གཡུ་ཆུང་ལགས།  ཁྱོད་ཀྱི་གདོང་ལ་གཉེར་མ་འཁྱིལ་འདུག

རྒས་གཉེར་གྱི་ཐོད་ལ་རི་མོ་བཀོད་པ་སྤྱི་འགྲོས་ཤིག་ཏུ་རྩིས་ཆོག་མོད།

བྱིས་པའི་རྨ་མེད་ཀྱི་བསམ་བློར་སྔ་ས་ནས་རྒས་ཉམས་ཤར་བ་དེ།

ཆུང་དུས་ཀྱི་མིག་ལམ་ན།

ལོ་ངོ་ག་ཙམ་ཞིག་སྐར་ཆ་འགའ་ལས་མ་སྣང་ནའང༌།

ཨ་ཕའི་གླིང་སྒྲུང་ལྟ་བུའི་ངག་རྒྱུན་རིང་མོའི་ཁུགས་བར་ན།

ཨ་མའི་གླུ་ངག་ལྟ་བུའི་གནའ་གཏམ་དྲོན་མོའི་སེམས་རྩ་ན།

གཡུ་ཆུང༌།  ནམ་ཡང་གཞོན་པར་མ་གྱུར་བའི་བྱིས་པ་ཆུང་ཆུང་ཞིག་སྟེ།

སུས་ཀྱང་བློ་ཡིད་ལ་མ་ཤོང་བའི་ཁྱད་མཚར་གྱི་གཏམ་རྒྱུད་རིང་མོ་ཞིག

སྤྱི་ལོ་2008ནས་ཕྱིར་ལྡོག་གིས་1988བར་བགྲང་ན།

ང་ཏག་ཏག་རང་ལོ་ཉི་ཤུ་བུད་མ་ཐག་ཡིན་ལ།

སེམས་ཀྱི་གསང་གཞས་ཐར་ཐོར།  ཕ་གའི་བྲག་ཆར་བཅོལ་བའི་དུས་སྐབས་ཀྱང་ཡིན།

འོན་ཀྱང༌།  བརྩེ་བ་གསོན་སྲེག་གི་མིག་ཆུའི་རྡོག་ཐུག་རེ་རེ།

ངའི་ཡིད་ཀྱི་གུར་ཁང་ན་མཚོ་མོ་བཞིན་ལྟིམས་གྱི་ལེར་འཁྱིལ་ནས་ཡོད་ལ།

ངའི་སྙིང་གི་དཀྱིལ་དབུས་ན་མེ་ཕུང་བཞིན་དམར་ལྷམ་མེར་འཕྱུར་ནས་ཡོད།

དེ་བས་ཁྱེད་ཀྱིས་ང་ལ་འདྲི་ཚིག་མི་བསྐྱོན་པར་ཞུ།

ངའི་ཉམ་ཆུང་ཆུང་གི་ཕ་ཡུལ་འདིའི་བྱམས་བརྩེ་ལས།

ངའི་ཞེ་དུལ་དུལ་གྱི་མི་རབས་འདིའི་མཛའ་གཤིས་ལས། 

ཅི་ཡང་མི་ཤེས།  ཤེས་ཡང་མི་འདོད།

དེ་བས་ཁྱེད་ཀྱིས་ང་ལ་གུ་ཡངས་གཏོང་རོགས་ཞུ།

བཀྲེས་སྐོམ་གྱི་གདུང་བའི་མནར་དུས་ངས་རང་གི་མིག་ཆུ་མིད་ཀྱང་མྱོང་ལ།

གཏམ་རྒྱུད་ཀྱི་བྱུང་བ་གླེང་དུས་ངས་རང་གི་མཆུ་སྒྲོས་ལ་མནར་གཅོད་བཏང་ཡང་མྱོང༌།

མ་གཞི་ནས་མགོ་དགྱེས་ནས་ནམ་མཁར་བལྟ་བུའི་སྔོན་གོམས་མེད་ན་ཡང༌།

མགོ་སྒུར་ནས་མུ་ཏིག་གི་ཕྲེང་རྡོག་རེ་རེ་གསོག་སྤུངས་བྱེད་པའི་བསམ་བློ་ད་དུང་ཡལ་མེད།

གོམས་གཤིས་འདི་གཉིད་མི་ཁུག་པའི་ཁོར་ཡུག་དེའི་དཀྱིལ་དབུས་ནས་སྦར་བའི་རེད་ལ།

གོམས་གཤིས་འདི་ལས་ང་ཚོ་མི་ཡུལ་གཞན་ཞིག་དང་བར་ཐག་ཉེ་ནའང༌།

