བུ་མོ་གཡུ་འབྲུག་མཚོ་མོ།

གཞས་སྙན་མོ་དབྱངས་ལ་བཀུགས་ན།།       རོགས་སུ་ཞིག་ཡིད་ནས་དྲན་ཡོད།།

རི་མཐོན་པོར་སྨུག་པས་བརྒྱབ་ན།།           ཡིད་ས་ཕྱོགས་གང་ལ་འཁྲེང་ཡོད།།

ཨ།       ཆུང་འདྲིས་བྱམས་པ།      གཡུ་འབྲུག་ཡ་མཚོ་མོ།

ལོ་ཟླ་བ་ཕར་ལ་བསྐྱལ་ན།།          མིག་ཁྲ་ཆུང་མཆི་མའི་གཡོགས་འགྲོ།།

སེམས་གོར་མོར་ན་ཟུག་བརྒྱབ་ན།།       སྙིང་ཡ་ཆུང་འཁྱགས་པའི་འཐེབས་འགྲོ།།

ཨ།   གཡུ་འབྲུག་མཚོ་མོ།   ཆུང་འདྲིས་ཡ་བྱམས་པ།   ཁྱེད་རང་དྲན།

དགུང་མཚམས་སྤྲིན་རི་རྩེར་འཁྱིལ་ན།།       ཞེ་འདང་ཅན་སུ་ལ་སྒུག་ཡོད།།

འབྲི་མཛོ་མོའི་སུག་བཞིའི་བར་ན།།           སེམས་དྲོན་མོ་སུ་ལ་ཆགས་ཡོད།།

ཨ།       ཆུང་འདྲིས་བྱམས་པ།      གཡུ་འབྲུག་ཡ་མཚོ་མོ།

སྦྲ་གྲུ་བཞིའི་ཁ་འཚུབ་བར་ནས།།    སེམས་དམར་ཆུང་ཁྱེད་ལ་གཏད་ཡོད།།

རྟ་འདོ་བའི་རྐྱ་རྩལ་གོང་ན།།            ཆང་བཟི་ཁའི་རང་སེམས་གླན་ཡོད།།

ཨ།      གཡུ་འབྲུག་མཚོ་མོ།   ཆུང་འདྲིས་ཡ་བྱམས་པ།   ཁྱེད་རང་དྲན།