ཨ་ཇོ་ལགས།
རི་རྩེ་སྨུག་པའི་ཡོལ་རས་རྒྱབ་བྱུང༌། །
ཡོལ་རས་སྙན་མོ་གླུ་ཡིས་སྒུལ་བྱུང་༌། །
སེམས་ཀྱི་ཡོལ་རས་ཕྱེས་ཐེངས་རེ་ལ། །
སྙིང་གི་ཨ་ཇོའི་ཚིག་གསུམ་དྲན་བྱུང༌། །
ཨ་ཇོ་ལགས། ཚེ་རིང་བསམ་འགྲུབ།
གཟི་མདངས་འོད་ཆེན་ཉི་མའི་ཞལ་རས། །
ཟུར་གསུམ་སྙིང་གི་དབུས་སུ་བབས་བྱུང༌། །
དུང་སེམས་བརྩེ་བའི་འོད་ཐིག་ཕྲ་མོ། །
མདང་གསུམ་རྨི་ལམ་ཁྲོད་དུ་ཤར་བྱུང༌། །
ཨ་ཇོ། ཨོ། སེམས་ཀྱི་ཉི་མ།
མིག་ཆུའི་ཀློང་ན་ཁྱེད་རང་དྲན་ཡོད།
ཨ་ཇོ། ཨོ། ཡིད་ཀྱི་ནོར་བུ།
དམར་ཆུང་སེམས་པ་ཁྱེད་ལ་འཁོར་ཡོད།
དགོང་ཁའི་ཉི་མའི་ཕྱི་མིག་གནངས་བྱུང༌། །
ཕྱི་མིག་མཚམས་སྤྲིན་ཀློང་ལ་བསྐྱུར་བྱུང༌། །
འཁྱམ་པོའི་ཕྱི་མིག་འཁོར་ཐེངས་རེ་ལ། །
སྙིང་གི་ཨ་ཇོའི་ཞལ་རས་དྲན་བྱུང༌། །
ཨ་ཇོ་ལགས། ཚེ་རིང་བསམ་འགྲུབ།
གསུང་སྐད་སྙན་མོ་ཅོ་ཀའི་དྲུག་འགྱུར། །
དྲན་པའི་ཀློང་ལ་ལན་གསུམ་འཁོར་བྱུང༌། །
ཚིག་གསུམ་དམ་བཅའི་སྙིང་གི་རི་མོ། །
གངས་དཀར་སེམས་ལ་ཐེངས་གསུམ་དྲན་བྱུང༌། །
ཨ་ཇོ། ཨོ། སེམས་ཀྱི་ཉི་མ།
མིག་ཆུའི་ཀློང་ན་ཁྱེད་རང་དྲན་ཡོད།
ཨ་ཇོ། ཨོ། ཡིད་ཀྱི་ནོར་བུ།
དམར་ཆུང་སེམས་པ་ཁྱེད་ལ་འཁོར་ཡོད།