ངས་ད་དུང་རང་གི་སྔོན་གོམས་དེ་བསྒྱུར་ཐུབ་མ་བྱུང༌།

ཨ་ཕའི་ངག་རྒྱུན་རིང་མོས།  ཨ་མོའི་གནའ་གཏམ་དྲོན་མོས།

ཉི་ཟེར་ཞིག་དང་མཚུངས་པའི་ཁྱེད་ཀྱི་གླུ་གཞས་དེ།

རླུང་གི་བཤོག་པར་བཅིབས་ནས་ངའི་ཚར་རུའི་གོང་ཁ་ན་རྒྱུ་དུས།

ངས་མགོ་སྒུར་ནས་རང་སེམས་མེ་ལོང་ངོར་གསན་རྗེན་གནང་ཐེངས་རེར།

ང་དངོས་ནས་རྒས་སོང་འདུག 

བྲིས་མི་ཚར་བའི་ཨ་ཕའི་གླིང་སྒྲུང་གི་རྟོགས་བཟོའི་ལྟེབས་ཅག་བར་ནས།

བཤད་མི་ཚར་བའི་ཨ་མའི་གནའ་གཏམ་གྱི་མིག་ཆུའི་ཁུག་བར་ནས།

གཡུ་ཆུང༌། དངོས་ནས་རྒས་སོང་འདུག

ལོ་རྒྱུས་ཀྱི་སྨག་རིམ་གདོང་གིས་མ་བསུས་པར།

བསུས་ནས་ཀྱང་གདོང་འབོག་གི་ཁ་དོག་ཚོན་བྲིས་མ་རྫོགས་པར་རྒས་འདུག

སྟབས་སྟབས་སུ་མིའི་སླད་དུ་ཤ་ཁྲག་གི་གླུའི་མཚོད་པ་འཕྱོ་སྟངས་གཅིག་དང༌།

གདོང་གི་མིག་ཆུ་འཕྱོར་གང་ས་ལ་ཟགས་སྟངས་ཤིག་གིས།

ང་ལ་ཕྱིར་དྲན་གྱི་ཚུལ་དུ་གླུ་ཅིག་ལེན་འདོད་ཀྱི་སྤོབས་པའི་བློས་བསྐྱེད་ཐུབ་ན་ཡང༌།

བུ་དང་ཆུང་མ།  རྒྱུ་དང་ནོམ་པ།  ཐོབ་དང་གོ་གནས་ཀྱི་སླད་དུ།

གཡུ་ཆུང༌།  དངོས་ནས་རྒས་པ་སྔ་དྲག་སོང༌།

ཨ་ཕའི་ལ་ཐོད་ཀྱི་གཉེར་མའི་འབྱུང་རྩར་སེམས་ཤུགས་མ་གཏད་པར།

ཨ་མའི་སེན་སྟེང་གི་རྨ་ཁར་གསོ་བཅོས་ཀྱི་ལྷམ་པ་མ་བརྩེགས་པར།

རྒས་སོང༌།  ཕྱིར་མིག་མེད་ལ་འགྱོད་སེམས་ཀྱང་མེད་པར་རྒས་ནས་བུད་སོང༌།

གཡུ་ཆུང༌།  དྲན་སེམས་ཀྱི་ཀློང་ངོས་སུ་ཁྱོད་ཉིད་མངོན་་ཐེངས་རེར།

ང་མིག་ཆུས་ཁུར་ནས་ཐག་རིང་གི་མྱ་ངན་ཐང་དེར་ཆས་ཀྱིན་ཡོད་ནའང༌།

འཇགས་མི་སྲིད་པའི་མཚོ་མོའི་རླབས་རིས་ཀྱི་འགྱུར་བག་རེ་ནས།

ངས་ཁྱོད་ལ་སོ་ལྟ་བྱས་ནས་ཡོད།

གཡུ་ཆུང༌།  ལྗིད་ཏིག་ཏིག་གི་ཡིག་འབྲུའི་སོ་ཁར་ཁྱོད་ཉིད་མངོན་ཐེངས་རེར།

ང་རལ་གྲིས་ཡང་རྩེར་བཏེགས་ནས་ལུས་བོངས་འདི་ཚད་འཇལ་ཡོད་ནའང༌།

མེད་མི་སྲིད་པའི་ངའི་སྙན་ངག་གི་སྐྲ་ལོའི་སྲུབས་ཀ་རེ་ནས།

ངས་ཁྱོད་ལ་གསོལ་ཆང་འདྲེན་ནས་ཡོད།

2011.8.6ཉིན་ཕ་ཡུལ་རེབ་གོང་ནས།