གྱ་གྱུའི་བསམ་བློ་ལས་འཕྲོས་པའི་གླེང་གཏམ་ཐོར་བུ།

མང་དུ་བསམ་ན་བསམ་རྒྱུ་མང་། །

འཇིག་རྟེན་རང་བཞིན་འཇིག་གིན་འདུག །

མི་ཚེའི་འཚོ་བ་སྣ་ཁ་མང་། །

 ཞིབ་པར་བལྟས་ན་བརྗོད་རྒྱུ་མང་། །

 །སློབ་གསོའི་ཚན་པ་སྐྱོང་སྟངས་དང་། ། 

།སློབ་གྲའི་རང་བཞིན་གནས་སྟངས་སོཌ། །

ཡང་ཡང་བསམ་ན་དཀའ་ཁག་ཆེ། །

དེ་བས་དཔེ་ཆར་བལྟས་ན་དགའ། །

ང་རང་དཔེ་དེབ་སྣ་མང་འགར། །

བལྟས་བཞིན་བསམ་རྒྱུ་ཇེ་མང་རེད། །

འཇིག་རྟེན་བརྩེ་གདུང་རོལ་ན་བསམ། །

དེ་ཡང་བྱིས་པའི་སྣང་བ་ཞིག །

ཡང་ན་གྲོང་འདིར་བཙན་སླད་དུ། །

དཔའ་དཔུང་ངོམ་སྟེ་འགྲོ་ཆོག་ཀྱང་། །

གླང་གོག་རྭ་རྩེས་གསོད་ལུགས་ལ། །

དེ་ཡང་གཙིཌ་ཆེར་འཛིན་པ་བླུན། །

རང་ཡུལ་ལུང་བའི་དགོན་ཆུང་ཞིག །

བདག་ཏུ་བཟུང་ན་བདག་ཕྱོགས་དང་། །

གཞན་ཕྱོཌ་འཕྲག་དོག་འགྲན་སེམས་ཀྱིས།  །

ཚེར་མའི་ཐང་དུ་མྱ་ངན་ཆེ། །

སྐབས་འགར་ལོ་རྒྱུས་ཞིབ་འཇུག་ཆེད། །

རྒྱལ་ཁམས་བསྐོར་ཏེ་འགྲོ་འདོད་ཀྱང་། །

དལ་འབྱོར་དོན་ཡོད་གཏན་འདུན་ཞིག །

མི་འགྲུབ་སྙམ་སྟེ་ཕོངས་སེམས་ཆེ། །

ཡང་ན་ཡ་ཀི་དབེན་ཁྲོད་དུ། །

ཡང་དག་ཐུན་སྒོམ་ཉམས་ལེན་ལ། །

འབད་ན་བྱང་ཆུབ་འགྲུབ་སྲིད་ཀྱང་། །

གྲོང་ཆོག་གྱེར་འདོད་བག་ཆགས་ཆེ། །

ཉབ་ཉུབ་བསམ་པའི་ཁུག་སོ་རུ། །

མི་འགྲུབ་འདོད་པ་བསམ་ལས་འགོངས། །

ཇི་ལྟར་བསམ་ཡང་བསམ་མཐའ་རུ། །

འདི་ལྟར་དགོས་པའི་འདུན་པ་སྟེ། །

གར་སོང་ཡུལ་དང་གང་འཕྲད་འགྲོར། །

ཕན་འདོད་བསམ་པས་ཀུན་སློང་སྟེ། །

འདི་དང་ཕྱི་མར་ཕན་པ་ཞིག །

བསྒྲུབ་ན་དལ་འབྱོར་དོན་གོ་ཆོད། །

རྩོམ་འདིའི་བབ་ལ་བལྟས་ཙམ་ན། །

ཁོ་བོ་ཆེ་འདོད་བློ་ཅན་གྱི། །

རྣམ་པར་འཆར་གྱི་མི་འདུག་གམ། །

ཞེས་ཀྱང་ཀུ་རེའི་ཚུལ་དུ་ཐལ། །

བོན་སྨྱུག་གིས་བྲིས། །