་སྐུ་ནུབ་པ་མེད་པ་མི་མཐུན་པའི་
ཕྱོགས་ལས་རྒྱལ་བའི་བཀྲ་ཤིས་པའི་མཚོན་བྱེད་དང་།
གདུགས་ནི་
དབུ་ཉོན་མོངས་ཚ་གདུང་སེལ་ཞིང་དུས་གསུམ་རྟག་དུ་སྲིད་གཞི་
ཀུན་གྱི་བླ་རུ་མཐོ་བའི་བཀྲ་ཤིས་པའི་མཚོན་བྱེད་དང་།
བུམ་པ་ནི་
མགུལ་ལ་ཚངས་དབྱངས་དྲུག་ཅུའི་བཅུད་ལྡན་ཤིང་སྙན་པའི་སྒྲ་ཆེན་
ཡོངས་ལ་ཁྱབ་པར་བཀྲ་ཤིས་པའི་མཚོན་བྱེད་དང་།
དཔལ་བེའུ་ནི་
ཐུགས་འཁྲུལ་བ་མེད་པ་སྤངས་རྟོགས་ཕུན་སུམ་ཚོགས་པར་
བཀྲ་ཤིས་པའི་མཚོན་བྱེད་དང་།
གསེར་ཉ་ནི་
ཕྱག་རྫུ་འཕྲུལ་ཉམས་ང་མེད་ཅིང་མི་འཇིགས་སྟོབས་དང་
ལྡན་པར་བཀྲ་ཤིས་པའི་མཚོན་བྱེད་དང་།
དུང་ཆེན་ནི་
གསུང་མ་འགག་ཀུན་གྲགས་ཐོག་མེད་སྣང་སྲིད་ཟིལ་གྱིས་
ནོན་པར་བཀྲ་ཤིས་པའི་མཚོན་བྱེད་དང་།
འཁོར་ལོ་ནི་
ཞབས་རྫུ་འཕྲུལ་ཐོགས་མེད་ཞིང་ཀུན་དབང་བསྒྱུར་བར་
བཀྲ་ཤིས་པའི་མཚོན་བྱེད་དང་།
པད་མ་ནི་
གདན་དྲི་མེད་སྐྱོན་བྲལ་བཀྲག་ལ་གསལ་བར་བཀྲ་ཤིས་པའི་
མཚོན་བྱེད་དུ་དབུ་ནས་མར་བཀྲ་ཤིས་གསོལ་བ་ལྟར་མཛད་འདུག
དེ་ལྟར་བཀྲ་ཤིས་པའི་རྟགས་བརྒྱད་འདི་ཞང་བོད་རང་གི་ཐུན་མོང་
མ་ཡིན་པའི་སྲོལ་རྒྱུན་རིག་གནས་མི་རིགས་གཞན་ལ་ངོམ་རིན་ཆོག་པ་
ཞིག་ཡིན་པ་ལས་ཁྱིམ་མཚེས་གཞན་ནས་གཡར་བ་ལྟ་བུ་མིན་པ་ཡིད་
ཆེས་ཐུབ་པའོ།། ཡང་རྒྱ་ནག་སོགས་ཡུལ་གྲུ་གཞན་ལ་དར་ཡོད་པ་ནི་དཔེར་ན་རྒྱ་ནག་གིས་
བཟོས་པའི་ཞལ་དཀར་སོགས་ལ་བཀྲ་ཤིས་པའི་རྟགས་བརྒྱད་ཀྱི་རི་མོ་
རྒྱག་སྲོལ་ཡོད་པ་ལྟར་རོ།།
སྲོལ་རྒྱུན་རིག་པའི་ལུས་བཟང་འདི། །
སྲོལ་རྒྱུན་བཟང་པོའི་མི་རིགས་ཀྱི། །
སྲོལ་རྒྱུན་ཡ་རབས་མཚོན་བྱེད་དུ། །
སྲོལ་རྒྱུན་ལམ་ནས་ངེས་ཤེས་ཐོབ། །
༼ དཔྱོད་ལྡན་མཆོད་པའི་མེ་ཏོག་ལས་བཤུས ༽
