རྨི་ལམ་གྱི་རོལ་དབྱངས།

དུངས་སེམས་སྙིང་དུ་བསྒོམ་པའི་བརྩེ་བ་འདི།།

སྙིང་གི་མཚོ་མོར་སྤྲིངས་པའི་སྙན་ངག་ཡིན།།

མིག་ཆུ་ས་རུ་འཐིམ་པའི་མྱ་ངན་འདི།།

སེམས་ཀྱི་མཉམ་དཀྲོལ་རོལ་མོའི་གདུང་དབྱངས་ཡིན།

ཁ་བ་མར་མར་འབབ་པའི་གཏམ་རྒྱུད་ཀྱིས།།

རྒྱང་རིང་མཚོ་མོའི་སེམས་ལ་ན་ཟུག་བསླངས།།

ཁུ་བྱུག་ལྷོ་མོན་འགྲིམས་པའི་སྐྱོ་གར་གྱིས།།

སྙན་ངག་མཁན་པོར་མིག་ཆུའི་འཇིག་རྟེན་བསྐྲུན།།

འཇག་མའི་ཤུགས་གླུ་གྱེར་བའི་དབྱངས་རྟ་ནི།།

བདག་ལ་མྱ་ངན་ཞུ་བའི་རོལ་དབྱངས་ཡིན།།

ཁྱོད་ཀྱིས་མགྲིན་ལས་བརྡོལ་བའི་གཞས་གླུ་དེ།།

བདག་སེམས་མཁར་རུ་འདྲེན་པའི་བརྩེ་བ་ཡིན།།

ཁ་དོག་མདངས་ཀྱིས་ཕྱུག་པའི་འཇིག་རྟེན་འདི།།

འུ་གཉིས་གར་ལ་རྩེན་སའི་སྟེགས་བུ་སྟེ།།

རྨི་ལམ་ཞིང་ནས་འཕྲད་པའི་མཇལ་འཛོམས་ནི།།

ཁྱོད་ཀྱིས་ང་ལ་བཞག་པའི་མིག་ཆུ་ཡིན།།

མཚོ་མོས་ཟླ་བ་བསྒོམ་པའི་བརྩེ་བ་འདི།།

བདག་སེམས་ཁྱོད་ལ་འཁྲེང་བའི་སྙན་ངག་ཡིན།།

ཟླ་བ་མཚོ་ལ་ལྷུང་བའི་གཏམ་རྒྱུད་དེ།།

ཁྱོད་དང་ང་ཡི་སྐྱོ་འཁྲབ་རིང་མོ་ཡིན།

ཆུ་མོ་ཤག་ཤག་བཞུར་བའི་དབྱངས་རྟ་ནི།།

ཁྱོད་དང་ང་ཡི་དགོད་སྒྲའི་འགྱུར་ཁུགས་ཡིན།།

བརྩེ་བ་ལྷུག་ལྷུག་བརྗོད་པའི་སྙིང་གཏམ་དེ།།

མིག་ཆུའི་མཆོད་ཆང་ཕུལ་བའི་གདུང་དབྱངས་ལགས།།

རླབས་ཀྱིས་སྐྱོམས་པའི་ཆུ་ཡི་ཟེགས་མ་ནི།།

ཁྱོད་ལ་སྒྲོན་པའི་གཡུ་ཡི་ཕྲ་རྒྱན་ཡིན།།

སྒྱུ་འཕྲུལ་གར་གྱིས་བཞེངས་པའི་ཕོ་བྲང་འདི།།

ཏིང་འཛིན་སྨྱུག་ལས་སྐྱུགས་པའི་སྙན་ངག་ཡིན།།

སྡོང་ལོ་སེར་པོ་གཅིག་གིས་སྟོན་དུས་ཤེས།།

མེ་ཏོག་གསར་བཞད་ཅིག་གིས་དབྱར་དུས་ཤེས།།

མིག་ཆུས་བཞེངས་བསྐྲུན་གནངས་པའི་སྙན་ངག་འདི།།

མཚོ་མོའི་ལས་ཀྱི་གཏན་གྲོགས་ཡིན་པར་ཤོག།