གཤེན་རྒྱལ་དྲན་གླུ།
གཡམ་དྲང་སྲོང་།
ལ་ལས་མེད་ཅེས་སྨྲ་ནས་རྣ་ཅོག་བཟུར། །
ལ་ལས་གར་ཡོད་ཟེར་ནས་བྱ་ར་བྱེད། །
ལ་ལས་སྒྲུང་དུ་བསྙོན་ནས་སྐུལ་པ་འདེབས། །
ལ་ལས་དུད་འགྲོའི་བཟོ་ཞིག་ཨེ་ཐོན་བསམ། །
འགའ་ཞིག་བདུད་བོན་ཟེར་ནས་ཐན་དུ་ལྟ། །
ཚོ་རེས་གཏོ་ཆོག་ཙམ་ལས་མི་ཤེས་ཟེར། །
དེ་ཡང་དམར་མཆོད་ཟེར་ནས་སྒྲོ་ཞིག་བཏགས། །
མདོར་ན་ནང་པ་མིན་པའི་ལོག་བཤད་རྒྱབ། །
བྱང་སེམས་མིང་དུ་གྲགས་པའི་མགོ་རིལ་དེ། །
ཁྲི་སྲོང་གདོན་གྱིས་བསླུས་པའི་ཨ་གསར་གྱིས། །
འཇོན་བློན་སྤྱུགས་པའི་ཆེད་དུ་མ་གདན་གོང་། །
གོས་སྔོན་རལ་པ་ཅན་གྱི་སྲུང་ཁ་དྲོ། །
ཤག་ཀྱའི་བུ་ཡིས་བཤད་པའི་ཆོས་གཏམ་དེ། །
བྷོ་ཏི་མཁན་པོའི་འཕྲལ་འཕྲུལ་མིག་གཡོ་ཡིས། །
གངས་ལྗོངས་འཁྲུག་པའི་རྒྱུ་རུ་མ་དྲངས་གོང་། །
པོ་ཏི་སྔོན་པོ་ཅན་གྱི་ལེ་ཚན་མང་། །
རྡོ་རྗེ་མཐུར་སྦུབ་ཅན་གྱི་སྒྲ་དབྱངས་དེ། །
པད་མ་མཚོ་ལས་སྐྱེས་པའི་ཡ་མཚན་གྱིས། །
གངས་ལྷ་དཀྲོགས་པའི་རྐྱེན་དུ་མ་དཀྲོལ་གོང་། །
ཁྲི་ལོ་གནམ་གྲགས་འབར་བའི་སིང་སྐད་སྙན། །
གཏོ་འདི་ཡག་ཁ་སྤེལ་བའི་ཞལ་ལྕེ་ཡིན། །
དགེ་བ་བཅུ་གྲངས་བསྙེན་པས་འདི་ཕྱིར་བདེ། །
ཁྲིམས་ཀྱི་རྩ་ལག་ཚང་པས་སྒྲིབ་པ་དག །
འདི་དག་ཤག་ཀྱ་བས་ཀྱང་གཤེན་རབ་སྔ། །
འཕན་ཡུལ་སྣང་སྟོང་ཟུང་དུ་འཇུག་པའི་སྒོ །
ཆབ་དཀར་ལུས་སེམས་ལྷ་རུ་བསྒྱུར་བའི་བོན། །
དཔོན་གསས་སེམས་ཉིད་ཀློང་དུ་སྒོམ་པའི་སྡེ། །
མཐོ་ཐོག་སྤྱི་ཆབ་ནམ་མཁའ་ལྟ་བུའི་མཛོད། །
འདི་ནི་གཤེན་རྒྱལ་བསྟན་པའི་ཁྱད་བོན་ཡིན། །
འདི་ནི་ཐོད་དཀར་བུ་ཡི་མཁྱེན་ཡོན་ཡིན། །
ཞང་ཞུང་ལུང་པའི་རྩེ་ནས་ལུད་པ་ཡིན། །
སྒོ་ཕུག་བར་གྱི་ཁྱོན་ལ་ཁྱབ་པ་ཡིན། །
ཡབ་ཡུམ་སྲས་དང་བཅས་པའི་ཁུངས་ལུང་ཡོད། །
ལོ་ཟླ་ཚེས་དང་བཅས་པའི་འཁྲུངས་རབས་ཡོད། །
སྔགས་བཙུན་སྒོམ་སྡེ་བཅས་པའི་རྗེས་འཛིན་ཡོད། །
