དགུང་སྟོན་མཆོད་སྤྲིན་ང་ཡིས་འབུལ།

ཤར་མཐའི་སྐྱ་རེངས་ཤར་ས་ནས། །                          

མཐུན་སྒྲིལ་གསེར་གྱི་ཉི་གཞོན་འཛུམ། །                                                

   དེ་རིང་བཀྲ་ཤིས་ཉི་མ་ལ། །    

 དགའ་བའི་གླུ་དབྱངས་ང་ཡིས་ལེན།

 

དུང་རི་དཀར་པོའི་ཉེ་ལྗོངས་སུ། །

གཡུང་དྲུང་རིས་ཀྱི་ཀླུང་རྟ་ཞིག །

དེ་རིང་དགུང་དུ་ཕྱར་བ་ལ། །

ཀི་བསྭོའི་ལྷ་རྒྱལ་ང་ཡིས་སྒྲོག །

 

སྐྱང་གླིང་གཤེན་གྱི་དགའ་ཚལ་ནས། །

ལུང་རྟོགས་རྩི་བཅུད་རྒྱས་པའི་གཤེན། །

དྲུང་རམས་མཁས་པའི་ཐུགས་སྲས་ཁྱེད། །

དགུང་སྟོན་མཆོད་སྤྲིན་ང་ཡིས་འབུལ། །

 

སྒྲ་རྒྱལ་འབྲུག་གི་གནམ་ལོ་འདིར། །

ཤེས་རབ་ལྷ་ཡི་རོལ་གར་ཁྱེད། །

བརྒྱད་ཅུའི་དགུང་སྟོན་རྟེན་འབྲེལ་ཚེས། །

གཏང་རགས་མཆོད་ཚིག་ང་ཡིས་འབུལ། །

 

བྱ་དུར་གནས་ཀྱི་མདུན་ཞོལ་དུ། །

དགའ་མལ་བོན་གྱི་འདུས་སྡེ་ཞེས། །

མཁན་རབས་དང་པོའི་མཛད་པ་ལ། །

 སྤྲོ་བའི་ཡི་རངས་ང་ཡིས་འབུལ། །

 

ཟུང་ཆུའི་དགའ་མལ་དགོན་ཆེན་གྱི། །

སེང་ཁྲིའི་པད་གདན་གནོན་པའི་གཤེན། །

བརྒྱད་ཅུའི་གཟི་འོད་འབར་བ་ལ། །

དཀར་པོའི་མཇལ་དར་ང་ཡིས་འབུལ། །

 

ཅང་ཤེས་རྟ་ཡི་ཆོལ་ཁ་རུ། །

ངེས་དོན་བདེན་པའི་ལེགས་བྱས་ཅན། །

འགྲོ་བའི་བཤེས་གཉེན་དམ་པ་ལ། །

ཁ་མིན་སྙིང་ནས་ང་ཡིས་བསྟོད། །

 

འཆད་རྩོད་རྩོམ་པའི་ཟླ་ཟེར་གྱིས། །

ལུང་རིག་དབྱར་མཚོ་རྒྱས་པ་ཁྱེད། །

བསྟོད་དབྱངས་ཉ་མོའི་འཁྱུག་རྩལ་འདི། །

ཁྱུང་གི་གསེར་ཉ་ང་ཡིས་བསྒྱུར། །

 

ཐོས་བསམ་སྒོམ་པའི་ཉི་འོད་ཀྱིས། །

ཉམས་རྟོགས་པད་ཚལ་བཞད་པ་ཁྱེད། །

བསྟོད་གླུ་སྦྲང་མའི་གཤོག་རླབས་འདི། །

ཁྱུང་གི་གཡུ་སྦྲང་ང་ཡིས་བསྐྱོད། །

 

རང་མོས་དད་པའི་རྩྭ་ཐང་དུ། །

གཞན་བསྐུལ་ཆར་ཟིམ་བབས་པའི་མོད། །

བསྟོད་དབྱངས་ཨུ་དཔལ་ཆུན་པོ་འདི། །

ཁྱུང་གི་བོན་སྨྱུག་འཛིན་དེས་ཕུལ། །

ཞེས་གཡམ་དྲང་སྲོང་རྒྱལ་མཚན་གྱིས་ཧི་བོན་དྲ་ལམ་ནས་དགུང་སྟོན་རྟེན་འབྲེལ་གྱི་མཛད་སྒོའི་གནས་ཚུལ་མཐོང་ཐོས་བྱུང་བ་དང་ལྷན་དུ་དགའ་སྤྲོའི་ངང་ནས་སྤེལ་བའོ། །