སེམས་ཀྱིས་བྲིས་པའི་སྙན་ངག །

རྒྱན་གྱིས་སྤྲས་པའི་གཞོན་ནུ་དར་མ་དང་། །

ཡིད་ལ་འོང་བའི་གླུ་ངག་སྙན་མོ་སྟེ། །

སེམས་ལ་འབབ་པའི་ལང་ཚོ་མཛེས་པ་གསུམ། །

སྐྱོ་བ་སངས་པའི་དགའ་སྟོན་ངོ་མ་ཡིན། །

སེམས་ན་འཁྱིལ་བའི་བརྩེ་བ་རྒྱ་མཚོ་དང་། །

བཞིན་ལ་བསླང་བའི་འཛུམ་མདངས་དག་མ་སྟེ། །

ངག་གིས་སྨྲས་པའི་བདེན་གཏམ་གྲུང་མ་གསུམ། །

གཞན་སེམས་འགུག་པའི་ཐབས་ཀྱི་དྭངས་མ་ཡིན། །

ཕྱི་ཡི་སྣང་བས་ཡིད་བརྟན་འཕྲོག་པ་དང་། །

ནང་གི་རིག་པའི་ཚོར་འདུ་བཙན་པ་སྟེ། །

བར་གྱི་སྨྲ་ལྕེ་བརྡ་ལ་སྦྱོར་བ་གསུམ། །

སྙན་ངག་མཁན་ལ་བསྐོས་པའི་ལས་དབང་ཡིན། །

སྔོན་པོའི་བ་དན་མཁའ་ལ་ཕྱར་བ་དང་། །

མེས་པོའི་རིག་གནས་ལྗོངས་སུ་རྒྱུ་བ་སྟེ། །

སློབ་པའི་འདུ་ཚོགས་འཕེལ་ཞིང་རྒྱས་པ་གསུམ། །

ཁ་བ་རི་པའི་གསོན་ཤུགས་འཕར་མ་ཡིན། །

མཐུན་པའི་ལག་རྡང་དམ་དུ་སྦྲེལ་བ་དང་། །

མདུན་བསྐྱོད་གོམ་པ་གཉམ་དུ་སྤོ་བ་སྟེ། །

སྐྱིད་སྡུག་འཚོ་བ་ལྷན་དུ་རོལ་བ་གསུམ། །

མི་འཆད་ཨ་ལོང་མཐའ་ནས་བསྐོར་བ་ཡིན།

སེམས་ན་ཐིམ་པའི་ཕ་ཆོས་གཙང་མ་དང་། །

“རུས་ལ་ཟུག་པའི་ཕ་སྐད་དག་མ་སྟེ། །”

ཁྲག་དང་འདྲེས་པའི་རིགས་ཞེན་དྲོན་མོ་གསུམ། །

གངས་ཀྱི་བུ་ཡི་སྲོག་རྩ་དམར་པོ་ཡིན། །

བློ་ལ་ཤར་བའིལྷག་བསམ་ལྷད་མེད་དང་། །

ཁ་ནས་བཤད་པའི་བདེན་གཏམ་མངར་མོ་སྟེ། །

སེམས་ཀྱིས་བྲིས་པའི་ང་ཡི་སྙན་ངག་གསུམ། །

དཔྱོད་ལྡན་དྲ་གྲོགས་རྣམ་པའི་གསོས་སུ་སྨོན། །