སྙན་ངག་ལ་ཕྱིར་དྲན།
སྙན་ངག་གིས་དོན་དམ་པའི་གཟུགས་བརྙན་བཞེངས་དགོས་ལ། སྙན་ངག་ནི་སེམས་ཀྱི་འགྱུ་བ་དང་
འགྲོགས་པའི་སྟངས་སྟབས་ཡིན། སྙན་ངག་གིས་མུན་པ་རབ་རོབ་ཀྱི་ཀློང་ནས་བཞེངས་པའི་ངར་
ཚུགས་སྟོན་དགོས་ལ། ལྷ་ཡུལ་ནས་ཡོང་བའི་ངང་ཚུལ་ཡང་སྟོན་སྲིད། མཛེས་ལྡན་མ་ཞིག་གི་ཟུར་
མིག་ཀྱང་སྙན་ངག་གི་ཀློང་ནས་སྟོན་སྲིད་ལ། རྫུ་བག་ཀྱང་སྟོན་ཆོག སྐབས་འགར་མུན་པའི་ཕ་རོལ་ནས་བཞེངས་པའི་འཇབ་རྒོལ་གྱི་ཚུགས་ཀ་ཡང་སྟོན་ཆོག་ལ། སྐྲག་བསྔང་ཡང་སྟེར་སྲིད། དོན་
དམ་པའི་སེམས་འགྱུ་ཡི་ཀློང་ནས་བཞེངས་པའི་ངག་ལམ་ཞིག་ནས་ས་ཡང་འགུལ་སྲིད། དེ་ནི་སྙན་
ངག་ཡིན། རི་བོ་དང་ཆུ་བོ། དེ་བཞིན་སྐྱེད་ཚལ་དང་པད་མ། འདི་དག་ཀྱང་སྙན་ངག་གི་དབྱིངས་སུ་
རོལ་ན། བཟོ་ལྟ་ཁེ་མཚར་རེ་སྟོན་སྲིད། ལན་རེར་ངུ་སྲིད་ལ་སྐབས་འགར་དགོད་སྲིད་པའི་སྙན་ངག་
ཡ། ཁྱོད་ནི་བདག་གི་སེམས་འགྱུ་དང་ཡུལ་གྱི་སྣང་བ་གཉིས་ལྷན་དུ་འདྲེས་ཏེ། དབུགས་ཀྱི་རྒྱུ་བ་
ལྡན་པའི་སྒུལ་ཤུགས་ཤིག་ཅི་ལ་མིན། བེམ་གཟུགས་ཅི་ཞིག་ལ་སྙན་ངག་གི་རྣམ་ཤེས་ཞུགས་པ་ནས།
རོ་དང་འདྲ་བའི་ཁོ་ཡང་འགུལ་སྐྱོད་རྒྱག་སྲིད། ཐིངས་འགར་འཐོར་ཞིག་འགྲོ་བའི་ངན་ཚུགས་ཤིག་ཀྱང་བསམ་བཞིན་དུ་བསྟན་པ་མ་ཡིན་ནམ། བེམ་གཟུགས་ཡ། ཁྱོད་ལ་སྙན་ངག་གི་རྣམ་ཤེས་ཞུགས་ནས་བཟུང་། ཁྱོད་ཀྱི་དོན་དམ་པའི་གསང་བ་ཁོག་བཅུག་དེ་ཡང་ག་ལེར་ཕྱི་ལ་ཤོར་སོང་བ་ཡིན་ནམ།
མ་ཟད་སྙན་ངག་ནི། སྟག་ཤར་དར་མའི་གདོང་གི་ཉིན་བྱེད་ཡིན་ལ། སྨན་ཆུང་གཞོན་ནུའི་འདོད་
པའི་རང་ཚུགས་ཀྱང་ཡིན། སྙན་ངག་ནི་སེམས་ཀྱི་མེ་དཔུང་ཡིན་ལ། རྩ་ཡི་བརྐྱང་བསྐུམ་ཡང་ཡིན།
སྙན་ངག་ནི་སེམས་ཀྱི་གྲིབ་གཟུགས་ཡིན་ལ། ང་ལ་བལྟས་ཏེ་ཁོ་རྒྱུ་བའང་ཡིན་མོད། དེས་ན་སྙན་
ངག་ནི་འདི་ཡིན་དང་དེར་སོང་ཙམ་གྱི་བརྗོད་བྱ་སྟོན་ཐུབ་པ་ཙམ་ཞིག་གིས་ག་ལ་ཚད། ཚིག་བཅད་
པ་ཙམ་ཞིག་གིས་དེ་བས་ཀྱང་མི་ཆོག་གོ ། །
བོན་སྨྱུག་གི་བསམ་ཚུལ་འགའ་ཙམ་ཡིན།
༢༠༡༣ལོའི་སྤྱི་ཟླ་༥ཚེས་༡༥ཉིན།
- ཟིན་ཐོ་གོང་མ།གཞན་ཡུལ་འགྲིམས་པའི་བུ་ཆུང་།
- ཟིན་ཐོ་འོག་མ།ལུང་དང་རིགས་པའི་བགྲོ་གླེང་།
ལེགས་པོར་མཐོང་སོང་། གུས་པ་གངས་ཐིག་གིས།
དགའ་འོས་པའི་སྙན་ངག་ཅིག་རེད་འདུག །