ཞྭ་དཀར་གོས་སྔོན་བྱེད་པའི་ཆ་ལུགས་ཡོད། །
གཟི་བརྗིད་སྤྱི་ཁྱབ་གཞུང་ལས་མཛད་རིམ་གསལ། །
གཟེར་མིག་གནད་ཀྱི་མདོ་ལས་བརྡ་ཆད་མང་། །
ཀློང་རྒྱས་མཆོད་པའི་གཞུང་ལས་ང་ཚོས་ཀློག །
སྲིད་པ་སྤྱི་མདོས་ཆོ་གས་སྐྱོན་འཛུགས་བསལ། །
ཁྲི་ལོའི་གོང་ནས་གྲགས་པའི་གཤང་སྐད་དང་། །
སྟོང་རིའི་རྒྱབ་ནས་ཆེམ་པའི་རྔ་སྐད་དེ། །
པོ་ཏི་སྔོན་པོ་བཀླགས་པའི་བོན་སྐད་གསུམ། །
དེ་རིང་གཤེན་རྒྱལ་དྲན་པའི་གླུ་སྐད་ཡིན། །
རྒྱུ་སྐར་རྒྱལ་དང་འགྲོགས་པའི་ཉ་ཟླ་དེ། །
འཛམ་བུའི་ཨ་སྔོན་དབྱིངས་སུ་མངོན་དང་ལྷན། །
ཁྲ་མོའི་གཤེན་སྡེ་ཆེ་རུ་སྒྲོན་ཚོགས་བཀོད། །
འདི་དག་གཤེན་རྒྱལ་དགྱེས་པའི་མཆོད་སྤྲིན་ཡིན། །
གཡམ་དྲང་སྲོང་གིས་བོད་ཤིང་རྟ་ལོའི་སྟོན་པའི་འཁྲུངས་ཚེས་ཆེན་མོའི་དུས་
ཆེན་སྐབས་གཤེན་རྒྱལ་གང་དེ་རྗེས་དྲན་གྱི་མཚོན་བྱེད་ཙམ་དུ་ཕུལ་བ་དགེ་
བར་གྱུར་ཅིག་གུ། །
- ཟིན་ཐོ་གོང་མ།སེམས་ནང་གི་ཞུ་བ།
- ཟིན་ཐོ་འོག་མ།སྙན་ངག་གི་དེབ་ཕྲེང་<< རི་སྐེད་ནས་བཏབ་པའི་ཀི་སྒྲ >>།
སྙན་བྱུང་བཀའ་དྲིན་ཆེ།
བོན་སྨྱུག་ལགས་རྩོམ་སྙན་མོ་ཞིག་རྒྱབ་འདུག་བཀའ་དྲིན་ཆེ་ཞུ།།
ཟིན་བདག་མཆོག་ནས་དཔྱད་མཆན་ལ་དོ་ཁུར་གྱིས་གསལ་བཤད་གནད་སྨིན་གནང་བར་ཐུགས་རྗེ་ཆེ། དེ་བཞིན་མ་འོངས་གཏམ་བརྗོད་རང་དབང་དང་སྙན་ངག་གི་ཚོར་འདུ་ལ་ཚད་བཟུང་མེད་བཞིན་དེ་ལུགས་མཛད་འཐུས་དང་། སྤྱིར་ན་སྐབས་བབ་ཀྱི་སློབ་གསོ་དང་སྤྱི་ཕན་གྱི་བྱ་གཞག་ཁག་ལ་ཡར་ཟླའི་དཔལ་ལ་འགྲན་པའི་ཤིས་སྨོན་ཡོད།བོན་བསྟན་གཅིག་གི་བོན་གྲོགས་གྲུང་མ་བོན་ཚང་མཚེར་སའི་སྟེང་འཕྲད་བཟང་།།གཤེན་ཆེན་མི་བོའི་དུས་ཆེན་སྐབས་སུ་གཤེན་རྒྱལ་དྲན་པའི་གླུ་ཆུང་སྙན།།
གོ་ལའི་ལྗོངས་ཀྱི་མི་མཐུན་སྨག་རུམ་གཤེན་བསྟན་སྒྲོན་མེས་གསལ་བར་སྨོན།།
འཛིན་གྲོགས་གཅིག་པའི་ཁྱུང་གསེར་གཤང་གནམ་གྲགས་ནས།།
