རྩྭ་ཐང་གི་སྙན་ངག
ཞོགས་པ།
སྐྱ་རེངས་བུ་མོའི་བརྩེ་བའི་ཞགས་པས་ཉིན་བྱེད་དམར་པོ་བསུས་པས་ན།།
རྔམས་བརྗིད་རི་བོར་སྐ་རག་བཅངས་འདྲའི་སྤྲིན་པ་ལེབ་མོའི་ཐུ་འོག་གི།
དགོ་དགོ་བཞོ་དབྱངས་ངག་ལ་འགུགས་པའི་ཚངས་སྲས་དྲུག་འགྱུར་བུ་མོ་ང་།།
མཛེས་པའི་རྩྭ་ཐང་མི་འབྲེལ་བརྗོད་བྱ་དཔྱོད་ལྡན་མཁན་པོའི་སྙན་ངག་ཅིག།
ས་སྲོད།
དམར་པོ་ཁྲག་གི་མདངས་ལ་འཁུ་བའི་རྟ་བདུན་དབང་བོ་ནུབ་རིར་ཡིབ།།
མཚམས་སྤྲིན་སེར་པོའི་འཛུམ་མདངས་འོད་ཀྱིས་རི་རྒྱལ་མཐོན་པོར་མཆོར་ལྭ་བཀླུབས།།
གཞོན་ཟུང་ཕོ་མོའི་ཡིད་ལ་འཇགས་པའི་བསིལ་འཇམ་དུང་ཟླ་གོར་མོ་ང་།།
མཛེས་པའི་རྩྭ་ཐང་མི་འབྲེལ་བརྗོད་བྱ་དཔྱོད་ལྡན་མཁན་པོའི་སྙན་ངག་ཅིག།
མཚན་མོ།
ཚང་ཚིང་གཡུ་ལོའི་ནགས་ཚལ་གཡོགས་འདྲའི་སྨག་རུམ་སྟུག་པོའི་འཇིག་རྟེན་བཀབ།།
ཐམས་ཅད་ཉིན་དེའི་ངལ་དུབ་ཁྲོད་ནས་རྨི་ལམ་ཞིམ་པོའི་གཡང་ལ་དེད།།
བརྩེ་བ་ཟབ་མོའི་མཁའ་ན་རྒྱུ་བའི་རྨི་ལམ་ནང་གི་མཛའ་མོ་ང་།།
མཛེས་པའི་རྩྭ་ཐང་མི་འབྲེལ་བརྗོད་བྱ་དཔྱོད་ལྡན་མཁན་པོའི་སྙན་ངག་ཅིག།
༢༠༡༡ ༨ ༡༦ཉིན་པེ་ཅིན་ལ་འགྲོ་བའི་ལམ་ཁར་བྲིས།