ད་སྔོན་ཀློག་པ་པོ་ཞིག་ནས། དགོངས་ཚུལ་ཐད་གཏོང་གནང་བར་དགའ་གུས་ཡོད། ཁྱེད་ནི་མིག་རྒྱང་ཅུང་རིང་བའི་ཀློག་པ་པོ་ཞིག་ཡིན་ཚོད་སྣང་ཕྱིར་གུས་པའི་རྩོམ་དེ་ཅུང་ཙམ་གུ་དོག་གི་རྒྱ་རུ་ཚུད་པའི་སྣང་ཚུལ་འབྱུང་སྲིད་པ་དངོས་དོན་ལགས་ཕྱིར། ཕྲན་ནས་ཀྱང་དགོངས་དག་ཞུ་ཆོག འོན་ཀྱང་གུས་པས་ཉིས་ཀའི་ཁས་ལེན་མིན་སོགས་ལ་ད་སྔོན་བསམ་མ་མྱོང་ལ། ད་ཕན་འདིའི་ཐད་ནས་གཉིས་ཀས་ཁས་ལེན་མིན་གྱི་བསམ་གཞིགས་བྱེད་རྒྱུ་མིན། འདི་ནི་གུས་པའི་ཚོར་འདུ་ལས་བྱུང་བའི་གཤེན་རྒྱལ་དྲན་ཚུལ་ལས། ཡོངས་ཀྱི་ངོར་མཐུན་པའི་ལོ་རྒྱུས་ཀྱི་གཏན་ཚིགས་ཤིག་ཀྱང་མིན། ད་ཡོད་གཤེན་བསྟན་རིན་པོ་ཆེའི་སྐྱིད་སྡུག་ལབ་གླེང་ཙམ་ལས། བོད་དོན་གྱི་རྗེས་རོ་སྟེང་གི་ངུ་ཟུག་ཀྱང་མིན། དེས་ན་ཀློག་མཁན་རྣམ་པས་དགོངས་འཆར་ཚུལ་བཞིན་སྤེལ་བ་ལ་ཡིན་ལུགས་ཀྱི་གཏན་ཚིགས་ཁ་ཤས་སྲིད་ནའང་། གཤེན་བསྟན་རྗེས་འཇུག་པས་ཁོང་ཉིད་དྲན་གླུ་ཤོར་བ་ལ་དེ་བས་ཀྱང་ཟབ་ས་ཤིག་ཡོད་ངེས། ཞེས་ཟིན་བདག་ནས།སྤྱིར་བན་བོན་གཉིས་ཆར་ཕར་བསྒྱུར་ཚུར་བཤུས་ཀྱི་འཐེན་ཁྱེར་ཞིག་སྔོན་ནས་ཡོད་འདུག་ཅིང་དེའི་དམིགས་སྒོ་གང་ཡིན་ཤེས་མོད་དེ་ད་སྐབས་བོད་སྤྱི་དོན་ལ་བློ་ཁ་ཕྱོགས་ཚེ་གླེང་རིན་ཆེན་པོ་མ་མཐོང་། འདི་ལྟར་གྲུབ་མཐའ་རང་ངོས་ནས་སྟོན་པའི་ཡིན་ལུགས་དང་བསྟུན་པའི་རྩོམ་སྤེལ་བར་ལེགས། འོན་ཏེ་དེ་འདྲ་ཡོངས་ཀྱིས་ཁས་ལེན་པའི་དུས་ནི་ཅུང་རིང་བར་སྙམ། དེ་ལས་ད་སྐབས་སྤྱི་ཡི་གནས་སྟངས་ལ་བསམས་ཏེ་རང་བསྟན་འཛིན་སྐྱོང་མི་དམན་པའི་ངོས་ཕན་ཚུན་གུ་དོག་གི་རྒྱ་རུ་མ་ཚུད་ན་ཆེས་ཆེར་ལེགས་སོ་སྙམ། མི་སྒེར་གྱི་ལྟ་བའི་ཟུར་ཙམ་ཡིན། དགོངས་དག
རྒྱལ་གཤེན་དྲན་གླུ་ནི། དངོས་གནས་གཤེན་གྱི་མཛད་སྤྱོད་བསྟོན་པའི་
གླུ་ངག་གསར་བཅད་ཞིག་གྱེར་བ་ལ་དགའ་བསུ་ཞུ།
རིག་འབར་ནས།